Job 1 - Qheshwa Biblia DC

Dios saqen Job llakiyman urmananta

¹ Uz jallp'api uj runa Job sutiyoj tiyakorqa. Payqa sumaj cheqan karqa, Diostaqa tukuy imapi sumajta kasoj, sajramantataj karunchakoj.

² Paypata tiyaporqa qanchis qhari wawasnin, kinsa warmi wawasnin ima.

³ Chantá tiyapullarqataj qanchis waranqa ovejasnin, kinsa waranqa camellosnin, phishqa pachaj yunta wakasnin, phishqa pachaj china burrosnin, ashkha kamachisnin ima. Inti llojsimuypi tiyakojkunamanta pay k'atalla manchay qhapaj runa karqa.

⁴ Jobpa qhari wawasnenqa sapa ujninku wasisninkupi sumajta mikhuspa fiestasta ruwaj kanku, panasninkutapis kinsantinta wajyachej kanku mikhunankupaj ujyanankupajtaj paykunawan khuska.

⁵ Chay fiestasta tukojtinkutaj Jobqa wawasninta wajyaspa, tutamanta jatariytawan uj uywata ñak'aspa Señorpaj q'olacherqa, sapa ujninku juchasninkumanta llimphuchakunankupaj. Chayta Jobqa ruwajpuni, ichapis wawasniy chay fiestankupi sonqosninkupi Diospa contranta juchallikunku, nispa.

⁶ Uj pacha Diospa wawasnin Señorpa ñaupaqenman qayllakoj jamusqanku; chaypachallataj paykunawan khuska Supay jamullasqataj.

⁷ Señortaj Supayman nerqa: Maymantataj jamunkiri?, nispa. Supaytaj Señorman kuticherqa: Jallp'ata puriykachaspa muyumusqaymanta jamushani, nispa.

⁸ Señortaj payman nerqa: Manachu kamachiy Jobta repararqanki? Pay jina runaqa kay jallp'a patapi mana kanchu; payqa noqaj kamachisqayta tukuy sonqo ruwan, sumaj cheqantataj kausan, Diosta manchachikun, sajramantapis karunchakun.

⁹ Supaytaj Señorman nerqa: Payqa qhasichu ima nisqaykitapis cheqanta ruwashan?

¹⁰ Manachu qan payta jark'anki tukuy imamanta, ayllunta, tukuy imasnin kajtapis? Qan bendicishanki tukuy ima ruwasqasninta; chayrayku tukuy ima kapuyniyoj manchay qhapajtaj kay jallp'api.

¹¹ Kunanqa qhechuy tukuy kapusqanta, rikunkitaj, uyaykipi maldicisusqanta.

¹² Señortaj Supayman kuticherqa: Qan munasqaykiman jina Jobpa tukuy imasninta qhechuy, paypa ukhullanman amapuni makiykita churankichu. Chaymantataj Supayqa, Señorpa ñaupaqenmanta llojserqa.

^13-15 Uj pacha Jobpa qhari wawasnin, warmi wawasnin ima, kuray kaj wauqenkoj wasimpi mikhuspa ujyaspataj kashajtinku, uj runa Jobman willaj chayamorqa, kay jinata: Yuntasniyki llank'asharqanku, china burrosniyki chay qayllapi mikhusharqanku; jinallaman chayarkamorqanku Sabamanta runas, chaykunataj uywasta suwakapunku, kamachisniykitataj espadawan wañurachinku; noqallaña ayqekamuni qanman willasunaypaj.

¹⁶ Manaraj chay runa willayta tukushajtin, uj runañataj chayaykamullarqataj, nispa: Janaj pachamanta Diospa kachamusqan lliuj lliujnin ovejasta michejkunasnintinta q'olaykun, noqallaña ayqekamuni qanman willasunaypaj, nispa.

¹⁷ Chay runa manaraj willayta tukushajtin, uj runañataj chayaykamullarqataj, nispa: Kinsa t'aqa caldeos jamuytawan maqaykuwayku, michejkunasta espadawan wañurachinku, camellostataj tukuyninta qhatikapunku, noqallaña ayqekamuni qanman willasunaypaj.

^18-19 Chay runa manaraj willayta tukushajtin, uj runañataj chayaykamullarqataj, nispa: Qhari wawasniyki, warmi wawasniykiwan ima, mikhusharqanku vinotataj ujyasharqanku kuraj wawaykejpi; ujllata ch'in pampanejmanta uj sinch'i wayra rikhurimuspa, wasita tawantin esquinasninmanta thalarispa wawasniykej patanman urmaykuchin. Tukuyninku wañusqas kanku; noqallaña ayqekamuni qanman willasunaypaj.

^20-21 Chayta uyarispa Jobqa manchay llakisqa sayarikuspa, p'achasninta llik'irakorqa, chujchasnintapis k'uturakorqa. Jinaspataj pampaman k'umuykukorqa, nerqataj: Noqaqa q'alalla mamaypa wijsanmanta llojsimorqani, q'alallataj llojsipusaj kay mundomanta. Tukuy imasniyta Señor qowarqa, kunanqa payllataj chay imasta qhechukapuwan. Chaywampis Señorpa sutenqa bendicisqa kachun!

²² Ajinata Jobqa, chay tukuywampis mana juchallikorqachu, nitaj ima sajratapis Señorpa contranta parlarqachu.