Job 20 - Qheshwa Biblia DC

Zofarqa rikuchin sajrakunaj llakiykunasninkuta Zofar

¹ Naamatmanta Zofarqa kutichispa nerqa:

² Cheqamanta unanchasqasneyqa parlachiwanku; chayrayku kunanqa kutichisqayki:

³ Qan k'amiwanki, chaytaj noqapajqa mana allinchu, kunantaj yupaychakuspa yachaniña imaynatachus kutichisunayta.

⁴ Qan yachanki unaymanta ajinapuni kasqanta, kay jallp'a patapi runa kasqanmantapacha.

⁵ Sajra runaspa kusikuynenqa pisi tiempollapaj, juchasapaj kusikuynenqa uj ratolla.

⁶ Machuykachasqan janaj pachakama chayajtin, umampis phuyukama oqharikojtin,

⁷ wanun jina ujllata wiñaypaj chinkanqa. Kausaqesnenqa mana yachanqankuchu maypichus kasqanta.

⁸ Mosqoy jina chinkaponqa, tuta mosqoypi rikuspa jinalla chinkanqa, nitaj pipis tariyta atenqachu.

⁹ Pichus paywan tiyashaspa rikojqa, manaña jayk'ajpis ujtawan rikonqachu. May cheqapichus tiyakoj chay cheqapis manaña ujtawan rejsenqachu.

¹⁰ Wawasnillanña wajcha runasman kutichiponqanku, imatachus pay suwarqa chayta.

¹¹ Wayna kashaspa imaynachus kallpayoj karqa, kikimpacha sepulturaman yaykonqa.

¹² Sichus sajra kajqa siminta misk'iyacherqa, qallun urapitaj pakaykorqa,

¹³ allin rijch'arqa, manataj saqerqachu, manachayqa mallq'allampi jap'erqa chayqa,

¹⁴ wijsampi mikhusqasnin waj jinaman tukonqa, katari veneno jina ukhumpi kanqa.

¹⁵ Qhapaj mikhusqasninta ajtonqa, Dios orqhonqa chaykunata wijsanmanta.

¹⁶ Katarej venenonta ch'unkanqa, chayllataj payta wañuchenqa.

¹⁷ Manaña payqa rikonqañachu sumaj ashkha imasta, lechewan, misk'iwan mayu jina correshajta.

¹⁸ Kutichipunan tiyan tukuy qhapajyay jap'isqasninta, manaña mikhonqachu, nitaj kusikonqachu chaykunawan.

¹⁹ Wajchasmanta qhechuspa mana imayojta saqerqa, jap'ikaporqa mana ruwasqan wasista.

²⁰ Mana mayk'ajpis sajsayta aterqachu, nitaj imapis librakojchu paypa makinmanta.

²¹ Ni imapis qhepakorqanku mana mikhusqanqa, chayrayku chay allin kaynenqa mana unaypajchu kanqa.

²² Astawan imasnimpis ashkha kajtenqa, astawan mana kusiyniyoj kanqa; tukuy sajra runaspa makin paypa patanman jamonqanku.

²³ Maypachachus sajsaykojtinkama, Dios apachimonqa paypa patanman sinch'i phiñakuyninta. Chay phiñakuyta paypa patanman parachimonqa, jinallataj mikhuyninmampis.

²⁴ Fierro armasmanta ayqenqa, uj bronce flechawantaj jap'irpachenqanku.

²⁵ Chay flechaqa ukhunta pasarparenqa, chay puntan llojsenqa jayaq'en chaynejta; chaytaj astawan manchaykuchenqa.

²⁶ Uj sinch'i laqhayaytaj payta pakaykonqa; ni pejpa jap'ichisqan nina payta q'olarparenqa, jinallataj wasimpi imasninchus kajtapis q'olaykonqa.

²⁷ Janaj pacha paypa juchasninta rikhurichenqa, jallp'ataj astawan ch'ataykonqa payta.

²⁸ Diospa phiñakuynin mayu chayamoj jina payman jamojtin, tukuy kapuyninta apakaponqa.

²⁹ Kayta Diosqa waqaychan sajra runaspaj; chay chayaqeta Diosqa paykunapaj wakichin.