Jeremías 49 - Qheshwa Biblia DC

Amonitaspa contrampi willay

¹ Señormanta uj willay jamun, Amón imaynatachus kananmanta: Maypitaj kashanku Israel runaspa wawasninri? Maypitaj kashanku chayaqeykita jap'ikusojkunari? Imaraykutaj dios Milcomña kunan Gadmanta dueño kashanri? Imaraykutaj amonitasqa llajtankupi tiyakushankuri?

² Kunanqa noqa Señor kayta nini: Uj p'unchay chayamonqa maypachachus Rabamanta amonita llajta uyarinan, maqanaku qhapariyta, chaytaj uj qollu raqaykunasllamanña tukuchisqas kanqanku, chay k'iski ranchosninkutaj ninapi larwaykunaspi k'ajarenqanku. Chaypacha Israelqa chay llajtasninta watejmanta jap'ikapullanqataj. Noqa Señor chayta nini.

³ Hesbón llajta waqay, Hai llajtaqa phirisqaña kashan. Rabamanta warmis, sinch'ita waqaraychej. Llakiy p'achawan p'achallikuychej, pechoykichejta takakuychej. Locas jina correykachaychej, ukhuykichejta nanarachikuychej. Milcom nisqa dios waj llajtaman wijch'usqa kashan, tukuy sacerdotesnintin, jinataj allichaj runasnintin.

⁴ Imaraykutaj kallpayoj kasqaykimanta runaykachankiri? Kallpaykeqa ña tukusqaña, qan mana kasukoj llajta. Qanqa atienekunki qhapaj kayta tantasqallaykipi, ninkitaj: Pitaj noqata jap'ikapuwanmanri?, nispa.

⁵ Noqa tukuynejmanta sinch'i manchachikuyta pataykiman apachimusaj. Noqa Tukuy Atiyniyoj Señor chayta nini. Qankunamanta sapa ujniykichej kaynejman, jaqaynejman ch'eqerachisqas llojsinkichej. Manañataj pipis watejmanta tantaykunasuykichejpaj kanqachu.

⁶ Chantá qhepamanqa Amón allajtaj runasninta kutichimpusaj. Noqa Señor chayta nini. Edomitaspa contrampi willay.

⁷ Tukuy Atiyniyoj Señormanta willay, Edóm runas imaynachus kanankumanta. Manañachu Temán llajtapi yachayqa tiyan? Manañachu yachanku chay sumaj yachayniyoj runas imastachus ruwanankutaqa? Yachayninkoqa tukukapunchu?

⁸ Dedampi tiyakojkuna usqhay usqhayta ayqeychej. Rispa sumajta pakakamuychej, imaraykuchus Esaój ayllunta chinkachisaj, jasut'inay p'unchayqa chayamunña.

⁹ Maypachachus uvas poqoyta oqharinkichej chayqa, wakin chhullchusqa qhepakumpuni. Maypachachus ch'isimpi suwas chayanku chaypachaqa, maychus pisichikusqankuman jinalla aparikunku.

¹⁰ Jinapis noqa Esaój aylluntaqa mana imayojta saqeni, chay pakakunasninta tariykuni, manañataj pakakuyta atinchu. Wawasnin, ayllusnin, vecinosnimpis tukuyninku phirisqas karqanku; manaña pipis kayta nejqa karqachu.

¹¹ Saqeway wajcha wawasniykita, noqa qhawapusqayki, warmi sapasniykipis noqaman atienekuwachunku.

¹² Señorqa nin: Sichus jaqay pichus mana jasut'i yurupaj jinachu karqanku, chaykuna ujyallarqankutaj chayqa, mana qhepakunkichu mana jasut'isqa kaspaqa, manachayqa chay vasomanta ujyanallaykipuni tiyan.

¹³ Noqa Señor sutiyrayku juraykichej: Bosra llajtaqa ch'impacha qhepakonqa, wajkuna manchachikunankupaj k'umuykachachisqa, jinataj maldicisqa kanqa. Chay waj llajtastaj wiñaypaj raqaykunasllaña qhepakonqanku.

¹⁴ Señormanta uj willay chayamuwan, naciones ukhupi uj kacha qhaparishasqanta: Tantaykukuychej, Edompa contrampitaj puririychej, maqanakuypajtaj wakichikuychej.

¹⁵ Tukuy ayllumanta aswan juch'uyta noqa ruwasqayki, runas ukhupitaj aswan qhesachasqa kanaykita.

¹⁶ Qan mayta runaykachasqaykirayku ch'aukiyachikorqanki, imaraykuchus mancharikuyllata chimpachej kanki. Qanqa chhanka k'ajllusllapi kausakoj kanki, orqoj puntasninmanta jap'ikuspa. Anka jinapis may altopi thapachakuy, chaymantapis uraykuchimusqayki. Noqa Señor chayta nini.

¹⁷ Señorqa nin: Edom naciompa urmaynenqa may jatun kanqa tukuyta mancharichinampaj jina, tukuy chaynejta pasaj t'ukonqa chay jasut'ita rikuspa.

¹⁸ Sodoma, Gomorra jinataj kanqa, chantá chay muyuynin llajtas thuñisqas karqanku, ajinata. Manataj pipis chaypi watejmanta tiyakonqañachu, ni uj ratollapajpis.

