Job 26 - Qheshwa Biblia DC

Jobqa Diospa jatun kayninta sut'inchan Job

¹ Jobqa kutichispa nerqa:

² Imaynapitaj qan yanapanki mana atiyniyojtari, mana kallpayojta imaynapitaj oqharinkiri?

³ Imaynatataj qan yuyaychanki mana yachayniyojtari, ima yachaytataj qan yachachinki chay mana yachajmanri?

⁴ Pimantaj qan parlarqankiri, pitaj qanman chay jinata yuyaychasunki jinata parlanaykipajri?

Bildad

⁵ Wañusqas ukhu mar qochapi kajkuna, manchachikuywan chay ukhupi kharkatitinku.

⁶ Wañuypa reinon sepulturaqa, Diospaj mana pakanchu ima mana rikukojtapis.

⁷ Diosqa janaj pachata sayachin ch'usaj kaj patapi. Jallp'ata mana imallaman warkhuykun.

⁸ Payqa yakusta phuyusninman churan, phuyusqa chay llasa yakuswan mana llik'ikunkuchu.

⁹ Mosoj killaj uyanta laqhayaykuchin, uj phuyuwantaj khataykun.

¹⁰ Mar qocha pataman mojonta jina churan, maypichus k'anchaywan laqhayaywan inkushanku chayta.

¹¹ Dios mancharichejtinkama manchariywan kharkatitinku, may orqosmanchus janaj pacha arrimasqa kashan chaykuna.

¹² Payqa mar qochata atiyninwan kuyuchin, mar qochapi manchachikuna Rahabta yachayninwan atipan.

¹³ Ujta phukuspa janaj pachata picharparin, makinwan q'allpispa chay llusp'iy katarita wañuchin.

¹⁴ Chayqa ruwanasninmanta uj chhikallan, imatachus uyarisqanchejqa chhichiy jinalla. Pitaj chay jina atiyniyoj qhon qhonnintaqa unanchanmanri?