Jeremías 35 - Qheshwa Biblia DC

Jeremiaswan recabitaswan

^1-2 Josiaspa wawan Joacim Judapi rey kashajtin, Señor parlaykamuwarqa, niwarqataj: Recabitaspa ranchonman rispa paykunawan parlamuy. Chaymanta ujnin kaj yupaychana wasiman pusay, chaypitaj vinota ujyachimuy.

³ Noqa Jeremías, jinataj Jaazaniasta wauqesninta, wawasnintapis mask'aj rerqani recabitaspa tukuynin ayllusnintapis. Chay Jaazaniasqa waj Jeremiaspa wawan karqa, Habaniaspa allchhintaj.

⁴ Diosta yupaychana wasiman payta pusarqani, Igdaliaspa wawan Hanampa wawasnimpa tiyakunanku wasiman. Payqa Diospa runan karqa. Chay Hanampa wawasnimpa wasin kajman yaykorqanku. Kay waseqa kashan Diosta yupaychana wasimanta kurajkunaspa tiyakunanku wasi qayllapi jina, jinataj chay yupaychana wasej punkun qhawaj, Salumpa wawan Maasiaspa tiyanan wasi patapi.

⁵ Recabitasman vino junt'asniyoj vasosta jaywarqani, nerqanitaj uj chhika vinota ujyarikuychej, nispa.

⁶ Paykunaqa kutichiwarqanku; noqaykoqa vinota mana ujyaykuchu, imaraykuchus Recabpa wawan Jonadab ñaupa tatayku, k'amiwarqayku mana jayk'ajpis vinota ujyanaykuta, nitaj qhepa wawasniykupis.

⁷ Ajinallatataj kamachiwarqayku wasistapis ama ruwanaykuta, nitaj chajrata tarpunaykuta, nitaj plantanaykutapis, chayri uvas huertasniyoj kanaykutapis. Kamachiwarqaykutaj toldosllapi tiyakunaykuta, kay jallp'api unayta tiyakunaykuta, maypichus mana llajtasniyoj jina purishayku chaypi.

⁸ Noqaykoqa kasullarqaykupuni ñaupa tatayku Jacobpa tukuy kamachiwasqasniykuta, mana jayk'ajpis vinota ujyaykuchu noqayku, nitaj warmisniykupis, nillataj wawasniykupis.

⁹ Tiyakunaykupaj wasistapis mana ruwakuykuchu, nillataj uvas huertasniykupis kanchu, nitaj tarpuna jallp'asniykupis.

¹⁰ Toldosllapi tiyakuyku, chay ñaupa tataykoj Jonadab kamachiwasqaykuta junt'akushayku.

¹¹ Jinapis maypachachus Babiloniaj reynin Nabucodonosor kay jallp'aman yaykuykamorqa, chaypacha Jerusalenman risunman nerqayku caldeospa soldadosninmanta ayqenaykupaj, jinataj arameosmantapis; chayraykumin Jerusalempi tiyakushayku.

^12-13 Chaypacha Señorqa Jeremiasman parlaspa nerqa: Noqa Tukuy Atiyniyoj Israelpa Señor Diosnintaj kamachiyki, rispa nimunaykita Judapi, Jerusalempiwan kaj runasman: Kay yachayta jap'eqaychej, kamachisqasniytataj kasukuychej. Noqa Señor chayta nini.

¹⁴ Recabpa wawan Jonadabpa miraynenqa mana vinota ujyana kamachiyta junt'arqa. Paykunaqa kunan p'unchaykama mana ujyankuchu, imaraykuchus ñaupa tatankoj kamachisqasninta junt'arqanku. Noqapis qankunaman kutin kutinta kamachiykunasniyta qorqaykichej, jinapis qankunaqa mana kasuwankichejchu.

¹⁵ Kamacherqaykichej qhepampi qhepampi, tukuy kamachisniy profetasta ninasuykichejpaj: Jucha ruwaykunasta, millay ruwaykunastapis saqeychej. Ama waj dioskunaj qhepanta ripuychejchu, nillataj yupaychaychejchu, jinamanta qankunaman, jinataj ñaupa tatasniykichejmampis qosqay jallp'api tiyakullankichejpuni. Jinapis qankunaqa mana kasuwarqankichejchu, nitaj nisqasniyta junt'arqankichejchu.

¹⁶ Recabpa wawan Jonadabpa miraykunasnin ñaupa tatasninkoj kamachisqasninkuta junt'arqanku. Chaywampis kay Israel aylloqa mana kasuta ruwawanchu.

¹⁷ Chayrayku noqa Israelpa Tukuy Atiyniyoj Señor Diosnin nini: Noqa Judáj patanman, Jerusalempi tiyakojkunaspa patanmampis willacherqani, chay ñak'ariykunasta urmachimusaj. Noqa parlapayarqaykichej, qankunataj mana kasuwarqankichejchu; wajyarqaykichej, qankunataj mana uyariwarqankichejchu.

¹⁸ Chaypacha Jeremiasqa Recabitasman nillarqataj: Israelpa Tukuy Atiyniyoj Señor Diosnintaj nin: Qankunaqa kasuwankichejña, ñaupa tataykichej Jonadabpa kamachisqanta, jinataj qhawarqankichej, yachachisqasniyta junt'arqankichej, tukuy paypa kamachisusqaykichejta ima.

¹⁹ Noqa Señor Israelpa Tukuy Atiyniyoj Diosnin cheqamanta niykichej: Jonadabpa ayllunmanta kallanqapuni uj runa, ñaupaqeypi kamachisqayta ruwanampaj.