Job 30 - Qheshwa Biblia DCJob llakikun imaynachus kasqanmanta 1 Kunanqa, noqamanta aswan wayna kajkuna asikuwanku, chaykunaj tatasninkuta noqaqa mana jap'iymanchu karqa, uywasniyta qhawaj alqoswan kanankupajpis. 2 Paykunaqa kallpankuwan mana imatapis ruwapuwankumanchu karqa. Paykunaqa mana kallpayoj ch'uchali runas karqanku. 3 Mana imankupis kasqanrayku, yarqhaywan sapanku purej kanku; paykunaqa ayqerqanku uj ch'innejman manchachinkuna jina cheqaman, uj manakaj ch'in t'ojra cheqamantaj. 4 Khishka ukhusmanta qhorasta pallakoj kanku, retama sach'aj saphisnintataj mikhoj kanku. 5 Paykunaqa tukuy runaspa chejnisqasnin karqanku; tukuy runastaj suwasta jina qhaparispa qhatiykachaj kanku. 6 Chaynejta qaqa jusk'uspi tiyakoj kanku, wakintaj larqaspi, chhanka jusk'uspi ima. 7 T'ankara uraspi alqo jina qhaparej kanku, khishka sach'as urapi tantakoj kanku. 8 Mana imata yachaj runas, ni pejpa wawasnin, manataj chay jallp'api tiyakunankupaj jinachu kanku. 9 Kunantaj paykunaqa alqochakuwanku, noqamanta chanzata parlarispa mayta asirikunku. 10 Noqata millachikuwaspa karunchakunku, uyaypi ima thoqaykuwanku. 11 Kunanqa kay jina mana imayojta rikuspa, Dios llakiyta qowajtin, ni uj chhikanta kasuta ruwawankuchu. 12 Qayllayman may chhika tantaykakamunku, tanqaspa urmachiyta munawanku, sinrullataj muyuykamuwanku, wañuchiytataj munawanku. 13 Ñanniyta wisq'aykunku, kay jina llakiypi kajta rikuwaspa, ni pipis paykunataqa jap'iykoj kanchu. 14 Uj jatun punku kicharisqata jina juyñamuwanku, tukuy kallpankuwan patayman wijch'uykakamunku llakisqa kashajtiy. 15 Sinch'i manchachikuy noqaman jamuwan, allin kayneyqa wayra jina ripun, ima kajpis phuyu jinalla chinkaripun. 16 Kunanqa, manaña kausanaypaj jinachu kani, ima p'unchayis llakiyllaña noqapajqa. 17 Sapa ch'isi kay nanayqa tulluykama nanachiwan, mana samariyniyojtataj jap'iwan. 18 Diosqa ujllata kunkaymanta jap'iwan, tukuy kallpanwantaj p'achaymanta thalanoqawan. 19 T'uruman wijch'uykuwan, ñut'u jallp'apis, chayri qhelli ushphapis kayman jina. 20 Qanmanta, Diosníy, mañakuyki manataj uyariwankichu, qanman qayllamuyki nitaj uyarillawankipischu. 21 Qanqa noqapaj may phiñasqa kanki. Makiykej atiyninwan qhatiykachawanki. 22 Qanqa qhawallawanki wayra apanawanta, sajra para wayra apaykachanawanta. 23 Noqa yachani qanqa wañuykama apanawaykita, tukuy kausajkuna wañuspa maymanchus rinanku kashan chayman. 24 Noqaqa manachu wajchata yanaparqani, manachu llakiyninmanta orqhorqani? 25 Manachu noqaqa pichus ñak'arejpaj waqaporqani, manachu pichus pisichikojtapis khuyarqani? 26 Allin kajta suyashajtiy, mana allin kajlla jamuwan, k'anchayta suyashajtiy, laqhayaylla chayamuwan. 27 Sonqoyqa phawashanña mana samarikusqayrayku; llakiy p'unchaykunalla jamuwan. 28 Mana intej yanayachisqallan yanayasqa purini, qhaparispataj tukuymanta yanapata mañakuni. 29 Atojkunaspa wauqenman tukuni, surispa wauqenman ima. 30 Ukhuypis yanaman tukun, tukuy ukhuy q'oñi onqoyman k'ajarishan. 31 Arpaspa waqasqan, qenaspa waqasqan ima noqapajqa, llakiyta waqayman tukun. |
Qheshwa Biblia DC © Sociedades Bíblicas Unidas, 1986.
United Bible Societies