Job 31 - Qheshwa Biblia DC

Jobqa nin cheqampuni kasqanta

¹ Noqa churanoqarqani, ama doncella warmita qhawapayanayta.

² Kunanqa, ima t'inkatataj Diosqa patamanta jaywamuwanmanri?; ima chayaqetataj Tukuy Atiyniyoj Dios qomuwanmanri?

³ Kay jina llakiykunataqa manachu sajra runas, juchasapas ima jap'inanku mayta ñak'arispa?

⁴ Chayri Diosqa manachu imatachus ruwasqayta rikumuwan, nitaj qhawamuwanchu imaynatachus purisqaytaqa?

⁵ Sichus llullakuspa purerqani, chakiypa apurayta ch'aukiyanampaj purej chayqa,

⁶ cheqanchana pesaspi Diosqa pesawachun ari; chaypi yachanki juchayojchus kani manachus chayta.

⁷ Sichus cheqan kaj ñanmanta wist'uykuni, sichus ñawiypa rikusqanwan apachikuni, makiypitaj wajpa imasnin rikhurin chayqa,

⁸ imatachus tarpusqayta wajkuna mikhuchunku, imatachus tarpusqaypis saphimanta t'irasqa kachun.

⁹ Sichus uj warmiwan sonqoyta suwachikuni chayqa, chayri qayllaypi tiyakojpa warmintachus wateqakuni chayqa,

¹⁰ warmiy waj runaj kamachin kachun, wajkunataj warmiywan puñuykuchunku,

¹¹ chay jina sajrata ruwaspaqa juchallikuyman karqa, juecestaj chaytaqa jasut'ispa cheqanchankuman.

¹² Chayqa nina jap'ikuspa imatapis q'olarparin jina kanman, imay kajtapis tukuyninta tukuchipuwanman.

¹³ Maypachachus kamachisniy imatapis mañakuwaj kanku chaypacha, paykunata uyarejpuni kani.

¹⁴ Mana jina kajtenqa imaynamantataj Diospa ñaupaqenman riyman karqari?

¹⁵ Uj k'ata Dioslla mamasniykojpa wijsampi ruwawarqayku, kausaytapis qowarqayku, paykunaman, jinallataj noqamampis.

¹⁶ Mana mayk'ajpis noqaqa qonqapunichu pisichikoj wajcha runasta khuyayta, nitaj qhawallajchu kani viudas yarqhaymanta wañunankuta.

¹⁷ Ni jayk'aj mikhunaytaqa sapallay mikhuykojchu kani, wajcha runaman mana qorispaqa.

¹⁸ Wajchaspaj wasiypeqa tata jina karqani, wawa kasqaymantapacha warmi sapasta yanapallajpuni kani.

¹⁹ Pichus p'achan pisi kajtin chirimanta wañushajtin, chayri pejpatachus mana p'achan kapojchu qhataykukunampaj chayqa,

²⁰ kikin ovejasniypa millmasninwan q'oñichej kani, paytaj mayta agradecekuspa qhepakoj.

²¹ Ni jayk'aj wajcha wawapaj makiyta oqharejchu kani, noqa juecesniyoj kasqayraykoqa.

²² Kay mana cheqachu chayqa, makisniy p'akikuchun, lijraymanta urmapuchun.

²³ Imaraykuchus Diospa jasut'iyninta mayta manchachikoj kani, chay jina atiynimpa contrampajqa mana atiyniy kanchu.

²⁴ Mana qoripeqa atienikojchu kani, nitaj nejchu kani: Qan kanki noqay atienikunayqa, nispa.

²⁵ Manapuni noqaqa kusikojchu kani ashkha kapuyniyoj kaspa, nitaj ashkhata qolqeta tariyta munaspapis.

²⁶ Noqa rikorqani intita sumajta k'anchamushajta, killatapis sumajta k'ancharispa rishajta.

²⁷ Chaykunataqa ni jayk'aj yupaychanichu, nitaj makillaywampis much'aykusqayta apachinichu.

²⁸ Jina kajtenqa jasut'ita jap'inaypuni karqa, janaj pachapi kaj Diosta qhesachasqayrayku.

²⁹ Ni mayk'aj kusikunichu enemigoy llakiypi kashajtin, nitaj payman ima sajra chayajtimpis kusipayanichu.

³⁰ Ni mayk'aj maldicinichu, ni wañunallantapis munanichu.

³¹ Kamachisneyqa nej kanku: Pitaj aychanwan mana sajsakunchu?, nispa.

³² Karu llajtayojtaqa mana uj ch'isillatapis jawapi puñuchejchu kani; wasi punkoyqa paykunapaj kichasqapuni kaj.

³³ Ni jayk'aj pakajchu kani ima juchallikusqaytapis, imaynatachus wajkuna ruwanku jinataqa, ni pakayllapipis jap'ejchu kani.

³⁴ Runasta manchachikusqayrayku, paykuna qhesachanawankuta, wasiyllapi wisq'asqa ch'inmanta mana kakojchu kani.

³⁵ Pitaj nenqa, pipis uyarinawantari! Atienikusqay Tukuy Atiyniyoj noqamanta parlanqa, enemigoy ch'ataykushawajtimpis.

³⁶ Chaykunata lijrarikusaj, pilluta jinataj churakusaj.

³⁷ Diosman cuentata qosaj chay tukuy ruwasqasniymanta, kuraj runa jina payman qayllaykusaj.

³⁸ Jallp'asneyqa mana contraytachu qhaparinku, nitaj surk'asnimpis waqankuchu.

³⁹ Sichus pimanta chajrasninta suwarqani chayqa, chayri campo runastachus ch'aukiyarqani chayqa,

⁴⁰ jallp'asniy trigota poqonanmanta khishkasta poqochunku, cebadaj cuentanmantapis, sajra qhorasllata poqochunku. Jobpa nisqasnin kaypi tukukun.