Jeremías 34 - Qheshwa Biblia DC

Rey Sedequiaspaj uj willay

^1-2 Babiloniaj reynin Nabucodonosor tukuy soldadosninwan, jinataj tukuy paypa kamachiynimpi kaj nacionesmanta runasnintin, Jerusalenman yaykuykusharqanku, chantá chay qaylla llajtasninmampis, chaypacha Jeremiasman Señorqa parlarqa, nerqataj: Noqa, Israelpa Diosnin Señor kamachiyki, Judamanta rey Sedequiasman rispa, noqa nini kay llajtata Babiloniaj reynin jap'ikapunanta, ninawantaj jap'iykuchinanta.

³ Qanqa makinmanta mana ayqeyta atinkichu, jap'isuspa paypa ñaupaqenman apasonqanku, chay qhepamantaj Babiloniamanñataj apasqa kanki.

⁴ Chaywampis uyariy, qan Judamanta rey Sedequías, allinta uyariway noqa Señor nisusqayta: Mana espadawan t'ojsisqachu wañunki.

⁵ Sonqo tiyasqa kaypi wañunki, ayaykej p'ampakuynimpi q'apaj jampista ruphachenqanku, imaynatachus qanmanta aswan ñaupajta reykunas karqanku, chay ñaupa tatasniyki p'ampakushajtinku ruphacherqanku ajinata, nenqankutaj: Qanmanta waqaspa, Ay Señor, nispa. Noqa Señor chayta nini cheqata nispa.

⁶ Profeta Jeremías kay tukuyta Jerusalempi rey Sedequiasman nerqa.

⁷ Chaykamataj Babiloniamanta reypa soldadosnin Jerusalenta jap'iykusharqanku, chantá Laquis llajtata, Azeca llajtata ima. Chaykunalla Judamanta jark'achisqa llajtasmantaqa qhepakusharqanku.

Kamachista kacharipunankumanta

⁸ Señorqa Jeremiasman parlaykullarqataj, rey Sedequías Jerusalempi tukuy tiyakojkunawan, chay kamachis kacharichisqas kanankumanta, tratota ruwasqankumanta qhepata.

⁹ Chay tratoqa ruwasqa karqa qhari kamachisniyoj kajkuna, chayri warmi kamachisniyoj kajkunapis hebreosmanta kajkunata kacharinankuta, ama ni pi judíos kajkunamanta kamachis kanankupaj.

¹⁰ Tukuy kurajkuna, tukuynin runaspis tratota junt'anankuta nerqanku. Chay tratota ruwasqankuta kasorqanku, chay kamachistataj kachariporqanku, manañataj ujtawan kamachis karqankuñachu.

¹¹ Kamachista kacharisqankumanta chay qhepatarí sonqonkuta nanachikuspa, watejmanta kamachis kanankupaj kutiykuchillarqankutaj.

^12-14 Chaypacha Señorqa parlaspa Jeremiasman nerqa: Noqa Señor, Israelpa Diosnin ñaupa tatasniykichejwan uj tratota ruwarqani kamachis jina kashajtiykichej Egiptomanta orqhomusharqaykichej chaypacha, kamacherqaykichej sapa qanchis watamanta kacharinaykichejta mayqen hebreo kajllamantapis, chay llajta masinman vendekojta, sojta watastaña kachikojta. Jinapis ñaupa tatasniykichejqa mana kasuwarqachu, nitaj nisqayta ruwarqankuchu.

¹⁵ Kunanqa, ña qankunaqa jucha ruwaykunasta saqesqankichejña, noqaman allin rijch'awaj imastataj ruwasqankichej, llajta masisniykichejta kacharisqasta saqespa. Ñaupaqeypitaj yupaychana wasiypi uj tratota ruwarqankichej.

¹⁶ Chay qhepamanrí uj jinamantaj yuyayniykichejta tukucherqankichej, sutiypa jatun kayninta t'aqarqankichej, watejmanta kamachista wata runas jinaña kacharisqas kasqankumantaña.

¹⁷ Ajinaqa noqa Señor nini: Qankunaqa mana kasuwarqankichejchu, llajta masisniykichej kamachista mana kacharispa; chayraykumari kunan noqapis maqanakuta, onqoyta, yarqhaytapis qankunaman kachaykamusqaykichej tukuy jallp'a patapi kaj naciones mancharikunankupaj jina. Noqa Señor chayta nini.

¹⁸ Judamanta kaj kurajkuna, jinataj Jerusalenmanta kajkunapis palaciopi uywasqaswan khuska, sacerdotes, tukuy puchoj llajtayojkunapis ñaupaqeypi uj tratota ruwarqanku:

¹⁹ Uj waka uñata ñak'aspa iskayman t'aqarqanku, chay iskaynin t'aqasnin chaupitataj pasarqanku, jinamanta trato ruwasqayta p'akispa mana junt'arqankuchu.

²⁰ Chayrayku wañuchej enemigosninkoj makisninman urmanankuta saqesaj, chay ayasninkutaj chay aycha mikhu suwintuspa, jinataj chay millay animalespa mikhunankupaj kanqa.

²¹ Ajinallatataj Judáj reynin Sedequiasta, yanapajkunasnintinta urmachisaj, wañuchejkuna enemigosnimpa atiyninman, Babiloniaj reynimpa soldadosnimpa atiyninman ima. Kunan payqa maqanakuyta saqespa ripunña.

²² Kunan noqa kutirimunankuta kamachisaj, kay llajtaj contrampi jamunankuta, yaykuykamunankutataj, jap'ikapunankuta, ninatataj jap'iykuchinankuta. Judamanta chay puchoj llajtaspis ch'inyachisqas qhepakonqanku mana uj runayoj. Noqa Señor chayta nini.