Jeremías 38 - Qheshwa Biblia DC

Jeremiasta ch'aki yaku pujyuman wijch'uykunku

^1-2 Matampa wawan Sefatías Pasurpa wawan Gedalías, Seleniaspa wawan Jucal, Malaciaspa wawan Pasur ima, tukuy runaspa ñaupaqempi Jeremiaspa parlasqanta uyarerqanku, kay jinata: Señor nin: Pichus llajtapi qhepakojqa maqanakupi wañonqa, chayri onqoywan, chayri yarqhaywantaj. Pichus caldeosman ripojrí kausayninta salvanqa.

³ Señorqa nin: Kay llajtaqa Babiloniamanta reypa soldadosnimpa makinman urmanqa. Pay jap'ikaponqa, manataj pipis jark'ayta atenqachu.

⁴ Chaypacha chaypi kurajkuna reyman nerqanku: Kay runata wañuchinachej, imaraykuchus chay tukuy nisqasninwanqa llajtanchejpi qhepakunkuraj chay soldadosta iskayrayachin, jinataj chay tukuy runastapis. Kay runasqa mana kay aylloj allin kaynintachu mask'an, manachayqa mana allin kaynillantapuni.

⁵ Rey Sedequiasqa paykunaman kuticherqa: Walej, munasqaykichejman jina payta ruwaychej. Noqa mana imatapis contraykichejpeqa ruwaymanchu.

⁶ Chaypacha paykunaqa Jeremiasta jap'iytawan kuraj Malquiaspa pujyunman wijch'uykorqanku, chaytaj cárcel patio chaupipi kasharqa. Ch'ankullaswan uraykucherqanku. Chay pujyupeqa mana yaku karqachu, manachayqa t'urulla kasqa, chaypitaj Jeremiasqa t'uruman sat'iykukorqa.

⁷ Etiopiamanta uj runa Ebed-melec sutiyoj reypa palaciompi kasharqa. Chaytaj uyarisqa Jeremiasqa yaku pujyuman wijch'uykusqa kasqanta. Chay ratopi reyqa uj tantakupi kasharqa, Benjamimpa punkun nisqapi.

⁸ Chaypacha Ebed-melecqa reypa palacionmanta llojsispa reyta parlapayamoj rerqa:

⁹ Sumaj reyníy. Chay runasqa Jeremiaspaj mana allintachu ruwanku. Uj yaku pujyuman wijch'uykunku, chaypitaj yarqhaymanta ch'ayñashan, imaraykuchus llajtapi t'antaqa mana kanñachu.

¹⁰ Chay ratopacha reyqa Ebed-melecta kamacherqa kinsa chunka runasta pusariykukuspa orqhomoj rinanta, Jeremías amaraj chay pujyupi wañushajtin.

^11-12 Ebed-melecqa chay runasta pusariykukuspa palacioman rerqa. Chay p'acha jallch'ana wasimantataj mauk'a p'achasta orqhomuspa ch'ankullaspi pujyu ukhupi Jeremiasman kachaykorqa, nerqataj: Chay p'achasta wallak'uyki uraman churaykukuy chay ch'ankulla ama nanachinasumpaj, nispa. Jeremiastaj chay jinata ruwarqa.

¹³ Chaymantaqa chay runas ch'akullawan chay pujyumanta orqhorqanku. Kay qhepata Jeremiasqa cárcel patiollapiña qhepakorqa.

Sedequiasqa Jeremiasta sapallampi tapurikun

¹⁴ Rey Sedequiasqa kamacherqa profeta Jeremiasta ñaupaqenman pusanankuta, Diosta yupaychana wasej kinsa kaj punkunnejman. Chaypitaj payman reyqa nerqa: Uj imata tapusqayki, ama pakaspa sut'inta willaway.

¹⁵ Jeremiastaj payman kuticherqa: Kutichiykiman chayqa, cheqamanta, manachu wañuchiwankiman? Uj imatapis umachaykiman chayqa, manallataj kasuwankimanchu.

¹⁶ Chanta rey Sedequiasqa pakayllapi uj juramentota Jeremiaswan ruwarqa: Pichus kausayta qowanchej chay Señorpa sutimpi jurayki wañuchinasunkuta mana saqesajchu, nitaj wañuchisuyta munajkunaj makinmampis jaywaykusqaykichu.

¹⁷ Chanta Jeremiasqa Sedequiasman nerqa: Israelpa Tukuy Atiyniyoj Señor Diosnin nin: Sichus Babiloniamanta reypa kurajkunasninman chimpaykuwaj chayqa, qan jinataj aylluykiwan salvakunki, manataj kay llajtapis ruphachisqachu kanqa.

¹⁸ Manatajchus paykunaman chimpaykuwaj chayqa, caldeos jamuspa kay llajtata jap'ikaponqanku, ruphaykuchenqankutaj, qantaj makinkumanta mana ayqekuyta atinkichu, nispa.

¹⁹ Sedequías kuticherqa: Caldeospaman chimpapunku chay judiosta manchachikuni. Paykunaj makinkuman urmayman chayqa, ñak'arichiwankuman.

²⁰ Jeremías kuticherqa: Jinapis jatun reyníy, mana paykunaj makinkuman urmankichu. Kasukuy reyníy, Señorpa nisqanta noqaqa willayki. Allinmin risonqa, kausayniykitataj salvanki.

²¹ Sichus paykunaman chimpapuyta mana munankipunichu chayqa, Señor niwanña imaschus qhatirisunanta.

²² Judamanta reypa palaciompi tukuy qhepakojkuna warmista orqhospa Babiloniamanta reypa kurajkunasninman jaywaykonqanku. Chay warmis kay jinata nenqanku: Paypa aswan sumaj kausaqesnillataj payta wasancharqanku, atipaykorqankutaj; chakisninta t'uruman sat'iykucherqanku, saqerparispataj riporqanku.

²³ Jeremiasqa reyman nillarqapuni: Tukuynin warmis, wawaspis caldeosman jaywaykusqas kanqanku, reyníy. Qampis rey kasqaykirayku mana paykunamanta llusp'iyta atinkichu, manachayqa Babiloniamanta reyman jaywaykusqa kanki, kay llajtataj ninawan kanaykonqanku.

²⁴ Chaypacha Sedequiasqa Jeremiasman kuticherqa: Kausayniykita munakunki chayqa, ama pimampis kaymantaqa parlaychu.

²⁵ Sichus kurajkuna qanwan parlasqayta yachanqanku chayqa, jamusonqanku, tapusonqankutaj imastachus qan niwasqaykita, noqapis imastachus qanman nisusqayta, mana wañuchisqaykichu nispataj, tukuy imata willanaykita mañasonqanku.

²⁶ Jinapis, qan kutichinki, qan mañashawasqaykita Jonatampa wasinman ama kachasunayta, ama chaypi wañunaykipaj.

²⁷ Jinataj, tukuy chay kurajkuna Jeremiasman rerqanku, taporqankutaj. Payrí kutichisqa reypa kamachisqanman jina kikinta. Chaypacha paykunaqa mana imanaspalla saqeporqanku, imaraykuchus mana pipis chay parlasqankutaqa uyarisqachu.

²⁸ Jeremiastaj cárcel patiopi qhepakusqa, Jerusalenta jap'inanku karqa chay p'unchaykama.