Jeremías 50 - Qheshwa Biblia DC

Babiloniaj urmasqan

¹ Caldeospa jallp'an Babiloniamanta Señorqa profeta Jeremiasnejta willachin:

² Tukuy naciones ukhupi chayta willaramuychej yachanankupaj. Uj wiphaylata oqhariychej señalta jina, ama uj chhikanta pakarispa. Kay jinata niychej: Babiloniata jap'ikapunku. Bel nisqa diosninku p'enqaypi rikhurichisqa karqa. Marduc nisqa diosninku manchariywan junt'a kashan. Chay lantisninku, mana kaj dioskunasninku p'enqaypi rikhurichisqas karqanku, mancharikuywan junt'astaj.

³ Pata ladomanta uj nación paypa contrampi jamushan, chay llajtata ch'in pampaman tukuchinampaj. Manaña ni runas, nitaj uywaspis chaypi kausasqankuñachu, Chay jallp'amanta tukuy ayqenqanku, nispa.

Israelitas kutimpunku

⁴ Señorqa nin: Jaqay p'unchaykunapi israelitas, jinataj Judamanta kajkuna ima noqa Señor Diosninkuta waqaspa mask'awanqanku.

⁵ Sión orqoman rina ñanta tapukonqanku, chaymantaj renqanku: Rinachej, Señorwan ujchakamunachej chay wiñay mana jayk'aj qonqana tratopi, ama jayk'aj noqanchejmanta qonqapunampaj, nispa.

⁶ Aylloyqa oveja chinkasqa jina karqa, michejkunasninkoqa mana allintachu michej kanku, manachayqa orqosnejpi chinkajta qhawallarqanku. Uj orqomanta waj orqoman purikoj rerqanku, puñuna kanchankumanta qonqakapunankukama.

⁷ Paykunata chejnikojkunarí taripaspa oqoykoj kanku, nejtaj kanku: Mana noqaykoj juchaykuchu. Paykunaqa Señorpa contrampi juchallikusqankurayku. Paymin cheqamanta michejninkoqa, ñaupa tatasninkoj suyaynintaj.

⁸ Babiloniamanta llojsiychej, caldeosmanta ayqeychej pusajkuna jina tropaj ñaupaqenman.

⁹ Noqa wichaynejmanta atiyniyoj aylluta jamuchisaj, Babiloniata jap'ikapoj yaykuykunankupaj. Ñaupajta allinchaykukuytawankama jap'ikaponqanku. Paykunaqa sumajta maqanakuyta yachajkuna kanku, wach'inasninkuta kachaykunku mana ujta pantarispa.

¹⁰ Caldeosta ch'uskiranqanku manaña atinankukama. Noqa Señor chayta nini.

Babiloniaj urmaynin

¹¹ Qankuna caldeos, aylluyta ch'uskirarqankichej chaykuna kusikuychej, asirikuychejtaj. Waka uña jina q'omer pampaspi sink'uriychej. Caballos jinataj qhapariychej.

¹² Nacekusqaykichej llajtaqa p'enqaypi p'enqachisqa rikhurenqa. Tukuy nacionesmanta aswan kulli kaj kanqa, uj ch'aki ch'in pampa tukuy imasnin tukusqa.

¹³ Phiñakusqayrayku, mana uj tiyakojniyojta saqesaj, uj ch'in pampaman tukuchisqata. Tukuy chayninta pasajkunaqa mancharisqa t'ukushajtaj qhepakonqanku chay jasut'ichikusqanta rikuspa.

¹⁴ Wach'inasniyoj kajkuna wakichikuychej, Babilonia llajtata muyuykuychej. Babiloniaspa contrampi wach'inasniykichejta kachaykuychej, imaraykuchus noqaj contraypi juchallikorqanku.

¹⁵ Tukuynejpi maqanakunapaj jina qhapariykunasta uyarichiychej. Babilonia atipakunña. Torresnin, perqasnimpis thuñiykukunku. Kaymin ayni kutichisqayqa. Paymanta astawan aynita kutichiychej. Imaynatachus chay nacionestawan pay ruwarqa ajinata ruwaychej.

