Job 12 - Qheshwa Biblia DC

Jobqa willan Diospa atiyninmanta yachayninmantawan Job

¹ Jobtaj kutichispa nerqa:

² Cheqamanta qankunaqa runaspa cuentanmanta parlashankichej, qankunawan khuska wañonqa yachayqa!

³ Chaywampis, qankuna jinallataj noqapis yachani; qankunamantaqa mana imapipis pisichu kani. Pitaj mana yachanchu kay tukuy imastari?

⁴ Noqaqa mana juchayojchu, nitaj k'aminachu kani; ñaupaj tiempospi Diosqa mañakusqasniyta uyariwaj; kunantaj kausaqesneyqa asikuwanku.

⁵ Pichus allimpi kajqa, mana allimpi kajta qhesachan; pichus urmaykunampaj jinaña kajtaqa astawan tanqaykun.

⁶ Suwaspa wasisnimpeqa imaspis junt'a, Diospaj imatapis rimajkunaqa kusisqas tiyanku; paykunaqa yuyanku makisninkupi Dios kasqanta.

⁷ Chaypajqa animalesta kunan tapuriy, paykuna yachachisonqanku; chanta phawajkunata tapurillaytaj, paykunapis rikuchisonqanku.

⁸ Chayri jallp'ata tapuriy; chaypis yachachisonqa; mar qochapi kaj challwaspis sut'inchasonqanku.

⁹ Pillapis kanrajchu kay imasmanta mana yachajqa, Dios tukuy imata makisninwan ruwasqanmanta?

¹⁰ Tukuy kausajkunaj kausaynenqa Diospa makimpi kashan, jinallataj tukuy runaspa kausaynimpis.

¹¹ Cheqamanta ningreqa rejsin pejpa parlayninchus kasqanta, jinallataj mallq'apis rejsin ima mikhunachus kasqanta.

¹² Machu runasqa sumajta yachanku, unayta kausasqallankutaj paykunaman yachachin.

¹³ Diosqa yachayniyoj atiyniyojtaj, pay yachan imaynatachus sumaj yachaywan imastapis wakichisqanta.

¹⁴ Diospa urmachisqantaqa, ni pipis watejmanta ruwayta atinchu; Diospa jap'isqantaqa, ni pipis kacharichiyta atinchu.

¹⁵ Sichus Pay mana parachimunchu chayqa, tukuy ima ch'akipun; sichus ujllapi parachimun chayqa, yakuñataj jallp'ata llump'iykun.

¹⁶ Dioswan kashan atiywan yachaywan; Paypa munaynimpi kashan ch'aukiyaj, ch'aukiyachikojpis.

¹⁷ Diosqa yachayniyojkunaj yachayninta chinkachichin; cheqanchajkunatapis locoyachin.

¹⁸ Diosqa sajra reyestapis mana kamachejkunasniyojta asqerparin, q'alasllata presosta puririchin.

¹⁹ Sacerdotesta ruwanankumanta wijch'un, pikunachus kamachiyninkupi sumajta sayashajkunatapis urmachin.

²⁰ Pikunachus cheqanta yuyaychajkunatapis mana palabrayojta saqen, kurajkunatapis sumaj yuyayninkuta chinkachin.

²¹ Sumaj runaspaj qhawasqa kajkunata manakajpaj qhawachin; sinch'i kallpayojpaj qhawasqasta mana kallpayojta saqen.

²² Diosqa mana imapis rikukoj kajta sut'iman rikhurichin, tukuy ima pakasqa kajkunata sut'iman orqhon.

²³ Payqa nacionesta ashkhayachin, chanta payllataj chinkachin; nacionesta ch'eqerachin, ayllataj tukuynejmanta tantaykun.

²⁴ Diosqa uj nacionmanta kurajkunaj yuyayninta qhechun. Mana mayman riy atina ch'in pampapi pawichin.

²⁵ Chaypi llanqhaykachaspa laqhapi jina purinku, machasqasta jina kayman jaqayman thankiykachachispa purichin.