Jeremías 48 - Qheshwa Biblia DC

Moab runasta imaschus qhatirinanmanta

¹ Israelpa Tukuy Atiyniyoj Señor Diosnin nichin Moab jallp'api imaschus kananmanta: Ay Nebo llajtamanta. Llakiyta phirisqa kashan. Quiriataim llajta jap'isqa karqa, k'umuykachachisqataj. Pakakuna wasisnimpa pampanman urmachisqa karqa.

² Moab llajtaj runaykachaynenqa tukukunña. Hesbón llajtapi enemigosnenqa umachakuspa wakichikunku, Moabta imaynamantachus chinkachinankuta. Qampis, Madmén phirisqallataj kanki, maqanakupis qhepallaykitapuni jamonqa.

³ Horonaimmanta qhapariykunas llojsimun: Urmachisqa, phirisqataj.

⁴ Moab llajtaqa raqaykunasllapiña; nanaywan qhaparqachasqasninku Zoar llajtakama uyarikun.

⁵ Ñawisninkumanta waqaykunas sut'ushan wicharinku Luhit chay wichayta, chay ñak'ariyta rikuspa qhaparinku, Horonaimman uraykamojkuna.

⁶ Ayqeychej. Pichus atejqa salvakuchun. Ch'in pampapi khishka jinataj kachunku.

⁷ Moab, qanqa kallpallaykipi atienekorqanki, jinataj qhapaj kaynillaykipi, jinapis qampis jap'isqallataj kanki. Quemós diosniykeqa waj llajtaman wijch'usqa kanqa sacerdotesninwan khuska, sumachaj runasninwan ima.

⁸ Chay phirisqas kanankoqa tukuy llajtasman chayanqa, manataj ujllapis puchonqachu; chay ura pampasnin jinataj chay pata pampasnimpis raqaykunasllaña qhepakonqanku. Noqa Señor chayta nini.

⁹ Moab ayllu chinkachisqa kanqa. Chayrayku uj yuyarikuna qelqasqayoj apachita rumita churaykapuychej; llajtasnimpis raqaykunasllaña qhepakonqanku, manataj ujpis chay tiyakoj kanqañachu.

¹⁰ Maldicisqa kachun pichus mana tukuy sonqowan Señorpa nisqanta ruwajqa. Maldicisqa kachun pichus wañuchinakuman mana yaykuyta munajqa.

¹¹ Moabqa sonqo tiyasqa kayllapipuni kausakorqa, mana jayk'ajpis jallp'anmanta wijch'usqachu karqa. Imaynatachus vinota ch'uwachinku, manataj uj vasomanta waj vasoman jaywarankuchu, chayraykumin mana jayk'ajpis misk'i kayninta, nitaj q'apayninta chinkacherqachu.

¹² Jinapis Señorqa nin: Uj p'unchay chayamonqa maypachachus runasta kachamusaj chay vinota waj yurusman jich'anankupaj, ch'usaj kajtinkutaj phirinankupaj.

¹³ Chaypacha Moabqa Quemós diosnnejta ch'aukiyasqa rikhurenqa, imaynatachus Israelpis Betelwan ch'aukiyachikorqa ajinata, mayqempichus tukuy sonqowan atienekorqa.

¹⁴ Moabqa ama nichunchu, may wapus kayku, kallpasapas, maqanakojkunastaj kayku, nispaqa.

¹⁵ Chayamushanña Moabta, llajtasnintapis phirejqa; aswan allin wayna runasnimpis wañuranqanku. Chay reyqa nin, sutenqa Tukuy Atiyniyoj Señor.

¹⁶ Moabpa chinkachisqa kananqa qayllapiña, ña chayamushanña chay ñak'ariynenqa.

¹⁷ Moabpa muyuynimpi kajkunaqa khuyakuychej, mentasqa kasqanta yachajkunapis niychej: Qhawaychej imayna rijch'ajtachus urmasqanta, may k'achitu kayninwan, may sinch'i kayninwantaj.

¹⁸ Qan Dibón llajta chay k'achitu tiyanaykimanta uraykamuy, ch'aki pampanejpitaj tiyaykukuy; Moabta chinkachejqa qampa contraykipi jamushan, paytaj chay pakakunayki wasista thuñenqa.

¹⁹ Aroer llajta ñanmanta uj ladopi sayaykukuspa qhapariy, chay puchojkunatataj imachus kasqanta tapuriy.

²⁰ Moabqa may k'umuykachachisqa, mancharisqataj kashan. Paymanta nanaywan waqaychej. Arnón mayupi willamuychej Moabqa chinkachisqa kasqanta.

^21-24 Chay jasut'eqa chayamorqa pata kaj pampasnimpi kaj llajtaspa contrampi: Holonman, Jahazaman, Mefaatman, Dibonman, Neboman, Bet-diblataimman, Quiriataimman, Bet-gamulman, Bet-meonman, Queriotman, Bosraman, jinataj Moabpa qaylla kaj llajtasninman, chantá karupi kaj llajtasninmampis.

²⁵ Señor nillantaj: Moabpa kallpanqa llauchhuyasqa, atiynimpis t'unasqa.

