Job 6 - Qheshwa Biblia DCJobqa kausaqesnimpa palabrasninta qhesachan Job 1 Chaymanta Jobqa kutichispa nerqa: 2 Ay, sichus kay tukuynin ñak'arisqay, llakiyniy ima, uj pesaspi pesakunkuman chayqa! 3 Pesakunkuman mar qocha t'iyumanta astawan; chayrayku imatapis usqhayllata parlarpani. 4 Tukuy Atiyniyojpa flechasnin noqapi sumaj takasqas kashanku, chaypa venenosnin tukuy ukhuyta pasawan, Diospa jatun manchachiykunasnin noqawan maqanakushawanku. 5 Burroqa pastopi kashaspa waqanchu? Toropis pastopi kashaspa muwanchu? 6 Q'ayma mikhoyqa mikhuchikunchu mana kachiyojqa? Runtoj yurajnenqa sumaj q'apayniyojchu? 7 Imatachus mana jayk'ajpis mikhuyta munajchu kani; chaymin kunanqa mikhuyneyqa. 8 Allin kanman Diosqa qonawan imatachus mañakusqayta, allin kanman imatachus munasqayta qonawan! 9 Allin kanman Diosqa usqhayta tukuchinawan, makisninwan phirita ruwanawampis! 10 May jinata ñak'arichiwajtimpis, noqapajqa may kusiy kanman; noqaqa Diospa leyninta waqaychanipuni. 11 Manaña kallpay kanchu chay imasta jap'ikunaypaj; imapajñataj kausasajri? 12 Kallpayqa rumi jina sinch'ichu? aychayqa broncemantachu? 13 Mana noqa kikiypeqa atienikunichu, nitaj pipis yanapariwaj kanchu. 14 Pi llakisqatapis kausaqenqa sonqochaykurin; pichus Tukuy Atiyniyojta qonqapojtimpis sonqochaykurin. 15 Qankuna, kausaqesníy, saqerpariwankichej, qankunaqa qhonchu yaku jina usqhayllata chinkarinkichej. 16 Chhullunkawan pakaykusqa, rit'iwan khataykusqataj. 17 Q'oñi tiempo chayamojtintaj chhullurparin, chay yakutaj ch'akipun. 18 Chay yakuta mask'aspa ñanninkumanta wist'uykunku, chay ch'aki pampanta rishaspallapuni chinkapuni. 19 Temanmanta purejkuna qhawarqanku tarinankuta, Sabamanta kajkunataj suyanku yaku kananta. 20 Chayaytawan chay jina suyashaspa k'asakunku, chay wayq'opitaj t'ukusaj qhepakunku. 21 Cheqamanta qankunaqa noqapaj chay wayq'o jina kankichej; qankuna rikuwankichej imaynachus kasqayta, mancharikunkichejtaj. 22 Noqaqa mana imaykichejtapis mañakuykichejchu, nitaj munanichu kay ñak'ariymanta qolqeykichejwan orqhonawaykichejta. 23 Mayqen enemigoymantapis qhechuwaychej nerqaykichejchu, chayri sajra runaspa makinmantapis kacharichiwaychej nerqaykichejchu? 24 Yachachiwaychej allin imasta, noqataj ch'inmanta uyarisqaykichej; rikuchiwaychej ari ima sajratachus ruwasqayta. 25 Cheqan palabrasqa allimpuni mana qhesachanapaj jinachu; qankunarí mana allinta unanchaspalla juchachashawankichej. 26 Qankunaqa palabrasniymanta k'amiwankichej, chay qhasi manakaj palabrastaqa wayra apakapun. 27 Qankunaqa wajcha runaj kausayninman pujllakunkichej, uj t'oqotataj kausaqaykichejpaj allankichej! 28 Kunanqa sichus munankichej chayqa, uyayta qhawariwaychej, niwaychejtaj sichus llullakushani chayqa. 29 Kunanqa kutirichiychej chay nisqaykichejta, ama sajrasqa kaychejchu, reparaychej cheqan runa kasqayta. 30 Qankunaqa creenkichejchu noqa llulla kasqayta, imatachus parlasqayta mana reparakusqayta? |
Qheshwa Biblia DC © Sociedades Bíblicas Unidas, 1986.
United Bible Societies