Job 33 - Qheshwa Biblia DC

Elioqa maytapuni Jobta k'amin

¹ Chayrayku, Job, uyariwan kay parlasqasniyta, sumajtataj unanchay imastachus nisusqasniyta.

² Kunanqa noqañataj parlarisaj, simeyqa mallq'aymantapacha parlarimonqa.

³ Noqaqa cheqamanta parlasaj, imatachus yuyasqayta cheqanta nisaj.

⁴ Tukuy Atiyniyoj Dios noqataqa ruwawarqa, samaynintaj kausayta qowarqa.

⁵ Kutichiway sichus atinki chayqa; sumajta wakichikuy, niwaytaj.

⁶ Qanwan noqawanqa uj rejlla kanchej Diospa ñaupaqempi, noqapis t'urumanta ruwasqallataj karqani.

⁷ Ajinaqa mana qanqa manchachikunawayki kanchu, mana imatachus ruway nisqaytapunichu ruwanki.

⁸ Cheqamanta noqaqa nejta uyarerqayki, chay palabrasniykipitaj nerqanki:

⁹ Noqaqa llimphu kani mana juchayoj, mana noqaqa ni imapi juchallikunichu.

¹⁰ Diospuni imaymana ch'ataykunasta mask'apuwan, enemigonta jinataj qhawawan.

¹¹ Cadenasta chakisniyman churawan, sapa thaskisqaytataj sumajta qhawawan.

¹² Qhaway: Kayta nispaqa mana cheqantachu ninki, Diosqa runamanta aswan jatun atiyniyojpuni.

¹³ Imaraykutaj qan Payman jinata uyampi ninkiri, mana ni ima parlasqaykita kutichisojtinchu jinata ninki?

¹⁴ Diosqa tukuy imaynamanta parlapayawanchej, noqanchejtaj mana reparakunchejchu.

¹⁵ Wakin kutispeqa ch'isin runaman parlan mosqoypi, chayri mosqoypi jina, runas puñojtinkuña, misk'ejta puñushajtinku.

¹⁶ Diosqa runaspa ningrinman parlan; k'amiywan manchachikuywantaj junt'achin.

¹⁷ Mana allin ruwasqasninmanta chay runata t'aqanampaj, ama anchata jatunchakunampaj.

¹⁸ Ajinata sepulturamanta jark'an, wañuymanta salvan.

¹⁹ Wakin kutispi Diosqa runata onqoykunanejta reparachin, tukuy ukhunta sinch'ita nanachispa.

²⁰ May jina sumaj kashajtimpis mikhuykunasta millachichin, sumajta mikhuykunapaj kashajtimpis millachikullampuni.

²¹ Astawan astawan tulluyashan, tullusnimpis rikhurimushanña.

²² Kausaynin sepulturamanña qayllaykushan, wañuy patapiña kashan.

²³ Sichus runaj qayllampi uj ángel kanman, waranqamanta ujllapis paypa allinninta parlanman, willanmantaj imachus ruwanan kasqanta,

²⁴ paymanta Dios khuyakusqanta willanman, wañuymanta orqhosqanta, payta salvasqanta.

²⁵ Chaymanta ukhonqa kutenqa wawaj aychanmantapis astawan, imaynachus wayna kashaspa karqa chay kikinman.

²⁶ Diosmanta mañakonqa, Paytaj uyarenqa; kusiywan Diostaqa uyapura qhawarenqa, runasmantaj Diospa khuyakuyninta willanqa.

²⁷ Chay runataj nenqa: Juchachakuni, mana cheqan kajta ruwani; Diostaj chay jina kashajtiy mana juchayman jinachu jasut'iwan.

²⁸ Payqa wañuymanta salvawarqa, kunantaj k'anchayta rikuniraj.

²⁹ Ajinata Diosqa runamanta yuyarikun, iskay kutikama, chayri kinsa kutikama,

³⁰ wañuymanta runataqa salvan, k'anchayta rikojta saqenraj.

³¹ Job, kaytaqa allinta uyariway, parlanaykamaqa ch'inlla kakuy.

³² Sichus imata parlayta munanki chayqa, parlay; sichus cheqanta parlanki chayqa, chay nisqaykiman jina kachun.

³³ Mana tiyapusunkichu parlanaykipaj chayqa, ch'inllamanta uyariway, noqa yachachisqayki sumaj yachayniyoj kayta.