Job 18 - Qheshwa Biblia DC

Bildadqa sajra runas imaynachus kanankuta nin Bildad

¹ Súa jallp'amanta Bildadqa kutichispa nerqa:

² Mayk'ajkamataj parlallankichejpuniri? Unanchaychej, chaymantaraj parlasunchej.

³ Imaraykutaj uywasta jina k'amiwaykuri, ñawiykipitaj wampus jina kayku?

⁴ Ay, qanqa, chay phiñakuyniykiwan thantata ruwakunki. Qanraykuchu jallp'aqa ch'inman tukonqa? Qanraykuchu chhankaspis maypichus kashanku chaymanta wajman kuyurenqanku?

⁵ Cheqamanta juchasapaspa k'anchaynenqa wañuchisqa kanqa, ninampa larwaynin manaña k'anchanqachu.

⁶ Wasimpi k'anchayqa laqhayaykonqa, manaña k'anchaynin k'anchanqachu.

⁷ Thaskisqankoqa manaña sumajchu kanqa, imatachus yuyasqallankupitaj maniyakonqanku.

⁸ Chakisninman uj ch'ipa churasqa kanqa, chay ch'ipa patata maniyakuspa purenqa.

⁹ Chakisnin chaynejman lazo churasqa kanqa, chay lazoqa paypa contranta mat'isqa kanqa.

¹⁰ Chay lazo aysasqata ñampi pakasqa kanqa, chay ñanta pasashajtin mat'iykunampaj.

¹¹ Tukuynejmanta manchachiykunas qharkatitichenqanku, sapa thaskisqampi qhatiykachanqanku.

¹² Yarqhaywan kallpampis tukukaponqa, ima llakiypis paypajpuni kashan.

¹³ Wañuypa kuraj wawan onqoyqa, pisimanta pisi aychanta mikhonqa.

¹⁴ Toldon ukhumanta orqhosqa kanqa maypichus kusisqa karqa chaymanta, chaymantataj manchachiypa reyninman qhatatenqanku.

¹⁵ Toldon ukhupi tiyakonqa manapis paypatachu kanman jina; wasimpis azufrewan ch'ajchusqa kanqa.

¹⁶ Saphin ch'akisqa sach'a jina, khawisqa ramasniyoj.

¹⁷ Paymanta yuyarikunaqa jallp'a patamanta chinkasqa kanqa. Manaña ujtawampis sutinmanta parlanqankuchu.

¹⁸ K'anchaymanta laqhayayman wijch'unqanku, kay mundomanta qharqonqanku.

¹⁹ Llajtampeqa mana kanqachu wawasnin, nitaj allchhisnimpis; ni pipis wasimpi kausashaj qhepakonqachu.

²⁰ Chay jinapuni chay p'unchaynin kasqanmanta inti yaykuynejmanta kajkuna maytapuni t'ukonqanku, jinallataj inti llojsiynejpi kajkunapis mayta t'ukonqanku.

²¹ Ajinata sajra runaj kausaynenqa tukukonqa, pichus Diosta qhesachajpata.