Job 15 - Qheshwa Biblia DC

Elifazqa Jobta k'amin Elifaz

¹ Temanmanta Elifazqa Jobman kuticherqa:

² Yachayniyoj runaqa mana qhasi manakaj palabraswanchu kutichin, nitaj yuyayninta wayra kaj palabraswanchu junt'achin.

³ Mana qhasi manakajllatachu parlan, nitaj qhasimanta imatapis parlallanchu.

⁴ Chay jinata parlaspaqa Diosta manchachikunata chinkachinki; Diospa ñaupaqempi yupaychanata mana kajman tukuchinki.

⁵ Simillaykitaj sut'inchasunki juchasniykita; ch'aukiyay palabrasta parlayta qan ajllanki.

⁶ Mana noqachu qantaqa ch'atashayki; kikin simillaykitaj juchachashasunki.

⁷ Yuyankichu qanmanta aswan ñaupajta mana runasqa kasqanta, nitaj orqospis kasqanta?

⁸ Qan yachankichu Diospa pakasqa tukuy yuyayninta? Qanchu dueño kanki tukuy yachaymanta?

⁹ Imatá qan yachanki noqayku mana yachasqaykutari? Imatá qan yachashanki noqaykumanta astawanri?

¹⁰ Noqanchej chaupipi aswan machu runas kanku, tataykimanta aswan ñaupajta nacejkuna.

¹¹ Manachu qampajqa allin Dios kikin sonqochasusqanqa, munakuywan k'achata parlasusqaykupis?

¹² Imaraykutaj sonqoyki karunchachisunkiri? Imaraykutaj jinata ñawiyki leqhoykachanri?

¹³ Imajtintaj jinatapuni Diospaj phiñakunkiri? Mana reparayniyojtataj rimankiri?

¹⁴ Imataj runa kasqa mana juchayojpuni kanampajri? Uj warmimanta nacesqa runaqa, imaynatataj cheqan kanmanri?

¹⁵ Angelesnimpis mana atienikunampaj jinachu kanku; Diospa rikuynimpeqa janaj pachapis mana llimphuchu.

¹⁶ Astawanraj mana atienikonqachu juchasapa millay runapeqa, mayqenchus sapa p'unchay juchata ruwashan yakutapis ujyashanman jina!

¹⁷ Uyariway, noqa willasqayki, imatachus kausayniypi rikusqayta;

¹⁸ imatachus yachayniyojkuna parlawasqaykuta; paykuna ñaupa tatasninkumanta yachakusqankuta.

¹⁹ Paykunallaman kay jallp'a qosqa karqa, paykunawantaj waj runasqa mana chajrukorqankuchu.

²⁰ Juchasapaspa diasnenqa nanaywan junt'asqa, chay jina sajra runasmantaqa mashkha watastachus kausanankoqa pakasqa.

²¹ Manchachikuy qhapariykunasta ningrisnin uyarin; sumajta waqaychakojtin astawan suwaspis suwanku.

²² Payqa mana yuyanñachu chay laqhayajmanta ayqekuyta, cuchilloqa suyashallan ima ratopis wañuchinampaj.

²³ Q'arqañasqa aychanta mikhonqanku, pay yachan mayk'ajpis chinkanampuni kasqanta.

²⁴ Laqhayayqa sinch'ita mancharichenqa, llakiywan ñak'ariywan taripanqankupuni, uj reypis paywan maqanakunampaj wakichikushanman jina.

²⁵ Kay imasqa kashan pichus Diospa contranta oqharikojpaj, pichus Tukuy Atiyniyojwan churanakuyta munajpaj.

²⁶ Pichus escudowan pakasqa kaspa, machu machuykachaspa Diospa contranta sayajpaj.

²⁷ Paypa uyanqa wiramanta lliphipirishan, ñañu wasampis wiramanta llusk'apacha.

²⁸ Laqhayay llajtaspi tiyakorqa, raqayasqa ch'in wasispi.

²⁹ Mana qhapajyanqachu, kapuynimpis tukukaponqa, nitaj jallp'amampis saphenqachu.

³⁰ Laqhayaymanta mana ayqeyta atenqachu, uj sach'aj q'erqemusqanta ujllata nina qhasurpayan jinata rupharparenqa, chayri wayra t'ikanta thalarparin jinata urmachenqa.

³¹ Ama wampu jina ch'aukiyaypi atienikuchunchu, mana atenqachu munasqanta jap'iyta manachayqa ch'aukiyachikuyllata.

³² Manaraj imapi ramasnin ch'akiranqa, manañataj ujtawan q'omeryanqachu.

³³ Uj uvas sach'a mana poqoyta atej jina kanqa; olivoj t'ikasnin jina t'akarakonqa.

³⁴ Juchasapasqa mana wawasniyoj kanqanku, wasisninkupi lluk'ichikuspa tantasqasninkuta nina q'olaykonqa.

³⁵ Sajra kajwan wijsallisqas kanku, juchatataj wachanku, ch'aukiyayllata unanchanku.