Job 19 - Qheshwa Biblia DC

Jobqa suyan Dios cheqampaj qhawananta Job

¹ Jobqa kutichispa nerqa:

² Mayk'ajkamataj umayta nanachiwankichejri, palabrasniykichejwantaj t'unawankichejri?

³ Ñapis chunka kutitaña k'amiwankichej, manachu chay jinata k'amiwaytaqa p'enqakunkichej?

⁴ Cheqamanta juchallikuni chaypis, juchayqa noqaj patallaymantaj urmamonqa.

⁵ Qankunaqa creenkichej noqamanta aswan sumaj kasqaykichejta, imachus kasqaytataj uyaypi niwankichej.

⁶ Kunanqa yachaychej allinta, Diospuni noqataqa urmachiwan; paymin noqataqa tojllampi maniyachiwan.

⁷ Noqa qhaparikusaj, nitaj pipis uyariwanqachu, yanapata mañakusaj, nitaj pipis cheqanchaway kanqachu.

⁸ Diosqa ñanniyta wisq'aykun ama pasanaypaj; ñanniyta pay laqhayaykuchin.

⁹ Tukuy kapuyniymanta ch'usajta saqewan, umaymanta pilluytapis qhechuwan.

¹⁰ Tukuynejmanta ñak'arichiwan, chinkapunitaj, suyayniyta pasarparichin uj sach'a saphinmanta t'irasqata jina.

¹¹ Phiñakuyninta noqaj contrayta k'ajarichin, enemigonta jinataj qhawawan.

¹² Soldadosnin noqaj contrayta jamunku, wasiypa muyuynimpi toldosninkuta wakiykuchinku, chaypi wakichikunku ujllata maqanawankupaj.

¹³ Diosqa noqamanta ayqechin wauqesniyta, kausaqesniytapis; paykunaqa mana rejsisqata jina qhawawanku.

¹⁴ Ayllusniypis manaña watukuwankuchu, rejsisqasniypis qonqakapuwanku.

¹⁵ Wasiypi tiyakojkuna qonqakapuwanku; uywasqasniy warmispis waj runata jinallaña qhawawanku, mana rejsej tukuwaspa.

¹⁶ Uj uywasqay kamachiyta wajyani, manataj uyariwanchu, kikin simiywan wajyashajtiypis.

¹⁷ Warmiypis payman qayllajtiy qhesachawan; wawasniypis millachikuwanku.

¹⁸ Wawaspis chejnikuwanku; jatarejtiykama contrayta parlarinku.

¹⁹ Aswan sumaj kaj kausaqesniy chejnikuwanku, pikunatachus aswan sumajta munakoj kani, chaykunapis contraypi kanku.

²⁰ Qaraywan aychaywanqa tulluyman k'askaykunku, ñak'ayllatañapuni kausashani.

²¹ Khuyarikuwaychej ari qankuna, kausaqesníy, imaraykuchus Diospuni noqamanqa makinta churawan.

²² Imaraykutaj Dios jina qhatiykachawankichejri? Manachu atisqaykichejtaña khaniwankichej?

²³ Allin kanman pillapis kay palabrasniyta qelqapunawanqa! Allin kanman uj libropi qelqasqa qhepakunan!

²⁴ Allin kanman pillapis uj fierro cincelwan, titipi chayri rumipi ch'eqospa qelqanan wiñaypaj kanampaj!

²⁵ Noqa yachani salvadorniy kausashasqanta, pay noqamanta kutikuwanqa kay jallp'a patapi.

²⁶ Kay aychay chhikan chhikan t'akakuspa urmaqashajtimpis, noqa kikiy Diosta rikusaj.

²⁷ Kikin ñawisniywan rikusaj, mana waj runachu, manachayqa noqapuni, sonqoy wañunayashajtimpis.

²⁸ Kayta uyarispa qankunaqa ninaykichej: Imaraykutaj qhatiykachanchejri?; ima sajratachus ruwasqasnenqa payllapitaj kashan, nispa.

²⁹ Chaywampis, qankunaqa espadata manchachikuychej, ima espadawanchus Diosqa sajratapis jasut'in chayta. Chantapis, qankunaqa yachaychej uj atiyniyoj cheqanchaj kasqanta.