Biblia Todo Logo
Bìoball air-loidhne

- Sanasan -

Jeremías 6 - Qheshwa Biblia DC


Enemigos Jerusalenta muyuykunku

1 Benjamimpa ayllunmanta kaj runas, pakakunata mask'aychej, Jerusalenmantataj ayqeychej! Tecoapi putututa waqachiychej, uj señalta oqhariychej Bet-haquerempi, imaraykuchus pata ladomanta uj llakiy, manchay ñak'ariytaj jamunayashan.

2 Sión orqoqa may k'achitu q'omer pampa jinamin.

3 Chayman michejkunaqa ovejasninkuta pusanku, chay muyuynimpitaj jarakunaku, sapa ujtaj tropasninkuta waj wajllata mikhuchinku.

4 Enemigosninkutaj ninku: Paypa contrampi maqanakupaj wakichikuychej. Jamuychej chaupi p'unchaynejta, yaykuykusunchej! Ay noqanchejmanta ancha llakiypi tarikunchej, chantapis inti yaykuykushanña, ch'isiñataj kashan!

5 Ajinaqa tutanñataj yaykuykusunchej, palaciosnintataj thuñiykamusunchej, nispa.

6 Tukuy Atiyniyoj Señorqa kay kamachita qon: Sach'asta k'utuychej, perqasmantaj jallp'ata qolluykuychej Jerusalenman maqanakoj yaykunapaj. Llajtaqa jasut'isqa kanampaj qhawasqaña, imaraykuchus millay ruwaykunawan junt'a kashan.

7 Jerusalenmanta sajra kay llojsimun, uj pujyumanta yaku llojsimun ajinata. Chay llajtapeqa millay ruwaykunaslla, ch'ajwachinakuyllataj uyarikun, chaypi rikuni nanachisqasta, ayqhoyllatawan.

8 Allinta reparakuy, Jerusalén, mana t'aqakusunayta, munaspaqa ch'in pampaman, mana uj runayojmantaj tukunaykipaj.


Jasut'i jamunanmanta willakun

9 Tukuy Atiyniyoj Señorqa nin: Chay p'unchay israelitasta kutin kutinta allinta mask'ankichej, imaynatachus uvas sach'aspa poqoyninta chajmankichej ajina, nispa.

10 Noqataj kuticherqani: Pitaj kutichiwanman kay parlasqayta willamojtiyri? Señor, paykunaqa joq'arasman tukunku, manataj uyariyta atinkuchu, palabrasniykimanta asiykukunku, mana paykunamanqa allinchu rijch'an.

11 Phiñakuyniykiwan junt'asqaña kani Señor, manaña kakuyta atinichu, nispa. Señortaj niwarqa: Chay phiñakuyniyta thalliykuy ari callepi purishanku chay wawaspa patanman, jinataj chay waynaspa patanmampis. Qosasta warmisnintinta presochasqasta apanqanku, jinallataj machu runastapis.

12 Wasisninku, llank'anasninku, chanta warmisninkupis, wajkunaj makinkuman chayanqanku. Noqaqa makiyta oqaharisaj kay jallp'api tiyakojkunata jasut'inaypaj. Noqa Señormin chayta nini.

13 Tukuyninku jatunmanta juch'uykama yuyanku qhasi manakajmanta qolqeta jap'iyllataña; profetas, jinatataj sacerdotespi llulleriosninkuwan ch'aukiyanku.

14 Aylluypa nanasqasninta pata patallanta jampiykurinku, ninkutaj tukuy ima allillan rishasqanta. Jinapis manapuni imapis allenqa kanchu.

15 Chay noqaj mana munasqay imasta ruwaytaqa p'enqachikunanku karqa. Chaywampis manapuni p'enqakunkuchu, niñataj yachankuñachu imachus p'enqakuy kasqantapis. Chayrayku maypachachus noqa jasut'isaj, chaypacharajmá misk'anqanku, urmanqankutaj chay ujkuna jina. Noqa Señormin chayta nini.


Israel aylloj mana kasukoj kaynin

16 Señorqa ayllunman nin: ñankunaspi sayaykuychej, qhawaychejtaj, tapurikuychej chay ñaupa runakuna ukhumanta, maypichus kashan chay aswan allin kaj ñan chayta, qhatiykuychej, samariytataj tarinkichej. Paykunataj ninku: Manapuni chay ñanta puriykumanchu, nispa.

17 Señor churaykorqa qhawajkuna soldadosta, ayllunmantaj nerqa: Pututoj waqasqanta allinta uyariychej. Israel ayllutaj niwarqa: Mana kasuta ruwayta munaykuchu, nispa.

18 Chayraykumin Señorqa nin: Naciones, uyariychej, yachaychejtaj imachus kay aylluyta qhatirinanta.

19 Uyariy qan jallp'a: Kay aylluman uj ñak'ariyta apachimusaj, sajra kajta umachakusqankurayku, palabrasniyta mana kasuta ruwayta munarqankuchu, jinataj yachachisqasniyta qhesachasqankurayku.

20 Imapajtaj qankuna Sabá inciensota apamuwankichejri? Jinallataj chay karu llajtasmanta q'apaj qhorastapisri? Noqapaj manapuni allinchu rijch'awan chay ruphachina, nitaj chay waj rikuchikusninkupis.

21 Chayrayku Señorqa nin: Noqa kay aylluyta misk'achisaj, urmachisajtaj. Tukuy tatas wawasnintin, qayllankupi kajkuna, jinallataj kausaqesninkupis, tukuy wañonqanku.


Nortemanta atiyniyoj nación jamonqa

22 Señorqa nin: Patakaru jallp'asmanta uj atiyniyoj nación jamunampaj wakichikushan.

23 Lanzaswan, wach'ina arcoswan ima wakichisqasña kanku. Ancha sajras kanku, mana uj chhika khuyakuyniyojtaj, qhaparqachasqankoqa mar qochaj sonaynin jina kanku, caballospi montasqas rishanku. Chaykunataj Siompa contrampi maqanakunankupaj wakichisqasña kanku.

24 Jerusalempi runasqa ninku: Chaykunamanta parlajta uyarispaqa kallpayku wañun, onqokoj warmi jinataj ñak'ariypi nanaypitaj kashanku.

25 Ama campomam llojsiychejchu, amataj ñankunasmampis llojsiychejchu. Enemigoqa sumaj armasninwan wakisqa kashan, manchachikuywan kharkatiteyqa tukuynejpi kashan!

26 Ayllúy, qhashqa p'achasta churakuy, llakiy p'achata churakuy, ushphapi sunt'iray; qhaparqachaspataj waqay, imaynatachus uj k'ata wawanku wañupojtin waqanku ajinata. Noqanchejta wañuchejkunaqa contranchejpi ñapis jamushanña.

27 Señorqa nillawarqataj: As allinta chay aylluyta juchanmanta waturiy, allinta qhawariy imaynatajchus puriynin kasqanta.

28 Señor, tukuy paykuna oqharikojkuna kanku, cuento q'epi runas kanku, chantá millay puriyniyojkuna kanku; bronce jina, fierro jinataj kanku.

29 Maypachachus fuelle sinch'iwan phukun chayqa, nina chay titita unuyachin. Jinapis qhasipaj paykunataqa ch'uwachanku. Chay juchasapasqa manapuni chinkankuchu.

30 Sutichanachá kanqa wijch'usqa qolqe nispa, imaraykuchus qan, Señor, paykunata qhesacharqanki.

Qheshwa Biblia DC © Sociedades Bíblicas Unidas, 1986.

United Bible Societies
Lean sinn:



Sanasan