Job 39 - Qheshwa Biblia DC

¹ Qanqa yachankichu mayk'ajchus k'ita cabras uñachakusqankuta? Qanqa rikunkichu tarukasta wachashajta?

² Qan yachankichu mashkha unaytachus chichu kananta? Qan yachankichu mayk'ajchus wachananta?

³ Wachashaspaqa mayta k'umuykunku, uñanku llojsejtintaj nanayninku thañin.

⁴ Uñasqa campopi sumaj kallpasniyoj wiñanku. Chaymanta orqosman ripunku mana kutimuyniyojta.

⁵ K'ita burrota pitaj kacharisqata uywanri? Pitaj nin jina gustonkupi purinankutari?

⁶ Noqa chaykunataqa nini maypichus tiyanankuta, ch'in kajkuna cheqaspi k'ara jallp'asnejpi.

⁷ Llajtapi ima ch'ajwastapis chaykunaqa manchachikunku, burro qhatejkunaj parlasqankutaqa mana kasunkuchu.

⁸ Loma orqosta chinkarinku pastota mask'aspa, ima q'omer qhorasllatapis mikhunankupaj mask'aspa.

⁹ Creenkichu k'ita toroqa qampaj llank'apusunanta, ch'isimpis uywa qaranaykipi puñunanta?

¹⁰ Atiwajchu umanman yugota watayta, chanta llank'achiytataj chayri yuyankichu qhepaykita llank'aspa jamunanta?

¹¹ Qanqa paypi atienikuwajchu sumaj kallpasapa kasqanrayku, saqewajchu llank'anasniykita llank'apusunanta?

¹² Creenkichu cosechasniykita oqharipusunanta, granostataj eraman tantapusunanta?

¹³ Surisqa, kusiywan lijrasninta laphaqeyachinku, cigüeñaj alasnimpis kanman jinata.

¹⁴ Chaykunaqa runtusninkuta t'iyusman saqenku, chay runtusta inti q'oñichinampaj.

¹⁵ Chaykunaqa mana yuyankuchu pipis saruykunanta, nitaj yuyanchu ima uywapis chay runtusta saruykunanta.

¹⁶ Irpasninkutaqa chejnikunku, manapis paykunajtachu kanman jina; mana yuyankuchu imastachus ruwasqankoqa qhasillapaj kasqanta.

¹⁷ Noqaqa chaykunaman mana yachayta qonichu, nitaj yuyaychakuytapis qonichu.

¹⁸ Chaywampis sayariytawan manchayta ayqen; jinamanta asiykukun caballopi rej runasmanta.

¹⁹ Qanchu caballosmanqa kallpata qorqanki? Pitaj caballoj kunkanman k'achituta chujchasninta churarqari?

²⁰ Qanchu caballotaqa langostata jina phinkichinki? senqanmantapis manchachikunata jina phor phor nichinki?

²¹ Jallp'ata thawin, kallpanwantaj kusikun, mana manchachikuspataj maqanakoj sayaykamun.

²² Chay jina manchaymanta asiykukun, mana mancharinchu, nitaj espadasta rikuspapis kharkatitinchu.

²³ Paypa contranta aljaba flechasniyoj sonajtimpis, jinallataj fierromanta lanzawan, jabalinawan chispeyajtimpis,

²⁴ mayta correspa karuta rin, pututoj waqasqantawan mana kakuyta atinchu.

²⁵ Relinchiyaspa pututoj waqasqanman kutichin; karullamanta mayta maqanakusqankuta muskhirin, uyarintaj capitanespa qhaparisqankuta, kamachisqankuta ima.

²⁶ Qanqa may yachayniyojchu kanki mamaniman phawayta yachachinaykipaj, uray ladonman phawachinaykipaj?

²⁷ Qanqa ankata kamachinkichu, alto chhankaspi thapachakunanta?

²⁸ Payqa tuta p'unchay alto chhankaspi tiyakun, aswan altonnejpi thapantapis thapachakun.

²⁹ Chay patallamanta qhawamun, imatachus jap'inantataj karullamanta wateqamun.

³⁰ Irpasninmanqa yawarta ch'onqachin, mayupichus wañusqas kashanku, chaypipuni payqa rikhurin.