Job 8 - Qheshwa Biblia DC

Bildadqa willan Diospa cheqan kayninta Bildad

¹ Súa jallp'amanta jamoj Bildadqa kuticherqa:

² Mayk'ajkamataj chay jinata parlankiri? Mayk'ajkamataj simiykimanta chay palabras llojsenqa uj loco wayra jinari?

³ Tukuy Atiyniyoj Diosqa cheqan kajta q'ewinchu, chayri allin kajtapis?

⁴ Sichus wawasniyki Diospa contranta juchallerqanku chayqa, Payllataj jasut'in, juchankuman jina.

⁵ Diosta mask'ay, Tukuy Atiyniyojta, mañakuytaj qanmanta khuyakusunanta.

⁶ Sichus qan llimphuchakunki, cheqantataj purinki chayqa, Pay qhawarisonqa, familiaykitataj watejmanta sayarichipusonqa.

⁷ Ñaupajta imasniykichus tiyapusorqa, chaykunaqa manaraj imapis kanchu, qhepaman tiyapusonqa chaykunamanta nisqaqa.

⁸ Tapuriy ñaupa runas imaynatachus tiyakorqanku chayta, paykunamanta yachakuy imaynachus kasqankuta.

⁹ Noqanchejqa qaynallamantaraj kanchej, manaraj imatapis yachanchejchu; kay jallp'api p'unchaykunasninchejqa llanthu jina ripunku.

¹⁰ Ñaupa runasri ashkha imasta yachachiyta atisonqanku, ashkha imasmantataj willasonqanku.

¹¹ Juncoswan papiro sach'aswanqa maypichá yakus tiyan chayllapi wiñanku.

¹² Chaywampis q'omerlla kashaspa, mana k'utusqalla, tukuy qhorasmanta aswan ñaupajta ch'akirparin.

¹³ Kikillantaj kayta atin pikunachus Diosta qonqapunku chaykunawampis, sajra runaspa may jinata yuyaspa suyasqankoqa chinkapullantaj.

¹⁴ Creesqanku, imapichus atienikusqanku imaqa, kusi kusej llaqhan jinalla kanku.

¹⁵ Kusi kusi llaqhamanta jap'ikuyta munanqanku; chaytaj ñukherpakonqa, chayri kusi kusi lleqhaman ch'ipakonqanku, chaytaj mana jap'enqachu.

¹⁶ Intej ñaupaqempi q'omer qhoras jina kanku; tukuy huerta ukhupi rikhurej qhoras jina;

¹⁷ saphiykuntaj chhankasnintinman, chay saphistaj rumisnintinman ch'ipaykukunku.

¹⁸ Pillapis chaymanta t'irajtintaj, ni pipis yachanqachu chaypi kasqankuta.

¹⁹ Ajinamanta chaykunaqa tukukonqanku, maypichus wiñarqanku chaykunapitaj waj sach'as wiñanqanku.

²⁰ Diosqa mana saqenqachu cheqan runataqa, nitaj sajra runatapis yanapanqachu.

²¹ Payqa ujtawan asirichisonqa, saqesonqataj kusiywan jatunmanta qhaparejta.

²² Chaymantataj enemigosniykeqa p'enqaymanta wañonqanku. Sajra runaspa wasisninkutaj thunisqas kanqanku.