Jeremías 8 - Qheshwa Biblia DC

¹ Señorqa nin: Kay p'unchaykunapimin reyespa tullusninkuta p'ampasqas kasqankumanta orqhonqanku, chantá Judáj kurajkunasnimpata, sacerdotespata, profetaspata, jinallataj Jerusalempi tiyakojkunajtawan.

² Aysarparenqankutaj intej k'anchayninman, killajman, jinallataj ch'askakunajman ima. Chaykunata munakorqanku, tapukorqanku, yupaycharqankutaj. Manataj pipis paykunata oqharerqachu p'ampamunankupaj, wanu jina pampapi qhallisqa wijch'ukorqa.

³ Kay millay runasmanta qhepakojkunataj, mayllapipis ch'eqerachisqaymanta qhepakojkunaqa astawan wañuytaraj munanqanku kausaymanta nisqaqa. Noqa Tukuy Atiyniyoj Señormin chayta nini.

Israelqa wasanchasqanmanta jasut'ichikun

⁴ Qan, Jeremías, aylluyman kay parlasusqayta willaykuriy: Pipis urmaytawan sayarikun chayqa, ñanta chinkachejpis ñanman kutirimun.

⁵ Chantaqa qan Israel, imaraykutaj wasanchawarqankiri? Jerusalén, imaraykutaj qan wiñaypaj qhesachawarqankiri? Imaraykutaj astawan rumi sonqoman tukushankiri, manataj kutirimpuyta munankichuri?

⁶ Uyarishasqayman jinaqa mana pitapis, juchanmanta Diosman kutirikusqanta uyarinichu, manataj sut'ita ninchu, imata ruwasqaniri?, nispaqa. Tukuyninku ñanninta sinch'ita juyñarinku, maqanakupi jakiman kacharisqa caballos jina.

⁷ Chay patata phawaj qewiñaspis yachanku, mayk'ajchus kutimpunankuta. Palomas, para p'isqos, chakisapa yaku p'isqospis yachanku mayk'ajchus wajnejman rinankuta. Qanrí, ayllúy, kamachisqasniyta mana yachankichu.

⁸ Imaynapitaj qankuna niwajchej yachayniyoj kasqaykichejtari? Señorpa kamachiynintaj qankunawan kasqantari? Cheqamanta chay yachachejkunaqa llullallata phuruswan qelqanku.

⁹ Chay yachayniyojkunarí k'umuykuchisqas, mancharichisqastaj kanqanku, imaynatachus uj uywa tojllapi jap'ichikun jinata. Maypitaj chay yachayninku kashanri, palabrasniyta paykuna qhesachajtinkuri?

¹⁰ Chayraykutaj warmisninkuta waj qharisman jaywaykusaj, jallp'asninkutapis wajkunaman. Jatun juch'uy qhasi mana kaj, qolqeta jap'iyllataña yuyanku. Sacerdotes, jinataj profetaspis tukuyninku ch'aukiyanku.

¹¹ Aylluypa nanasqasnintaqa pata patallanta jampiykurinku, chantá ninku tukuy imapis allillan kasqanta, mana imapis allin kashajtin.

¹² Chay millachikunay ch'ichi imata ruwaytaqa p'enqakunaykichej karqa. Qankunaqa p'enqakorqankichejchu, niñataj yachankichejchu imachus p'enqakuy kasqantapis. Chayraykumin qankunata jasut'ejteyqa misk'ankichej, chay ujkuna jinataj urmakunkichej. Noqa Señormin chayta nini.

¹³ Señorqa nillantaj: Aylluytaqa trigota jina ruthusaj. Nitaj ni uj uvas poqoypis huertapi puchonqachu, nitaj uj higospis sach'ampeqa puchonqachu, manachayqa ch'aki laphisllaña qhepakonqa, nispa.

¹⁴ Aylluytaj nenqa: Imapajñataj kaypi qhepakunchejri? Tukuy ripunachej chay pakakunasniyoj llajtasman ujkama wañurachinawanchejpaj. Señor Diosninchej wañuchiwasunchej, qowasunchejtaj, venenoyoj yakuta, imaraykuchus paypa contrampi juchallerqanchej.

¹⁵ Aswan allimpi kayta suyarqanchej, manataj ima allimpis chayamuwarqanchejchu. Kausayta mancharikuyllata suyarqanchej.

¹⁶ Enemigosqa jamushanña. Caballospa ansaqesqasninku Danmantapachaña uyarikun. Caballos qhaparinku chayqa, tukuy jallp'antin kharkatitin. Jallp'api tukuy kaj imasta t'unaykoj jamushanku, llajtata, chaypi tiyakojkunasninta ima.

¹⁷ Señorta parlallantaj: Qankunaj contraykichejpi wañuchej katarista wach'inasuykichejpaj apachimusaj, chaykunatarí mana yatirispis imanayta atenqankuchu.

Jeremías ayllunrayku sonqonta nanachikun

¹⁸ Chay nanayneyqa mana jampikuyniyoj, sonqoyqa sayaykapunayanña.

¹⁹ Aylluypa waqasqasnenqa tukuy jallp'aspiña uyarikun: Señorqa manañachu Siompi kashan? Manañachu reynenqa chaypi kashan?, nispa. Señortaj kutichin: Imaraykutaj phiñachiwarqankichej chay lantikunata yupaychaspa, mana rejsisqa dioskunatari?, nispa.

²⁰ Q'oñi tiempo pasanña, cosecha oqharina tiempo pasanña, manataj salvaciompis noqanchejpajqa kanchu.

²¹ Ñak'arini aylluypa ñak'arisqanwan, llakikuy mancharikuytaj atipashawanña.

²² Manachu ima jampipis Galaad llajtapi kanman? Manachu jaqaypi pipis jampiykurejqa kanman? Imaraykutaj kay aylloyqa mana walejyakuyta atinchuri?