¹⁶ Babiloniapi ama pitapis tarpojta, chayri cosechasta oqharejtapis saqeychejchu. Chay maqanakupi wañuchinakuta rikuspa chay waj llajtayojkuna jallp'ankuman kutiponqanku, sapa uj jallp'asninkuman ayqekuspa.

Israelpa kutipusqan

¹⁷ Israelqa uj chinkasqa oveja jinamin, leonespa qhatiykachasqan. Ñaupajtaqa Asiriamanta reyraj mikhuykorqa. Chaymanta Babiloniamanta rey Nabucodonosorñataj tullusninta k'utuykorqa.

¹⁸ Chayrayku, noqa Tukuy Atiyniyoj Señor Israelpa Diosnin nini: Babiloniamanta reyta noqa jasut'isaj, jinataj nacionestapis, imaynatachus Asiriamanta reyta jasut'erqani, ajinata.

¹⁹ Israel aylluy jallp'anman kutipunanta saqesaj, imaynatachus ovejapaj ashkha pastos tiyan ajina, Carmelopi, Basami, Efraimpa orqosnimpi, Galaadpi ima.

²⁰ Noqa Señor nillanitaj: Chay p'unchaykunapeqa Israel aylluwan, chantá Judá aylluwan millay ruwasqasninkumanta, jinataj juchasninkumantapis kacharichisqas kanqanku, imaraykuchus noqa chay kausashajta saqerqani chaykunata perdonapusaj.

Babilonia atipachikun

²¹ Merataim llajtata jap'ej wichariychej, jinataj Pecodpi tiyakojkunatapis. Qhatiykuspa tukuyninkuta wañurachipuychej. Tukuy imata kamachisqayman jina ruwaychej. Noqa Señor chayta kamachini.

²² Tukuy jallp'api may maqanakuy ch'ajwa uyarikun, may sinch'i wañuchinaku.

²³ Tukuy kay pachaj martillon Babiloniaqa ñut'u p'akisqa rikhurin. Nacionesqa mayta mancharikunku, Babiloniata chay imas qhatirisqanta rikuspa.

²⁴ Babilonia llajta, qampaj tojllata churarqani, mana allinta qhawakusqaykiraykutaj chayman urmaykorqanki. Chaypi presochasqa qhepakorqanki, Señorpa contrampi oqharikusqaykirayku.

²⁵ Señorqa armas jallch'ana wasista kicharerqa, phiñakuy armasninta orqhomorqa, imaraykuchus kaymin Tukuy Atiyniyoj Señorpa ruwaynenqa caldeo runaspa jallp'ampi.

²⁶ Tukuynejmanta contrampi maqanakoj jamuychej. Mikhuy poqoj jallp'asninkuta kichariychej. Tukuy imasta tantaykuspa ninawan jap'iykuchiychej, ama imapis qhepakunampaj.

²⁷ Tukuy soldadosninta wañuchiychej, wañuchina cheqaman apaychej. Paykunapajqa uj llakiy, p'unchayninku chayamun jasut'ichikunanku rato.

²⁸ Babiloniamanta ayqempojkunaqa Sión orqoman willaspa chayamunku, imaynatachus Señor Diosninchej Babiloniaman aynita kutichisqanrayku, imaynatachus Diosta yupaychana wasita ruwasqanman jina.

²⁹ Wajtamuychej tukuy wach'inasniyojkunata, Babiloniata jap'ej yaykunankupaj. Llajtaj tukuy muyuynimpi jarakuychej ama pipis ayqenampaj. Imatachus ruwasqasninman jina qopuychej, imaraykuchus paypis ruwasqanan jina ruwaychej. Payqa noqawan ayñanakullawampuni, noqa Israelpa Señor Santo Diosninwan.

³⁰ Chayraykumin wayna runasninkoqa callespi wañusqas urmaranqanku, ch'ajwapi tukuy maqanakojkunasninkupis chay p'unchaypi wañuranqanku. Noqa Señor chayta nini.

³¹ Tukuy Atiyniyoj Señor nin: Phiñankuta mask'aj nación contraykipi noqa kashani; jasut'inasuy chay p'unchayqa chayamunña.

