Jeremías 47 - Qheshwa Biblia DC

Filisteospa contrampi willay

¹ Kaymin chay willayqa, mayqentachus Señorqa Jeremiasman parlaykorqa, filisteosta imaschus qhatirinanmanta, manaraj faraón Gaza llajtata jap'ishajtin, nerqa:

² Señorqa ajinata nin: Wichaynejmanta yaku junt'aykamun, imaynatachus mayumanta wasaykuspa tukuynin jallp'ata, tukuynin chaypi kajmantaj llump'irispa llajtasman, chaypi kajkunamampis junt'aykun ajinata. Tukuy chay jallp'api tiyakojkuna qhaparinku, runaspis nanaywan ayqonku,

³ caballospa corresqanta uyarispa, carretaspa loqhoqeyasqanta, jinataj ruedaspa purisqantapis. Tataspis wawasninkuta saqerparinku, kallpanku pisiyasqanrayku.

⁴ Filisteosta urmachina p'unchay chayamunña, Tiromanta, jinataj Sidonmanta yanapajninkuta qhechunku chay p'unchaypis. Arí, Señorqa filisteosta tukuchenqa, Creta churupi llajtamanta yaykumojkunata.

⁵ Gaza llajtamanta runasqa chujchasninkuta ruthukunku. Ascalón llajtamanta runasqa upayasqas qhepakunku. Chay ñaupa jatun karay runasmanta puchojkuna, mayk'ajkamataj ukhuykita llik'irakunki llakiyniykita rikuchispari?

⁶ Ay, Señorpa espadan, mayk'ajkamallataj samarikunkiri? Jallch'anaykiman yaykupuy, amaña kuyukuspa kakuy.

⁷ Chantá imaynatataj mana kuyukuspa qhepakunmanri? Sichus Señorpuni kamachin chayqa, payta kachan Ascalonta, jinataj chay mar qocha cantompi kajkunatapis maqamunanta chayri?