¹⁹ Mana yuyasqaykichej ratopi jamusaj, imaynatachus uj león llojsimun Jordán mayu cantopi ch'umimanta ajinata, maypicharí q'omer pastos kashanku chayman. Edonmanta kajkunatataj chaymanta ayqechisaj, pitacharí noqa ajllasaj chayta kamachinampaj churasaj. Pitaj noqaman ninakuyta atinmanri? Pitaj noqaman sayaykuyta atinmanri? Mayqen michejtaj ñaupaqeyman churanakoj jamuwanmanri?

²⁰ Uyariychej, noqa Señor imatachus wakichikushasqayta Edompa contrampi; Temampi tiyakojkunaj contrampi imatachus yuyasqayta: Aswan juch'uy corderostapis apakaponqanku, chay ch'iki pampastataj chinkachenqanku.

²¹ Edompa urmasqanqa sinch'ita sonanqa jallp'ata kharkatichinankama, yanapata mañakuspa qhaparikonqa, chay qhaparisqantaj Puka Mar qochakama uyarikonqa.

²² Bosraj contrampi uj enemigo oqharikonqa, imaynatachus uj anka lijrasninta kichariytawan oqharikun, ajinata. Chay p'unchaypeqa Edompa maqanakojkunasnin kharkatitenqanku onqokoj warmi jina.

Damascoj contrampi willay

²³ Damasco llajta imaynachus kananmanta: Hamat, jinataj Arfad llajta p'enqasqas kashanku, llakiy willaykuna paykunaman, chayasqanrayku, mancharikuywan junt'asqas kanku, manataj kakuyta atishankuchu.

²⁴ Damasco runasqa manaña kallpayoj kaspa ayqej tukunku, sinch'i t'ukuyllawanña atipachikunku, jinataj ñak'ariywan nanaywantaj, onqoj warmej nanayninwan jina.

²⁵ Chay may jina uyarisqa llajta, chay kusiy llajta qonqasqa qhepakun.

²⁶ Chay p'unchaypi wayna runasnin callespi mast'alla qhepakonqanku, tukuy ch'ajwapi maqanakojkunasnintintaj wañonqanku. Noqa Tukuy Atiyniyoj Señor chayta nini.

²⁷ Damasco llajtaj perqasninman ninata jap'iykuchisaj, chay ninataj Ben-adadpa palaciosninta q'olaykuspa tukuchenqa.

Cedar llajtaj Hazor llajtaj contrampi uj willay

²⁸ Señormanta willaykuna, Cedar llajtamanta runaspaj, Hazorpa kurajkunasnimpajwan, chaykunatamin Babiloniamanta rey Nabucodonosorqa atiparqa. Ñaupajman riychej, Cedar llajtata jap'ej yaykuychej. Chay inti llojsimuynejmanta kaj aylluta tukuchiychej.

²⁹ Jap'ikapuychej toldosninkuta, uywasninkuta, lomasninkuta tukuy imasninku kajta ima. Camellosninkutapis qhechuychej, qhapariychejtaj: Sinch'i mancharikuylla tukuynejpi tiyan, nispa.

³⁰ Hazorpi tiyakojkuna usqhayta ayqeychej. Rispa allinta pakakamuychej. Noqa Señor chayta nini. Babiloniamanta rey Nabucodonosorqa qankunaj contraykichejpi sajra ruwaykunata wakichikunña.

³¹ Noqa Señor kamachiykichej: Chay llajtata jap'ej yaykullaychej, payqa atienekuspa mana imata manchachikuspa tiyashan, jinapis mana punkusniyoj, mana wisq'anasniyojtaj sapallan kashan.

³² Camellosninkuta, tukuy uywasninkutapis suwarpariychej. Tukuynejman noqa paykunata ch'eqerachisaj, chay umasninkuta ruthukoj runasta; tukuynejmanta may ñak'ariykunasta paykunaman apachmusaj. Noqa Señor chayta nini.

³³ Hazor llajtaqa ch'inman tukuchisqa kanqa, atojkunaj tiyakunallanña kanqa. Mana pipis chaypi tiyakonqañachu, nitaj ñan purejkunallapis chaypi qhepakonqankuñachu.

Elam llajtaj contrampi willay

³⁴ Maypachachus Judapi Sedequías kamachiyta qallarisharqa, chaypacha Señorqa Jeremiasman parlaykorqa Elam llajta imaynachus kananmanta willaspa:

³⁵ Noqa tukuy atiyniyoj Señor nini: Elam runaspa wach'inasninkuta noqa p'akisaj, imaraykuchus chaykunaqa payta kallpachashanku.

³⁶ Kay llajtaman tawantin cheqanejmanta apachimusaj sinch'i wayrata, tukuynejman ch'eqerachinampaj, mana uj llajtallapis puchonqachu mana ayqekusqankoqa.

³⁷ Elam llajtata chay enemigosnimpa ñaupaqempi kharkatichisaj, may ñak'ariykunasta, may k'ajaj phiñakuyniytawan paykunaj patankuman apachimusaj. Apachimullasajtaj maqanakuyta paykunata chinkachinaykama. Noqa Señor chayta nini.

³⁸ Kamachina tiyanayta Elam llajtapi churasaj, reyesninkuta, kurajkunasninkutataj wañuchisaj. Noqa Señor chayta nini.

³⁹ Jinapis jamoj p'unchaykunapeqa mana aswan allinman noqa tukuchisaj, Elam runasta llajtankuman kutichimpusaj. Noqa Señor chayta nini.