²⁶ Moabta machaykuchiychej, imaraykuchus Señorpa contrampi oqharikorqa. Chaypacha Moabqa ajtuykusqampi sunt'enqa, tukuytaj paymanta asiykukonqanku.

²⁷ Manachu qanqa Moab Israelmanta alqochakorqanki, payta chejnikuspataj parlaj kanki suwapis kanman jina?

²⁸ Moabpi tukuy tiyakojkuna llajtasta saqeychej; chhanka jusk'usman tiyakoj ayqeychej, imaynatachus chay chhanka jusk'uspi palomas thapachakuspa tiyakunku ajinata.

²⁹ Moabpa mayta runaykachayninta rejsiyku, wapuykachaj kasqanta, phiña runa kasqanta, sinch'i runaykachaj kasqantawan.

³⁰ Señorqa nin: Noqa rejsini runaykachasqanta, parlasqanqa qhasi manakajlla, ruwasqampis mana imapaj allinchu.

³¹ Chayrayku Moab llajtapi tukuy runasrayku, qhaparispa paran paranta waqasaj, jinallataj Kir-harespi runasraykupis.

³² Sibmapi uvas huerta, qanmanta mayta waqasaj, Jazermanta astawan. Ramasniykeqa mar qochamanta astawan jaqayman, Jazer llajtakama aysakorqanku. Jinapis kunanqa uvas cosechaykeqa allin phirisqas qhepakunku.

³³ Moab t'ika huertasmantapacha, manaña kusikuywan qhapariykuna uyarikunchu. Vino jallp'aspi vinopis tukukapunña, manaña pipis uvasta sarojqa kanchu, manañataj kanchu kusiy takiykunapis.

³⁴ Hesbón runas nanaywan qhaparinku, chaytaj uyarikun Elealekama, Jahazakama, Zoarmanta, Horonainkama, Eglat-selisiyakamataj, imaraykuchus Nimrim nisqapi yaku juturispis ch'akipunku.

³⁵ Señorqa nillantaj: Noqa Moabmanta runasta tukuchisaj, paykuna orqosman wicharinku chay lanti wasisninkuman, rikuchikusta, inciensostawan dioskunasninkuman jaywamunankupaj.

³⁶ Chayrayku sonqoyqa Moabrayku waqan, Kir-harespi runasrayku ima, qenaspa llakiy waqayninwan, chay qhapaj kaykunasninta, imaraykuchus tantasqa qhapaj kapuynenqa chinkaporqanku.

³⁷ Tukuyninku umasninkuta ruthukunku, tukuypa sunkhasninkupis q'arasllataj; tukuyninku makisninkuta khuchurakunku, qhasqa p'achaswantaj p'achallikunku.

³⁸ Moab wasi pataspi, tukuynin callesnimpipis waqaykunallaña uyarikun. Noqa Moabta t'unata ruwarqani, imaynatachus mana walej yuruta t'unanku ajinata. Noqa Señor chayta nini.

³⁹ Moab llajtamanta waqaychej, manchachikuywan junt'a kashan. P'enqayta wasanta kutiricherqa, tukuy muyuynimpi kajkunaj ñaupaqempi millay qhesachasqaman tukurparerqa.

⁴⁰ Señorqa nerqa: Moab runaspa enemigon anka jina lijrasnin kicharisqa paypa contrampi kachaykukun.

⁴¹ Llajtas chantá pakakuna wasispis urmanqanku enemigospa makisninman. Chay p'unchaypi Moabpa maqanakojkunasnin kharkatenqanku, imaynatachus onqokoj warmi nanaywan kharkatin ajinata.

⁴² Moabqa mana nacionñachu kanqa, imaraykuchus Señorqa contraypi oqharikorqa.

⁴³ Chayrayku noqa Señor nini: Moab jallp'api tiyakojkunaqa kanqanku, imaynatachus k'ita animales qhatiykachasqas kanku ajina, chayri t'oqoman, tojllaman urmaykunankumanta qayllapi.

⁴⁴ Pichus chay jap'ejkunamanta ayqekojqa t'oqoman urmaykonqa, pichus t'oqomanta llojsimojrí tojllamanñataj urmaykonqa, imaraykuchus noqa Moabpa patanman chay jasut'ikunan tiempota apachimusaj.

⁴⁵ Wakinkuna ayqenku mana kallpayojllaña kaspa Hesbompa llanthunman pakakunata mask'aspa. Jinapis, Hesbonqa chay rey Sehompa llajtan nina lauraypi kashan, ninataj astawan aysakun, Moabpa orqosninta ruphaykunankama, chay qhollpikoj runasta.

⁴⁶ Ay, qanmanta Moab llajta. Quemós llajta kichasqaña kanki. Qhari wawasniykita, warmi wawasniykitapis jallp'ankumanta apakaponqanku.

⁴⁷ Jinapis tukukuypiñaqa noqa Moabpa runasninta kutichimpusaj. Noqa Señor chayta nini. Kaymin chay Moabpa contrampi Señorpa jasut'iynenqa.