Jeremías 46 - Qheshwa Biblia DC

Carquemispi Egipto atipachikun

¹ Señorqa Jeremiasman parlarqa naciones imaynachus kananmanta.

² Kaymin karqa Egiptoman chay willayqa, astawanqa Egiptomanta rey faraón Necaopa soldadosninman jina, chaypacha Eufrates mayu qayllapi kasharqanku chay Carquemis llajtapi, paytamari Babiloniamanta rey Nabucodonosorqa atipaykorqa Josiaspa wawan Judamanta rey Joacim tawa watastaña kamachishajtin.

³ Escudosta wakichikuychej, Maqanakojtaj phinkiykuychej.

⁴ Caballosta karonaykuychej. Caballospi purejkuna lloq'aykuychej. Monterasniykichejta churakuychej, sinrullataj sayaychej, lanzasniykichejta filochaychej, pechoquerastataj churakuychej.

⁵ Jinapis imatataj rikuniri? May mancharikuywan kutiripunku. Maqanakojkunasninkoqa atipasqas kaspa ch'eqeranku, usqhay usqhaytataj ayqerapunku qhepaman qhawarikuspa. Tukuynejpi mancharikuylla tiyan. Noqa Señor chayta nini.

⁶ Mana chay sinch'i chakispis ayqeyta atinkuchu, aswan kallpayojkunasnimpis manallataj ayqeyta atinkuchu. Patanejpi Eufrates mayu qayllaspi misk'akunku, urmankutaj.

⁷ Pitaj chay wiñay Nilo mayu jinari, sinch'i correj yakusniyoj jinari?

⁸ Egiptomin, Nilo mayu jina wiñajqa, sinch'ita correj yakusniyoj mayu jina. Egiptoqa nin: Astawan wiñaykusaj, jallp'amantaj junt'aykusaj, llajtasta, chaypi tiyakojkunasnintawan phiriykusaj.

⁹ Caballospi rejkuna ñaupajman richunku. Carretaspi kajkuna ñaupajman riychej. Maqanakojkuna puririchunku. Etiopiamanta, Libiamantawan escudoswan wakisqa soldados kajkuna, Libiamanta kaj soldados, wach'inasta allinta apaykachajkunapis.

¹⁰ Tukuy Atiyniyoj Señorpa p'unchaynenqa kaymin, chay p'unchaypi Pay tukuy enemigosninwan pagachikonqa. Espadaqa manaña atinankama t'ojsenqa paykunaj yawarninwantaj machaykonqa. Tukuy Atiyniyoj Señorqa maytapuni wañurachenqa patanej jallp'aspi, Eufrates qayllapi ima.

¹¹ Egiptopi kaj runas Galaadman wichariychej jampita mask'aspa. Qhasi manakajllata ashkha jampista ujyanki, manaña qampajqa jampi kanchu.

¹² Naciones yachankuña may k'umuykachisqa kasqaykita, tukuynin jallp'api qhaparisqayki uyarikun; ch'ajwapi maqanakojkuna ujkuna ujkunawan takanakunku, khuskataj pampanejta urmanku.

Nabucodonosorqa Egiptoman yaykun

¹³ Señorqa profeta Jeremiasman parlarqa, maypachachus Babiloniamanta rey Nabucodonosor Egiptoman tiyakoj risharqa chaypacha.

¹⁴ Willaraychej Egiptopi, Migdolpi, Menfispi, Tafnespipis: Qhawaychej, wakichisqas kaychej. Espadaqa muyuyniykichejpi t'ustita ruwaran.

¹⁵ Imaraykutaj yupaychana Apis toroykichej ayqerqari? Imaraykutaj sayasqallapi mana kakuyta aterqachuri? Imaraykutaj noqa Señor payta urmacherqaniri?

¹⁶ Soldadosniyki misk'akunku, urmankutaj, ujkuna ujkunamantaj ninakunku: Kaymanta jaku ripunachej, kutipunachej jallp'anchejman, chay nacekusqanchej jallp'aman. Sinch'i maqanakuy ch'ajwayninmanta ayqenachej.

¹⁷ Churakuy kay sajra sutita, Egiptomanta rey faraonman, jinapis manaraj tiempompi anchata ch'ajwan.

¹⁸ Noqa rey kani, sutiytaj Tukuy Atiyniyoj Señor, kausayniyrayku juraykichej: Tabor jina, tukuy orqosmanta aswan jatun kaj, Carmelo orqotaj mar qocha cantopi aswan oqharisqa, ajinatamin jamushan chay enemigoqa.

¹⁹ Wakichikuychej Egiptopi tukuy tiyakojkuna jallp'aykichejmanta wijch'usqas kanaykichejpaj. Menfis llajtaqa ch'in nisqaman tukuchisqa kanqa ama pipis tiyakunampaj jina raqaykunasllaman tukuchisqa kanqa.

²⁰ Egiptopi uj china malta wakaman rijch'akun. Uj jatun ch'uspi wichaynejmanta jamuspa wach'in.

²¹ Pagasqa soldadosnimpis waka uñas jina wirasllataj kanku, jinapis paykunaqa usqhay usqhayllata ayqenqanku manaña sayayta atispa. Ñak'arichisqas kanankoqa chayamunña, jasut'isqas kananku chay ratopis.

²² Egiptoqa katari jina silbashaj ayqenqa soldados qayllaykamojtinkukama, sach'asta k'utojkunapis kankuman jina jamojtinku.

²³ Chay sach'asninta k'utukaponqanku. Noqa Señor chayta nini. Langostasmanta aswan ashkhas karqanku, manataj pipis yachayta aterqachu.

²⁴ Egipto k'umuykachachisqa kanqa. Urmanqankutaj wichaynejmanta jamoj runaspa atiynin uraman.

²⁵ Israelpa Tukuy Atiyniyoj Señor Diosnin nin: Amonta, Tebaspa diosninta, Egiptota dioskunasnintinta, reykunasnintapis jasut'isaj, faraonta, chanta paypi atienekojkunatapis.

²⁶ Babiloniamanta rey Nabucodonosorpa atiynin uraman urmanankuta saqesaj, chay wañuchejkunaj enemigosninkoj atiynin uraman, jinallataj reypa runasnimpa atiynin uraman. Jinapis, Egiptopi qhepa p'unchaymantawan ñaupajpi jina runas tiyakaponqanku. Noqa Señor chayta nini.

Señorqa ayllunta salvanqa

²⁷ Kamachiy Jacobpa ayllun, ama mancharikuychu. Ama manchachikuychu, Israel. Qanta jinataj wawasniykitapis noqa kacharichisaj chay karu jallp'aspi wijch'usqas kashanku chaymanta. Watejmanta sonqo tiyasqa kausakunki ni pejpa nisqan.

²⁸ Noqa Señor nini: Ama manchachikuychu kamachiy Jacobpa ayllun, imaraykuchus noqa qanwan kashani. Maykunamanchus ch'eqeracherqayki chay tukuy nacionesta phirisaj. Jinapis qantaqa mana chinkachisqaykichu, manachayqa k'amisqayki imaynatachus juchallikusqaykiman jina, chaywampis mana saqesqaykichu mana jasut'ita qospaqa.