³² Qan phiñanakuta mask'aj nación misk'aspa urmanki, manataj pipis uyarikoj kanqachu. Tukuy llajtasniykiman ninata jap'iykuchisaj, chay ninataj tukuy muyuynintinta ruphaykonqa.

³³ Tukuy Atiyniyoj Señor nin: Israel ayllu, jinataj Judá ayllupis may ñak'arichisqas kashanku. Enemigosninku presosta jap'iykakapunku, manataj kachariyta munankuchu.

³⁴ Jinapis chay kacharichejnenqa may kallpasapamin, sutintaj Tukuy Atiyniyoj Señor. Paymin cheqanchanqa; sonqo tiyasqa kaytapis jallp'ankuman apamonqa. Babiloniapi tiyakojkunaman manchachikuyllata apachimonqa.

³⁵ Señorqa nin: Babiloniapaj maqanaku, chaypi tiyakojkunapajwan; kuraj runasninkupaj, yachayniyoj runasninkupajwan.

³⁶ Adivinajkunapaj; maqanakoj lojt'usman tukuchunku. Soldadosninkupaj maqanaku; manchachikuywan kharkatitichunku.

³⁷ Caballosninkupaj, carrosninkupajpis maqanaku kachun, pagamanta kajkuna soldadosninkupajpis maqanaku kachun, warmisman jina tukuchunku. Qhapaj kapuyninkupaj maqanaku kachun, suwakapuchunkutaj.

³⁸ Yakuyoj mayusninkupaj maqanaku kachun, ch'akipuchunkutaj. Babiloniaqa millay lantisniyoj jallp'amin, kunanqa chayraykumin yuyayninta chinkachin.

³⁹ Chayraykumin Babiloniapeqa osqhollus, chantá atojkunapis thapachakonqanku, chay cheqallapitaj surispis kausanqanku, chaypitaj manaña pipis ni jayk'aj tiyakonqachu.

⁴⁰ Sodoma, chantá Gomorra, jinataj chay qayllampi llajtasnin ima, phirisqa qhepakonqa. Manañataj chaypi pipis tiyakonqachu, nitaj ñan purejkunapis jarakonqankuñachu. Noqa Señor chayta nini.

⁴¹ Wichay karu jallp'asmantapacha uj atiyniyoj nación ashkha reykunasniyojtaj jamunampaj wakichikamushan.

⁴² K'uru wach'inaswan, jinataj fierro t'ojsinaswan wakichisqasña kashanku. Sajras mana uj chhikan khuyakuyniyoj kanku. Qhaparqachasqasninkoqa mar qochaj qhollchoqeyasqan jina, caballospi lloq'asqastaj rishanku. Ñapis Babiloniaj contrampi maqanakuman yaykunankupajña kashanku.

⁴³ Babiloniamanta reyrí, kay imasta yachaytawankama mancharikuywan mana imanakuyta aterqachu. Ñak'ariypi, nanaypitaj kasharqa uj onqokoj warmi jina.

⁴⁴ Imaynatachus uj león Jordán mayu qhoras ukhumanta llojsimuspa q'omer pastorman phinkiykun, ajinata noqapis jamusaj, Babiloniamanta kajkunatataj chaynejmanta ayqechisaj, noqa ajllakusqay runaswantaj kamachichisaj. Pitaj noqaman kikinchakuyta atinmanri? Pitaj maqaj sayaykuwanmanri? Mayqen michejtaj ñaupaqeyman sayaykamuwanmanri?

⁴⁵ Uyariychej: Noqa Señor uj ruwayta Babiloniaj contrampi ima ruwaytachus umachakusqaytataj, wakichikusqaytataj caldeo runaspa jallp'ankoj contrampi. Aswan juch'uy kaj corderostapis apakaponqanku, kikin q'omer pampasninkupi q'arasllataj kanqa.

⁴⁶ Babilonia llajtaj urmaykusqanqa karuman uyarikonqa, jallp'atapis kharkatitichenqa, qhaparachasqasninkupis waj nacioneskama uyarikonqa.