Job 36 - Qheshwa Biblia DC

Elioqa Diosta jatunchan

¹ Elioqa ujtawan nerqa:

² Uj chhikanta suyariway, chaymanta yachachisqayki, noqajtaqa tiyapuwanraj Diospa allinninta parlanaypaj.

³ Noqaqa tukuy yachasqayta nisaj, Ruwawajniy mana qhasimantachu imatapis ruwasqanta rikuchinaypaj.

⁴ Cheqamanta palabrasneyqa mana llullachu, qanwan kashan tukuy imamanta cheqanta yachaj.

⁵ Diosqa may jina yachayniyoj, jatun atiyniyojtaj, mana juchayoj kajtaqa mana qhesachanchu.

⁶ Sajra runaj kausaynintaqa mana perdonanchu, wajcha runastarí allinta qhawarimun.

⁷ Cheqan kaj runastaqa imamantapis waqaychampuni, reyestapis kamachinankupi sumajta sayachin, allin uyarisqastaj kanqanku.

⁸ Sichus cadenaswan watasqas kashanku, nanaywan ñak'arispataj chayqa,

⁹ Diosqa rikuchin ima sajratachus ruwarqanku chayta, imaynatachus paykuna kikinku runaykachayninkuwan apachikusqankuta.

¹⁰ Chayta paykunaman parlan allinta k'amispa purichinampaj, mañanampajtaj amaña sajra ruwayninkuta ruwanankupaj.

¹¹ Sichus kasukunku, ruwankutaj imatachus nisqanta chayqa, sumaj imaswan kusikunku, sonqo tiyasqastaj kakunku, tukuy kausayninkupi.

¹² Sichus mana kasukunku chayqa, wañuspa sepulturaman uraykunku, manaraj paykuna allinta reparakushajtinku.

¹³ Sonqonkupi puraj uyasqa paykunallapajtaj k'ajaj phiñakuyta tantanku, presochasqasña kashaspapis mana yanapata mañakunkuchu.

¹⁴ Paykunaqa waynallaraj kashaspa wañuponqanku; uj p'enqayta tukukun kausayninkoqa.

¹⁵ Chay ñak'arisqannejta Diosqa salvan pichus ñak'arejta; chay nanayninnejta reparachin.

¹⁶ Qantapis may jatun llakiymanta orqhosunki, ashkha imasta qosunki; ni imamanta yuyarispataj kusisqa tiyakunki. Sumaj k'acha misk'i mikhunaswantaj mesaykiman junt'aykuchipusunki.

¹⁷ Qampi junt'akun sajra runaj jasut'isqa kananqa, manataj qanqa cheqanchasqa, juchachasqataj kaymanta ayqewajchu.

¹⁸ Allinta qhawakuy ama qolqewan lluk'ichikunaykipaj, ama ashkha qolqenejta apachikunaykipaj.

¹⁹ Llakiypeqa ni imamanta allinchu kasonqa qoriyki, nitaj qhaparikusqayki, nitaj may jina atiyniykipis.

²⁰ Ama ch'isiyananmantaqa llakikuychu, mayk'ajchus llajtaspis chinkarinku chaykunapi.

²¹ Kunanqa allinta qhawakuy amaña sajra ruwayman chayanaykipaj, qanqa chay jina ñak'ariykunawan chay jinataña ñak'arishanki.

²² Diospa jatun atiyninta sumajta qhaway. Imaraykuchus paymanqa ni ima yachachejpis jap'ikunchu.

²³ Mana pipis paytaqa kayta ruwan nispa imatapis kamachiyta atinchu, nitaj uyanchayta atinchu, qanqa mana allintachu ruwashanki, nispa.

²⁴ Yuyarikuy, tukuy runas Diospa ruwasqasninta jatunchasqankumanta, qampis yuyarikullaytaj chaykunata jatunchayta.

²⁵ Tukuy runas rikuyta atinku, karumanta qhawarillaspapis.

²⁶ Diosqa may jina jatun, noqanchejqa mana yachayta atisunmanchu, nitaj watasnintapis yupayta atisunmanchu.

²⁷ Payqa uj cheqaman yaku ch'aqaykunata jallch'an, chaytataj paraman tukuchin.

²⁸ Paraqa phuyusmanta jich'akamun, jallp'amantaj paraqa jich'akun.

²⁹ Pitaj yachanman imaraykuchus phuyus aysakusqankuta, imajtintaj qhon qhonkuna chay jinata sonanku patapiri?

³⁰ Diosqa lliuj lliujkunata mar qochaj patanta aysaykun, chaywantaj mar qochaj ukhunta pakaykuchin.

³¹ Ajinata chaywan runasta mikhuchin, ashkha mikhunastataj qon.

³² Phuyuswan intita pakaykuchin, nintaj mana k'anchananta; k'anchaytaj mana k'anchanchu paypa nisqanman jina.

³³ Qhon qhonqa Diosmanta willamun, para wayrataj sinch'i phiñakuyninta juchaj contranta rikuchin.