Job 11 - Qheshwa Biblia DC

Zofarqa Jobta k'amin Zofar

¹ Naamatmanta Zofarqa Jobman kuticherqa:

² Chay chhikata parlasqaykimanqa manachu pipis kutichiyta atinman? Chay jinata parlasqallaykiwanchu qanqa llimphuman tukuyta munashanki?

³ Chay jina palabrasniykiwanchu noqaykuta ch'inyachiyta munawayku? Kay jinata alqochakuwasqaykumanta manachu pipis p'enqachisonqa?

⁴ Qanqa ninki: Noqaj yachachiyneyqa cheqampuni; qhawawasqaykiman jina noqaqa llimphupuni kani, nispa.

⁵ Allin kanman Dios chay palabrasniykiman kutichisunan; qanwantaj Diosqa parlarinan.

⁶ Pay yachachisunkiman yachaypa pakay imasinmanta, mayqenkunachus mana yachayta atikunchu. Ajinapi yachawaj Diosqa manaraj juchaykiman jinachu jasut'isusqanta.

⁷ Creenkichu Diospa pakasqa imasninta taripayta? Chayawajchu Tukuy Atiyniyoj Diospa imaynachus kasqanta yachanaykikama?

⁸ Imankitaj qanri? Chaykunaqa cielomantapis aswan patapi kanku. Imatataj qan chaymanta yachankiri? Chaykunaqa kanku laqha ukhumantapis aswan ukhupi.

⁹ Kay mundomantapis aswan jatuchaj kanku, mar qochamantapis aswan jatuchaj.

¹⁰ Dioschus jamunman, runasta wisq'aspataj wajyanman cheqanchanampaj chayqa, pitaj chaymanta jark'akunmanri?

¹¹ Diosqa yachan pichus llulla kasqanta; Pay rikun tukuy sajra kajta. Manachu yuyanki payqa imatapis mana reparasqanta?

¹² Uj wampu runaqa yuyayninman churakonqa, imaynatachus uj k'ita burro machuyaynimpiraj mansoyan ajinata.

¹³ Allinta unanchakuy imatapis cheqanta ruwanaykipaj, chaymantataj Diosmanta mañakuy.

¹⁴ Sichus ima jucha makiykipi kashan chayqa, wijch'uy qanmanta, ama wasiykipi juchataqa kajta saqeychu.

¹⁵ Chaymantaraj qanqa umaykita mana juchayojta oqharinki; kallpayoj kanki, manataj ni imamanta manchachikunkichu.

¹⁶ Chaymanta ñak'ariyniykimanta qonqapunki; qanqa qonqapunki imaynatachus yaku pasarparin ajinata.

¹⁷ Kausayniykeqa k'ancharenqa khuskan p'unchay intimanta astawan; laqhayamojtimpis sut'iyamushaj jina kanqa.

¹⁸ Tukuy sonqo tiyakunki, imaraykuchus suyayniykeqa kanraj; muyuyniykita qhawarispataj qanqa sumajta puñurikunki.

¹⁹ Ni imapis puñushajtiyki mancharichisoj kanqachu, ashkhas jamusonqanku yanapayniykita mask'aspa.

²⁰ Sajra runasrí qhasillata yanapata mask'anqanku, mana tarenqankuchu maymanchus pakakunankutapis, paykunaj suyaynenqa kanqa wañuyllaña.