Job 35 - Qheshwa Biblia DC

Elioqa nillampuni

¹ Elioqa imatachus yuyasqanman jina nillarqapuni:

² Qanqa yuyankichu qampa nisqaykeqa cheqan kasqanta: noqaqa Diosmanta aswan cheqan kani, nispaqa?

³ Qanqa Diosman ninki: Ima dakusunki sichus noqa juchallikuni chayri? Juchasneyqa imanasunkitajri?

⁴ Kunanqa, chayman noqa kutichisqayki; chantaqa kausaqesniykimanwan.

⁵ Qhawariy janaj pachata; phuyusqa qanmanta aswan patapi kashanku.

⁶ Sichus qan juchallikunki chayqa, Diosta mana imananchu; may chhika juchallikusqaykipis paytaqa mana imananchu.

⁷ Sichus imatapis allinta ruwanki chayqa, imatataj qowaj paymanri? Paymanqa ni ima allintapis ruwashankichu.

⁸ Juchasniykeqa qan jina runasman mana allintachu ruwan, allin imasta ruwasqaykipis runasllaman allin ruwan.

⁹ Runasqa qhaparinku pipis anchakama ñak'arichejtillan, mask'ankutaj chay atiyniyojkunamanta pipis orqhonanta.

¹⁰ Mana pipis ninchu: Maypitaj kashan ruwawajniy Diosri?; pichus aswan laqhapi kallpata qowaj;

¹¹ Pay yuyaychawanchej, yachachiwanchejtaj animalesmanta, p'isqosmantapis astawanraj.

¹² Paykunaqa qhaparikunku, Diostaj mana uyarinchu, imaraykuchus paykunaqa sajra runas kanku, jatunchakojkunataj.

¹³ Tukuy Atiyniyoj Diosqa, llulla kajta mana kasuta ruwanchu.

¹⁴ Mana Diosta rikunichu nispapis, suyakullay, Payqa imastachus ruwasqasniykita rikunña.

¹⁵ Qanqa ninki Pay mana phiñakusqanta, nitaj jasut'isqanta, nitaj juchatapis anchata kasuta ruwasqanta.

¹⁶ Chaywampis, Job, kay imastaqa mana reparakuspalla nishanki, anchata parlashanki, mana allinta yuyaychakuspa.