Job 23 - Qheshwa Biblia DC

Jobqa Diosman willakuyta munan Job

¹ Jobqa kutichispa nerqa:

² Kunan ujtawan llakiywan parlarisaj; sarnayqa waqayniymanta astawan nanan.

³ Allin kanman yachanay maypichus Dios kasqanta, noqataj riyman maypichus Pay tiyakun chaykama!

⁴ Payman imaynachus kasqayta rikuchimuyman, noqataj atisqayman jina Payman willakamuyman.

⁵ Chaypi yachayman imatachus Pay kutichinawanta; yachaymantaj imatachus Pay niwasqanta.

⁶ Diosqa mana atiyninwanchu parlawanman; manachayqa allillanta uyariwanman.

⁷ Payqa niwanman noqa cheqampi kasqayta, Payqa cheqanchawanman, noqatataj wiñaypaj kacharipuwanman.

⁸ Inti llojsimuynejpi mask'amusaj Diosta, manataj chaypi tarisajchu; inti yaykuypi Diosta mask'amusaj, chaypipis manallataj tarisajchu.

⁹ Patanejta mask'amusaj, manataj tarimusajchu, uranejta mask'amusaj, chaypipis manallataj rikumusajchu.

¹⁰ Chaywampis Pay rejsin sapa thaskisqayta; Pay noqata qhawariwanqa, ch'uya qori jinataj llojsisaj.

¹¹ Noqaqa mana pantaspa payllatapuni qhatini, ima ñantachus Pay purinayta rikuchiwan chayta.

¹² Noqaqa leyesninta, kamachiykunasnintawan junt'anipuni, manataj noqaj nisqaytachu ruwani.

¹³ Imallatapis Pay ruwasaj nin chayqa, ruwampuni, nitaj imapis uj jinayachinchu yuyasqantaqa.

¹⁴ Imatachus noqawan ruwayta munan chayqa, ruwanqapuni, imastachus kayman rijch'akojkunata ruwanan karqa chaykunatawan khuska.

¹⁵ Chayrayku Payta manchachikuni; chayta yuyajteyqa astawan manchachikuni.

¹⁶ Dios, Tukuy Atiyniyojqa, may manchasqata jap'iwan.

¹⁷ Allin kanman tuta chinkachinawan, laqhayaytaj mayt'uykunawan.