Job 16 - Qheshwa Biblia DC

Jobqa Diospaj parlarin Job

¹ Jobqa kutichispa nerqa:

² Sapa kuti uyarini kayman rijch'akojkunata; qankuna sonqochanawaykichejtaqa astawan umayta nanachiwankichej.

³ Qhasi manakaj palabrasqa tukukunmanchu? Imataj parlachisunki kay jinata ninawaykipajri?

⁴ Sichus qankuna kunan noqa jina kawajchej chayqa, noqapis qankuna jina parlaykichejman; qankunaj contraykichejta may jinata parlariyman, qankunata kusipayaspa umayta khiwiriyman.

⁵ Noqaqa qankunata k'achamanta parlapayaykichejman, qankunaj nanayniykichejtapis phaj nichiykichejman, kallpachaykichejmantaj.

⁶ Sichus parlarini chayqa, nanayniy mana thañinchu, nitaj ch'in kakojtiypis nanayneyqa qhechukunchu.

⁷ Qanqa, Diosníy, kallpayta tukuchiwanki; tukuy familiayta qhechuwanki.

⁸ Qan k'usu p'achata saqeranki, rajchi kasqay chaytaqa sut'inchashan; chay tulluyasqaytaj noqaj contraypi oqharikun.

⁹ Phiñakuyniyki mitha noqawan contraypi kasqanrayku kirusninta k'arurichin contrayta; enemigoypis kanman jina ñawisninwan leqhowan.

¹⁰ Runasqa noqay contrayta tantakamunku, uyaypi laq'aspa k'umuykachachiwanku, contrayta tukuy tantakamunku.

¹¹ Diosqa llulla runaspa makinman churawan, juchasapa runaspa makinman urmachiwan.

¹² Tukuy imayojña kashajtiy, Pay much'uymanta jap'ispa choqawan, ñut'utataj ruwawan. Maymanchus flechananmanta sayachiwan.

¹³ Tukuynejmanta flechasninta kacharimuwan, lurunesniyta q'asarpayan mana khuyakuwaspa, jayaq'eyta pampaman jich'arparin.

¹⁴ Patampi patampi jusk'urawan, maqanakoj runa jina noqawan maqanakuwan.

¹⁵ Llakiy khasqa p'achasta churakuni, ñut'u jallp'aman umayta chhapuni.

¹⁶ Waqasqaypi uyayqa punkiykuwan; ñawiy phuyu jina chhapuyaykuwan;

¹⁷ chaywampis mana noqaqa pitapis sajrata ruwanichu; mañakuyneyqa llimphu karqa.

¹⁸ Ay, jallp'a, ama yawarniyta pakaychu ari! Qhaparikusqayqa tukuynejman uyarikuchun.

¹⁹ Qhaway, janaj pachapi kutikuwaspa parlarejqa kashan, jark'akuwajneyqa patapi kashan.

²⁰ Imastachus yuyasqasniyta Diospa ñaupaqempi ninampaj; ajinamanta waqasqayta rikunawampaj.

²¹ Pillapis Diospa ñaupaqempi allinniyta parlarichun, imaynatachus uj runaqa masimpaj parlapayapun ajinata.

²² Pisi watasllaña noqapaj kajqa usqhayta tukukapushan, ñapis puririsajña mana jayk'aj kutimuna ñanta.