Job 9 - Qheshwa Biblia DC

Jobqa reparakun Diospaj pisi kallpa kasqanta Job

¹ Jobqa nerqa:

² Cheqamanta noqaqa yachani chayqa ajinapuni kasqanta; runaqa Diospa ñaupaqempi manapuni niyta atinchu mana juchayoj kasqanta.

³ Paywan churanakuyta munanman chayqa, waranqa imasmanta mana ujllatapis kutichiyta atinmanchu.

⁴ Diosqa sumaj yachayniyoj, may atiyniyoj kallpasapataj. Pitaj paywan maqanakoj llojsinman, atipanmantajri?

⁵ Payqa phiñarikuspa orqosta kuyurichin, urmachintaj, nitaj pipis chayta reparanchu.

⁶ Payqa jallp'ata kuyurichin, maypichus sayanasnin kashan chay tukuyninta kharkatichin.

⁷ Dios kamachin intita mana llojsimunanta, jinallataj qoyllurkunatapis mana k'anchajta saqenchu.

⁸ Pay sapallan cielota sayachin, mar qocha patata purin.

⁹ Pay ruwarqa cabrilla qoyllurkunata: Jatun kaj nisqa ch'asqa Osata, Orionta, Pléyades nisqatawan, uranejpi uj t'aqa qoyllurkunatawan.

¹⁰ Payqa ruwan jatuchaj imasta, mana unanchay atinasta, may t'ukuna imasta, mana yupay atinasta.

¹¹ Diosqa ñaupaqeyta pasanqa, noqataj mana rikusajchu; Pay pasanqa, noqataj mana yachasajchu.

¹² Sichus imata jap'ikapun chayqa, pitaj qhechuyta atinmanri? Pitaj ninman, imatataj ruwashanki?, nispari.

¹³ Diospa phiñakuynenqa mana usqhayta tiyaykuyta atinchu; chakisnin urapi k'umuykachanku pikunachus machu machusta yanapajkunaqa.

¹⁴ Imaynatataj noqa palabrasta tarisaj, Dioswan churanakunaypajri?

¹⁵ Mana juchayoj kashaspapis, noqaqa mana kutichiyta atiymanchu. Payqa cheqanchawajniymin; chaynejta paymanta khuyakunallawanta mañakuyman.

¹⁶ Sichus payta wajyakojtiy paytaj kutichimuwanman chayqa, mana creeymanchu palabrasniyta kasumuwasqanta.

¹⁷ Payqa astawan jasut'iykuwanman uj loco parawan jina, astawantaj nanaykuchiwanman mana imallamanta.

¹⁸ Astawan sinch'ita llakichiwan, mana samarikojllatapis saqewanmanchu.

¹⁹ Sichus atiyninmanta parlasunman chayqa, cheqamanta payqa sinch'i atiyniyoj. Demandaman wajyachisunman chayqa, pitaj Payta wajyachimunmanri?

²⁰ Sichus noqa niyman cheqampi kasqayta chayqa, simillaytaj juchachaykuwanman. Sichus niyman manapuni juchayoj kasqayta chayqa, astawan niwanman sajra juchayoj kasqayta.

²¹ Cheqamanta noqaqa allinchu kani? Noqa kikiy mana yachakunichu! Noqa kikiy chejnikuni!

²² Tukuy ima uj rejlla. Chayllata noqaqa yuyani. Juchayojta mana juchayojta payqa ujllapi tukuchin.

²³ Sichus mana juchayoj runas llakiyta wañunku chayqa, Dios asirikun chay jinata ñak'arisqankumanta.

²⁴ Kay mundotaqa juchasapaspa makinman jaywan, juezkunaj ñawisninkutataj tapaykun. Sichus mana Dioschu ruwan chayqa, pitaj chantari, maypitaj kashanri?

²⁵ Kay diasneyqa chaski runasmantapis astawan correshan, manaraj kusikuyniyta allinta rikushajtiy.

²⁶ Chaykunaqa rishanku uj correshaj bote jina, anka imatapis jap'ej kachaykukun ajinata.

²⁷ Sichus tukuy llakiyniyta qonqayta munani, kusisqataj kayta munani chayqa,

²⁸ tukuy nanayniy astawan mancharichiwan; chaypi yachani Diosqa mana juchayoj kasqayta mana creewasqanta.

²⁹ Noqaqa juchasapa kani. Imapajtaj qhasi mana kajta llank'asajri?

³⁰ Yuraj rit'i yakuswampis mayllakuyman, jabonwampis makiyta mayllakuyman,

³¹ Diosqa t'oqoman wijch'uykuwanqa, p'achaynintin noqamanta millachikuwanqa.

³² Dioswanqa mana uyanchanakuymanchu uj runawan jinaqa, nitaj niyta atiymanchu, jaku iskayninchej rinachej cheqanchajkunajman, nispa.

³³ Allin kanman ari noqayku chaupipi uj cheqanchaj kananqa, iskayniykuta cheqanchanawaykupaj uj rejta.

³⁴ Dios chay jasut'iymanta karunchachiwachun, amaña astawan manchachiyninwan manchachinawampaj!

³⁵ Chaypacha noqapis parlariyman payta mana manchachikuspa; imaraykuchus chay jina kashaspaqa manaña noqapichu kani.