Job 29 - Qheshwa Biblia DC

Jobqa kay kutitawan kutichikun Job

¹ Jobqa uj kutitawan kutichikorqa, nispa:

² Allinchá kanman noqapajqa chay ñaupaj watasman kutirinayqa, mayqan p'unchaykunapichus Dios waqaychawarqa chayman!

³ Maypachachus Diosqa k'anchayninwan k'anchamuwarqa, chaypacha chay k'anchayqa laqhapi purichiwarqa.

⁴ Mayk'ajchus wayna kashajtiy, Diosqa wasiyta waqaychapuwaj.

⁵ Maypachachus Tukuy Atiyniyoj noqawan kashajtin, wawasniypis noqawan tiyakushajtinku.

⁶ Ñaupaqeyta leche yaku jina correshajtin, chhankasmanta aceiteqa mayu yakus jina surumorqa.

⁷ Llajta runas maypichus cheqanchanankupaj tantakoj kanku, chayman rispa, paykuna chaupipi tiyarikojtiy.

⁸ Waynakunaqa chaypi tiyashajta rikuwaspa wajnejllata qhawaj kanku, machu runaspis rikuwaytawan sayarikoj kanku.

⁹ Kuraj runaspis parlashaspa ch'inyapoj kanku, señaswan ch'inyachinakoj kanku.

¹⁰ Kamachejkunapis parlashaspa ch'inyakoj kanku, qallusninkupis siminkuman k'askaykapoj.

¹¹ Runaqa rikuwaytawan, chayri uyariytawan, sumaj pacha nispa, k'achamanta parlapayawaj kanku.

¹² Noqaqa qhaparikushaj wajcha runata libraj kani; mana piniyoj wajcha wawata yanapaj kani.

¹³ Pichus chinkapunampaj jinaña kasharqa chay runa agradecekuwarqa, viudasqa paykunata yanapajtiy mayta kusikorqanku.

¹⁴ Cheqanta ruwaywan, cheqan kajwantaj p'achallisqa karqani, tukuy kausayniypi.

¹⁵ Noqa karqani ciegospa ñawisnin, cojospatapis chakisnin karqani.

¹⁶ Pisichikojkunaj tatanku karqani, karu llajtayojkunaj jark'ajnin karqani.

¹⁷ Sajra runaspa k'akisninta p'akej kani, jap'isqankuta kirusninkumanta qhechoj kani.

¹⁸ Noqa yuyarqani: Diosneyqa mayu t'iyu jina kanqa, achachi wañupusaj, kikin wasiypitaj, nispa.

¹⁹ Yaku cantopi wiñaj sach'a jina kani; chay ramasninmantaj ch'isin chhulla urmamun jina.

²⁰ Noqa mentasqa kasqayqa noqawan khuska mosojyasqa kanqa, kallpaypis mana pisiwanqachu.

²¹ Tukuy uyariwaj kanku, ch'inllamanta uyariwaj kanku imatachus yuyaychasqasniyta.

²² Noqa parlasqaymantaqa, mana pipis astawan parlajchu, palabrasneyqa paykunaman yaku jina sut'umoj.

²³ Paykunaqa mayta suyawaj kanku noqata uyarinawankupaj, imaynatachus parata suyanku q'oñi tiempopi ajinata.

²⁴ Maypachachus asirejtiy, paykunaqa ñak'ayllata creewaj kanku, mana sayk'ojchu kanku uyayta kusisqa qhawawayta.

²⁵ Noqaqa paykunata sumajta kamachej kani, nejtaj kani imatachus ruwanankuta, uj rey jina soldadosnimpa ñaupaqempi; paykuna llakisqas kashajtinku, paykunata sonqochaj kani.