Job 17 - Qheshwa Biblia DC

¹ Samayniy tukukushan, kausayneyqa tukukapushanña, sepulturayqa suyashawanña.

² Qayllaypeqa alqochakoj runaslla kanku, tuta p'unchay nanaypi kashajtiy k'amillawanku.

³ Chaywampis, Diosníy, qan noqamanta kutikuway ari; mana qan kutikuwajtiyki pitaj kutikuwanmanri?

⁴ Qanmin kaykunaj sonqonkumanta yachayninkuta pakaykunki, chayrayku ama saqeychu atipanawankuta.

⁵ Pichus kausaqesninta uj imarayku ch'ataykojpata, wawasnimpa ñawisnin yarqhaywan chharpullataña qhawanqanku.

⁶ Tukuy runaspa asipayanawanta churawanki, tukuytaj uyaypi thoqawanku.

⁷ Ñawisneyqa nanaywan chharpuyaykuwan, imastachus yuyasqasniypis llanthu jinalla kawanku.

⁸ Chayta rikuspa cheqanta purej runasqa t'ukushaj qhepakunku, mana juchayojtaj, juchasapaspa contranta oqharikonqa.

⁹ Paykunaqa nillankupuni cheqan kasqankuta, llimphu makiyoj kasqankutawan.

¹⁰ Chaywampis kayman jamuychej tukuyniykichej, qankuna ukhupi mana tarisajchu uj yachayniyojllatapis.

¹¹ Kausayniypa p'unchaykunasnenqa usqhayta ripushanku, imastachus yuyasqasniywan, wakichisqasniywan imaqa, qhasi manakajman tukunku.

¹² Qankunaqa tutata p'unchayman tukuchinkichej, laqhayaykojtinkamataj k'anchayqa wañupun.

¹³ Noqa suyani sepulturaqa wasiy kananta, laqhayajpi puñunayta mast'akusaj.

¹⁴ Noqajtaqa khuruswan, sepulturawan, tatay, mamay, wauqesniy ima kanku.

¹⁵ Maypitaj kashan kunan noqaj suyayniyri? Suyayniyta pitaj rikunmanri?

¹⁶ Noqawan khuska wañuypa kamachiyninman yaykonqanku, chaypi noqawan khuska jallp'a ukhupi samarikonqanku.