Job 34 - Qheshwa Biblia DC

Elioqa Dios cheqan kasqanta nin

¹ Chanta Elioqa nerqa:

² Qankuna yachayniyojkuna, sumaj yachachisqastaj kajkuna, uyariwaychej kay palabrasniyta.

³ Ningreqa uyarispa yachan pejpa palabranchus kasqanta, jinallataj mallq'aqa rejsin ima q'apaychus kasqanta.

⁴ Ajinallatataj noqanchejpis allinta qhawarina kay imasta, kunantaj ninachej imachus noqanchejpaj allin kasqanta.

⁵ Jobqa nin: Noqaqa mana juchayojchu kani; Diosqa qonqapuwan noqata cheqanchawayta.

⁶ Juchayoj kani ninayqa uj llullakuy kanman; kay nanasqasneyqa mana thañinchu, noqataj mana juchachakunichu.

⁷ Mana pipis Job jinaqa kanchu, yakutapis ujyashanman jina, Diosmanta asirikun.

⁸ Payqa sajra runaswampuni tantakuyta munan, sajra runaswantaj purimpis.

⁹ Jobqa nin: Qhasi mana kajta runaqa purin, Diospi atienikuyta munaspaqa.

¹⁰ Qankuna, yachayniyoj runasqa, uyariwaychej; Ama yuyaychejchu Tukuy Atiyniyoj Dios, imastapis mana kajta ruwasqanta, chayri sajrata ruwasqanta.

¹¹ Payqa sapa uj runaman maychus ruwasqanman jina qopun; sapa ujmantaj purisqanman jina qopun.

¹² Cheqamanta Diosqa mana imatapis sajra kajtaqa ruwanchu, Tukuy Atiyniyojqa mana ima cheqan kajtapis q'ewichinchu.

¹³ Mundontinta kamachinampaj atiytaqa mana pimantachu jap'erqa.

¹⁴ Sichus Dios ujtawan samayninta runamanta qhechukapunman, kausaynin espirituntawan qhechupunman chayqa,

¹⁵ tukuy runas ujllapi wañurankuman, ujtawantaj runaqa kikin jallp'allamantaj tukunman.

¹⁶ Sichus qan yuyayniyoj kanki chayqa, uyariway; kay palabrasniyta allinta uyariway.

¹⁷ Sichus Dios cheqan kajta chejninman chayqa, mana kamachiyta atinmanchu. Qanqa chay jina mana juchayoj Dios juchachayta atiwajchu?

¹⁸ Sichus reyeswan, sumachaj runaswan sajra runas kanku chayqa, Dios paykunata uyanchan juchachakusqankumanta.

¹⁹ Payqa mana kamachejkuna jinachu, mana qhapaj runasllamanchu, nitaj wajcha runasllamanchu sayakun, imaraykuchus paymin tukuyninkuta ruwarqa.

²⁰ Runasqa uj ñawi ch'ipejpi wañunku, khuskan tutata; runasqa mayta ch'ajwanku, chinkapunkutaj; atiyniyoj kajqa uj ratollapi chinkachisqa karqa.

²¹ Diosqa sumajta qhawan imaynatachus runa purisqanta, rejsintaj ima rijch'ajtachus purisqankuta.

²² Mana kanchu laqha, nitaj wañuy laqhapis, chaypi millayta ruwaj sajra runa pakakunampajqa.

²³ Diosqa runamanta imachus cheqan kajmantaqa mana astawan mañanchu, Dioswan juiciopi tinkunankupaj.

²⁴ Atiyniyoj runasta urmachinampajqa mana pitapis tapunrajchu; wajkunatataj chay runaspa kanankuman churaykonqa.

²⁵ Diosqa yachallan ima ruwasqankutapis, chaynejta ch'isin chayamun, chinkachintaj.

²⁶ Payqa runa wañuchista jina jasut'in, tukuy runaj rikunanta.

²⁷ Paykuna mana ima nisqantapis kasusqankurayku, nitaj Paypa munasqanman jina purisqankurayku.

²⁸ Paykunaqa chayta ruwaspa wajchaspa waqayninta, pisichikojkunaj waqayninta ima Diosman uyaricherqanku, Diostaj chay wajchasta uyarerqa.

²⁹ Sichus Dios samarikun chayqa, pitaj Payta juchachanqari? Sichus uyanta pakaykun chayqa, pitaj Payta qhawarenqari? Payqa tukuy nacionesta qhawamushan, jinallataj sapa uj runaj ruwasqasnintapis.

³⁰ Chayta qhawamushan ama ima sajra runapis nacionesta kamachinampaj, nitaj ch'aukiyanampaj.

³¹ Diosmanchu nerqanki?: Noqaqa mana allintachu ruwarqani; kunanqa manaña juchallikusajñachu, nispa.

³² Imatachus mana rikusqayta rikuchiway, sichus mana allinta ruwarqani chayqa, manaña ujtawan ruwasajchu.

³³ Qanqa Dios t'inkachisunantachu munanki, imaynatachus qan munasqaykiman jina, payta chay jinata qhesachashajtiykipis? Kaytaqa qampuni jina kananta ninki, mana noqachu, niwayku imatachus yachasqaykita.

³⁴ Yachayniyoj runas noqata uyariwajkuna, sumaj yuyayniyojkuna runaspis niwanqanku:

³⁵ Jobqa mana yachaspalla imatapis parlashan; palabrasnenqa qhasi manakajlla.

³⁶ Jobta allinta qhawarichunku imatachus parlasqasninta, imatachus kutichisusqasnenqa uj sajra runaj palabrasninman rijch'akun.

³⁷ Jobqa mana juchasapallachu, manachayqa Diospa contranta oqharikun; noqaykoj ñaupaqeykupi Diosmanta asirikun, Paywantaj mayta siminakun.