Job 4 - Qheshwa Biblia DC

Elifazqa Jobta k'amin Elifaz

¹ Temanmanta Elifazqa parlarerqa, kay jinata:

² Kunanqa kay imasta nisqayku Job, ichapis qampajqa mana allinchu kanqa, chaywampis mana pipis ch'in kakuyllataqa atinmanchu.

³ Qanqa tukuyman sumaj imasta yachachej kanki, llauch'iyasqatapis kallpachaj kanki.

⁴ Pichus misk'akojtaqa palabrasniykiwan kallpachaspa sayarichej kanki, urmakoj jina kashajtapis jap'iykurej kanki.

⁵ Kunanqa qanman kay sajra imas jamusojtin iskayrayashanki, qanman kay ñak'ariy chayamusojtin t'ukushanki.

⁶ Qanqa, Diospa uj sumaj kamachin kanki, tukuy imatapis sumaj cheqanta ruwaj runa, imaraykutaj Diospi mana astawan atienikunkichuri?

⁷ Kunanqa reparakuy ari; pitaj mana juchayoj kashaspa urmanri? Maypitaj sumaj cheqanta purejkuna chinkallankuri?

⁸ Noqaqa rikuspa parlani, pikunachus sajrata llank'ajkuna llakiyta tarpojkunaqa, chayllatataj pallarikapunku.

⁹ Diosqa paykunaj patankuman phukumun, sinch'i phiñakuyninwantaj mana ujniyojta chinkachin.

¹⁰ May jinata león jina qhaparishajtinkupis, Diosqa kirusninkuta t'unaspa ch'inyachenqa.

¹¹ Machu león manaña imatapis jap'ikuyta atispa wañun, china leompa uñasninpis tukuynejman ch'eqerakunku.

¹² Chay imasqa noqapajpis laqhalla karqa, ayphullata parlamojta uyarerqani.

¹³ Ch'isin tukuy runas puñurasqankumantaña, ch'ijmiykuwajtin mana puñuyta aterqanichu.

¹⁴ Chay ch'isi jamuwarqa mancharikuy, chiri chiritaj oqhariwarqa, tukuy tullusniypis qharkatitillarqa.

¹⁵ Uj wayralla uyayta phukuspa pasarpariwarqa, ukhuypi pelosniypis q'as q'as nispa chhurkuyaykuwarqa.

¹⁶ Ñaupaqeypi uj runapis kanman jina sayaykun, paypa uyanta mana jayk'ajpis rejsejchu kani, chaymantaqa tukuy imapis ch'inlla karqa, uj parlamojtataj uyarerqani:

¹⁷ Runaqa Diospa ñaupaqempi cheqampunichu kayta atinman? Runaqa llimphupunichu kanman pichus ruwajnimpa ñaupaqempi?

¹⁸ Kamachisnimpipis mana atienikunchu, angelesnimpipis mana allin imastaraj Diosqa tarin.

¹⁹ T'urumanta ruwasqa wasispi tiyakojkunapeqa astawan Diosqa chayta tarenqachu? Wasisninkoqa ñut'u jallp'a patapi sayasqa kashan; paykunaqa thutas jina sarusqas kayta atinku!

²⁰ Tutamanta ch'isinkama thuñisqas kanku; paykunaqa wiñaypaj wañunku, nitaj pipis paykunamanta dakunchu.

²¹ Kausaynenqa uj q'aytu p'itikun jinata tukukun; manaraj imastapis allinta yachashaspa wañupun.