Job 21 - Qheshwa Biblia DC

Job nin sajra runas astawan qhapajyasqankuta Job

¹ Chaymanta Jobqa kutichispa nerqa:

² Sumaj kusiyta qonawaykichejqa, kay palabrasniyta uyariykichej.

³ Suyariwaychej parlanaykama, chaymanta munaspaqa asipayawaychejpis.

⁴ Noqaqa mana pi runawanchu quejakushani, chayrayku mana jinalla kakuyta atinichu.

⁵ Sichus allinta uyariwankichej chayqa, opapacha t'ukushaj qhepakunkichej.

⁶ Noqa kikiy chayta yuyarispa t'ukuni, ukhuypis mayta kharkatitin.

⁷ Imaraykutaj juchasapas kausallankupuniri, machuyankutaj tukuy ima kapuyniyojri?

⁸ Paykunaj wawasninku, allchhisninku imaqa, paykunaj rikunankuta sumajta wiñanku.

⁹ Wasisninkupi kusiytaqa ni imapis qhechoj kanchu, Diosqa paykunata mana jasut'inchu.

¹⁰ Wawasninkupis mirallankupuni, china wakasninkupis mana jayk'aj sullunchu.

¹¹ Wawasninkoqa kusisqas phinkiykachanku, uña ovejitas jina mayta phujllaspa.

¹² May kusisqas phinkirispa tusunku, tocarispa cajata, guitarrata, qenata ima.

¹³ Tukuy kausayninkupi qhapajyanku; allin kusisqas sepulturaman uraykunku.

¹⁴ Paykunaqa Diosman ninku: Noqaykumanta ithirikuy, mana munaykuchu ñankunasniykita rejsiyta.

¹⁵ Pitaj kasqa chay jina Tukuy Atiyniyojri, Paypa kamachisqanta ruwanaykupajri? Imatá noqayku jap'isqayku paypa ñaupaqempi mañakuspari?

¹⁶ Sajra runasqa mana dueñochu kanku allin kayninkumanta; juchasapaspa yuyaychayninkoqa noqamanta karupi kachun.

¹⁷ Mayk'ajtaj sajra runaspa k'anchaynin wañuporqari? Mayk'ajtaj llakiyman urmarqankuri? Mayk'ajtaj Dios paykunapaj mayta phiñakuspa ñak'aricherqari?

¹⁸ Mayk'ajtaj paykuna paja jina t'aqasqas kasqankuri, muyoj wayra jamuytawan apan jinari?

¹⁹ Paykunaj sajra ruwasqankumanta, Diosqa wawasninkupajchu jasut'iyta jallch'anqa?; mana paykunallatataj jasut'enqa yachanankupaj?

²⁰ Paypuni jasut'iytaqa jap'inan ari, chay Tukuy Atiyniyojpa sinch'i phiñakuyninta.

²¹ Ima payman dakonqari imapis kachun ayllunwanri, wañusqanmanta qhepamanri?

²² Chanta, pitaj Diosman yachachenqa, pichus janaj pachapi tiyakojkunata cheqanchajtari?

²³ Wakenqa wañunku sumaj kallpankupi, kusisqas, mana imanasqas.

²⁴ Sumaj wirayasqas, tullusninkupis chilinawan junt'a junt'alla.

²⁵ Wakinri may llakiypi kausanku, wañupunkutaj mana ujllatapis misk'ejta mikhuykuspa.

²⁶ Chay tukuywampis jallp'a ukhupeqa uj rejlla kanku, khuruspis iskayninkuta mikhunku uj rejta.

²⁷ Noqa yachani imatachus qankuna yuyasqaykichejta noqamanta, sajra yuyaykuna tiyapususqaykichejtapis.

²⁸ Qankunaqa tapukunkichej, maypitaj kunan chay kuraj runaj wasinri, chay sajra runaspa wasin imari?

²⁹ Manachu qankunaqa chay ñanta rejkunata tapukunkichej? Manachu paykuna imastachus willakunku chayta uyarinkichej?

³⁰ Maypachachus Dios phiñakun chayqa llakiykunata apachimun, sajra runatataj ni imapis pasanchu.

³¹ Ni pipis kanchu sajra purisqankuta uyankupi nej; ni pipis kanchu chay juchankuman jina jasut'ej.

³² Sepulturasman apasqas kanqanku, chay p'ampakusqanku patapi k'anchasqas kanqanku.

³³ Vallepi manchachiykunaqa paykunapaj misk'iwan ninakun. Tukuy runas p'ampakuyninman riysenqanku, wakin qhepanta wakintaj ñaupajninta.

³⁴ Qankuna sonqochayta munawashankichej chayqa qhasi manakaj! Tukuy parlasqaykichejqa llullalla!