Job 27 - Qheshwa Biblia DC

Jobqa willan sajra runaspa jasut'iyninmanta Job

¹ Jobqa parlaspallapuni nerqa:

² Kausashaj Diosrayku jurani, Pay noqaj cheqan kayniyta qhechuwan, astawantaj Tukuy Atiyniyojqa almayta llakichin.

³ Almay noqawan kanankamaqa, Diospa samaynin senqaypi kanankamaqa,

⁴ simeyqa manapuni ima juchatapis parlanqachu, nitaj qalluypis ima llullatapis parlanqachu.

⁵ Noqa kausanaykamaqa nillasajpuni mana ima juchayoj kasqayta; mana saqesqaykichejchu qankuna qhasimanta juchachanawaykichejta.

⁶ Noqaqa nillasqaykichejpuni cheqan runa kasqayta, mana imapis kanchu jinamanta juchachakunaypaj.

⁷ Tukuy enemigosniy kasqankuta sut'inchakojkuna, sajra, juchasapas jina kachunku.

⁸ Imatataj chay jina juchasapaqa suyanqari, Dios kausayninta qhechojtinri?

⁹ Llakiykunapi rikhurejtimpis, Diosqa mana uyarenqachu mañakusqasninta.

¹⁰ Chay jina runaqa mana kusiyta tarenqachu Tukuy Atiyniyojpi, nitaj mayk'allapis paymanta mañakunchu.

¹¹ Noqa rikuchisqaykichej Diospa jatun atiyninta, Tukuy Atiyniyoj imastachus ruwanampaj wakichisqasninta.

¹² Sichus qankuna chay imasta rikunkichejña chayqa, imaraykutaj ninkichej qhasi mana kajkunatari?

Zofar

¹³ Tukuy Atiyniyoj Diospa jasut'iynenqa kaymin, tukuy mana khuyakuyniyoj, sajra runaspajwan:

¹⁴ Wawasninkupis ashkha kachumpis, chaykunaqa espadawan wañonqankupuni, juch'uy wawasninkupis mana imawan sajsayta atenqankuchu.

¹⁵ Kausashaj qhepakojkunaqa sajra onqoywan wañuranqanku, viudasninkutaj mana waqallanqankupischu.

¹⁶ Sajra runaqa jallp'ata jinapis qolqeta tantachun, p'achatapis ashkhata tantachumpis,

¹⁷ chaytaqa, pichus cheqanta ruwaj runa p'achallikonqa, qolqentapis mana juchayoj runa jap'ikaponqa.

¹⁸ Sajra runaj wasenqa thuta khuroj thapan jinalla, chajrata qhawajkunaj ch'ujllan jina.

¹⁹ Sajra runaqa qhapaj kashaspa puñuykonqa, rijch'arinampajtaj, mana ima kapuynimpis kanqanku.

²⁰ P'unchaypis payqa manchachikullanqaña, sajra para wayrataj uj tutalla chinkachenqa.

²¹ Inti llojsimuynejmanta jamoj sinch'i muyoj wayra wasinmanta orqhonqa.

²² Chay runaj contranta mana khuyakuspa Diospa wayranqa, ayqeshajtimpis jap'illanqapuni.

²³ Wayraqa qhatiykachanqa manchayta wayraspa, sonaspataj.