Jeremías 37 - Qheshwa Biblia DC

Sedequiasqa Jeremiasta tapurikun

¹ Babiloniamanta rey Nabucodonosorqa Judaman rey kanampaj Josiaspa wawan Sedequiasta churarqa Joacimpa wawan Jeconiaspa cuentampi.

² Jinapis ni Sedequías, nitaj yanapajkunasnin, nitaj ayllunmanta kaj runaspis profeta Jeremiasnejta Señorpa willachisqanta mana kasorqankuchu.

³ Rey Sedequiastaj, Selemiaspa wawan Jucalta kacharqa, jinataj Maasiaspa wawan sacerdote Sofoniasta, Jeremiasta tapumunankupaj: Noqaykurayku Señor Diosninchejmanta mañapuwayku, nispa.

⁴ Chaypacha Jeremiasqa manaraj apresochasqachu kasharqa. Chaynejta kayman jaqayman purisharqaraj.

⁵ Chaykamari, Egiptomanta faraompa soldadosnin llojsiykamusqanku. Chaypacha caldeos Jerusalenta muyuykushajkunaqa egipcios jamushasqankuta uyariytawankama ayqekorqanku.

^6-7 Chaypacha profeta Jeremiasman Señorqa parlamorqa kay jinata: Judamanta reymin niychej, pichus tapunawaykichejpaj kachamusorqachej chayman faraompa soldadosnin ñanman yanapanasuykichejpaj jamushasorqachej chaykunaqa Egiptoman kutiykapunku.

⁸ Caldeospis Jerusalén llajtaman yaykoj kutimonqanku; jap'ikaponqanku, ninawantaj jap'iykuchenqanku.

⁹ Noqa Señor k'amiykichej: Ama qhasita yuyakuychejchu, nitaj creekuychejchu chaymanta caldeos jataripunankutaqa, imaraykuchus manamin chay yuyasqaykichej jinachu kanqa.

¹⁰ Qankunaman yaykumushasunkichej chay caldeo soldadostapis atipawajchej chayqa, manañapis runas campamentopi qhepakunmanchu, manachayqa uj mashkha nanachisqas kajkunallaña kanman chaypis, chay runas atinkumanraj jatarimuyta ninata llajtaman jap'iykuchiyta.

Jeremiasta carcelman wisq'anku

^11-12 Maypachachus faraompa soldadosnin jamuykushasqankuta yachaytawankama caldeospa soldadosnin Jerusalenmanta jatarispa ripushajtinku, Jeremiasqa llojserqa llajtamanta Benjamimpa jallp'anman rinampaj, chay jallp'api tiyakojkuna ukhupi jallp'a chayaqeta rak'ishajtinku chayaqenta jap'ikapunampaj.

¹³ Jinapis maypachachus Benjamín punkuman chayashajtin uj runa Irías sutiyoj llojsimorqa. Pay karqa Seleniaspa wawan, Hananiaspa allchhin qhawajkuna ukhumanta kuraj kaj karqa, chaypi Jeremiasta sayachispa jap'iykorqa, nerqataj: Qan caldeosman chimpashanki, nispa.

¹⁴ Jeremías kuticherqa: Mana chayqa jinachu, mana caldeosmanqa chimpashanichu, nispa. Jinapis Iriasqa mana uyarerqachu, manachayqa jap'iykorqapacha, kurajkunaj ñaupaqenmantaj pusarqa.

¹⁵ Kay runasqa manchayta Jeremiaspaj phiñakorqanku, kamacherqankutaj maqanankuta, Jonatampa wasinmantaj wisq'aykamunankuta. Jonatanqa reypa qelqerin karqa, paypa wasinta carcelman tukuchisqanku.

¹⁶ Jeremiasqa, chay wasi urapi kaj wisq'ana wasiman wisq'aykorqanku, chaypitaj unayta kakorqa.

¹⁷ Rey Sedequías kamacherqa Jeremiasta palacioman pusamunankuta. Reypa ñaupaqenman Jeremías chayajtintaj pakayllapi tapurerqa: Ima willaypis Señormanta tiyanchu?, nispa. Jeremiastaj kuticherqa: Arí, kay jina: Qan reyqa Babiloniamanta reypa makisninman urmanki, nispa.

¹⁸ Jeremiaspis rey Sedequiasta tapurillarqataj: Ima jatun juchatataj qampa contraykipi ruwasqaniri, chayri yanapasojkunaj contrampichu, chayri kay llajtaj contrampichu juchallisqani carcelman wisq'anawankupaj?

¹⁹ Maypitaj chay profetasniykichej kashanku, pikunachus nerqasunkichej, Babiloniamanta reyqa mana qankunaman yaykumonqachu, nitaj jallp'aykichejmampis, nispa nejkunari?

²⁰ Kunan wiraqochi reyníy, uyariway imatachus mañasusqayta: Ama saqeychu ujtawan chay qelqeriyki Jonatampa wasinman pusanawankuta, ama chaypi wañunaypaj.

²¹ Chaypacha rey Sedequiasqa Jeremías carcelpa patiompi qhepakunanta kamacherqa, sapa p'unchaytaj t'antata apanankuta, t'anta ruwajkuna callemanta. Kayta ruwarqanku chay llajtapi t'anta kanankama. Jinamanta Jeremiasqa carcelpa patiompi qhepakorqa.