Jeremías 9 - Qheshwa Biblia DC

¹ Imaynapichus ñawisniy yaku juturi jina kanan, jinamanta tuta p'unchay unun paranta waqanaypaj llajtay ukhupi wañurasqankumanta.

² Imaynapichus noqajta ch'in pampapi uj cheqampi tiyarikunaypaj kapuwanman, jinamanta aylluymanta karuncharikunaypaj. Paykuna tukuyninku wasanchajkuna kanku, llullirioswan ch'ataykojkuna kanku.

³ Imatapis llullakuspa nirinapajqa churasqas kanku, imaynatachus flechasmanta wach'inasta kacharinku ajinata. Kay jallp'apeqa llullakuylla junt'a kashan, manataj cheqa kajqa kanchu, jinamanta astawan astawan mana allin kayman rishanku. Mana rejsiyta munawankuchu, nispa kikin Señor nin.

⁴ Kausaqesninchejmampis mana atienekunachu, nitaj kikin wauqesninchejmampis atienekusunmanchu, Wauqepurapis ch'aukiyanakunku, kausaqentimpurapis llullakuywan ch'atanaykukunku.

⁵ Sapa ujpis purajmanta llullanaykukunku, manataj pipis cheqanta parlajqa kanchu. Llullakuyllamanña yachaykukunku, ancha sajras kanku, manapuni saqenankupaj jinachu kanku.

⁶ Señor nillantaj: Qhepampi qhepampi mana allin ruwaylla, qhepampi qhepampi llullakuylla, aylloyqa mana rejsikapuyta munawanchu.

⁷ Chayrayku noqa Tukuy Atiyniyoj Señor nini: Ninamanchá churasqa kanman allin ch'uwachasqa kanampaj ari. Imatañataj wajta kay aylluywan ruwaymanrí?

⁸ Qallusninkoqa wañuchej wach'inas jina, mana kajta parlaspa purinku. Kausaqesninkuta may misk'ita napaykurinku, wasankumantataj tojllasta wakichishanku.

⁹ Manachu kay imasmantaqa jasut'iymanri? Manachu ajina llajtamanqa ruwasqanman jina qopuyman? Noqa Señormin chayta nini.

¹⁰ Orqosnejpi waqaychej, ayqhoychejtaj, llakiy wayñusta pasto pampaspi takiychej, imaraykuchus ruphasqasña kashanku, nitaj pipis chaynintaqa purinñachu, manañataj wakaspa ulisqankupis uyarikunñachu, phawaj p'isqospis, sajra animalespis ayqekaporqanku.

¹¹ Jerusalén llajtata rumi qontusman tukuchisaj, chantá atojkunaspa pakakunasninmantaj; manañataj pipis chaypi tiyakonqachu.

¹² Pitaj ashkha yachayniyoj kanman kay imasta yachakunampajri? Pimantaj Señor rejsicherqa kay imastari, paytaj kay imasta wajkunaman allinta yachachinampajri? Imaraykutaj kay jallp'anchejqa phirisqa, ch'aki ch'in pampa mana pejpa purinan jinari?

¹³ Señortaj kutichin: Kay tukoyqa qhatirisunkichej, qorqaykichej chay yachachiykunasniyta saqerparisqaykichejrayku, mana kasuwarqankichejchu nisqasniyta mana ruwaspa.

¹⁴ Manachayqa kaywan, sonqonkupi munayninkuman jinalla ruwarqanku, mana kaj dioskunatataj yupaycharqanku, tatasninkoj yachachisqanman jina.

¹⁵ Chayrayku noqa Señor Tukuy Atiyniyoj Israelpa Diosnin kayta nini: Qankunaman mikhuchisqaykichej may jaya imata, wañuna yakutataj ujyachisqaykichej.

¹⁶ Tatasninkoj mana rejsisqan llajtasman ch'eqerachisaj, chaypitaj makinkupi t'ojsinaswan qhatiykachachisaj, mana ujniyojta tukuchinankukama.

Jerusalén llajtapi waqaykuna

¹⁷ Tukuy Atiyniyoj Señorqa nin: Allinta uyariychej. Wajyachimuychej chay llakiyta, waqaj warmista, qankunapaj churasqas kanku chaykunata.

¹⁸ Arí, usqhayta jamuchunku noqanchejpaj llakiy waqaykunata, waqaykunatawan waqapunawanchejpaj, ñawisninchejmanta waqay suruchun.

¹⁹ Sionmantapacha nanaywan qhapariykuna chayamuwanchej: Ay, imaynatataj mana imayoj llakiypi rikhurinchej! P'enqaypi rikhurinchej! Kay jallp'a suyunchejta saqerparinanchej tiyan, imaraykuchus tiyakuna wasisninchejqa raqaykunallaña kashanku.

²⁰ Warmis, uyariychej Señorpa nisqanta, parlasqanta allintapuni uyariychej, warmi wawasniykichejman waqayta yachachiychej. Warmi masisniykichejmampis kay jinata waqayta yachachiychej:

²¹ Wañoyqa wasisninchejman yaykuykamun, palaciosninchejpi, callespi wawasta wañuchinampaj, waynastataj plazaspi.

²² Runaspa ayasninkutaj pampaman wijch'usqas wanu jina kanku. Jinallataj, imaynatachus trigoj umasnin ruthojpa qhepampi t'akakun, manataj pipis chajmanchu ajinata. Señormin chayta nin.

²³ Señorqa nin: Yachayniyoj runaqa ama chay yachayninmanta runaykachachunchu, nitaj atiyniyojpis, nitaj qhapajpis.

²⁴ Sichus pipis munanman runaykachayta chayqa, noqata rejsiwasqanmanta runaykachachun, noqa Señormin, Diosnintaj kasqaymanta, pichus kay jallp'api ruwarqa, munakuypi, justiciapi, cheqan kaypitaj chaymanta. Chaymin noqataqa kusichiwan. Noqa Señormin chayta nini.

²⁵ Señorqa nillantaj: Uj p'unchay jamushan, tukuy ayllus aychaman jinalla circuncidakojkunata jasut'isaj.

²⁶ Kay ayllusta: Egiptota, Judata, Edomta, Amonta, Moabwan, jinallataj tukuy ch'in pampapi tiyakojkunata, umasninkuta ruthuchikunku chaykunatawan. Imaraykuchus chay ayllusqa, jinataj tukuy Israel ayllupis, cheqamanta sonqonkupi qhesachawanku.