Jeremías 32 - Qheshwa Biblia DC

Jeremías jallp'ata rantin

¹ Señorqa Jeremiasman parlarqa, Judapi Sedequías chunka watastaña kamachishajtin, chaytaj karqa rey Nabucodonosor chunka pusajniyoj watastaña kamachishajtin.

² Chaypachachataj Babiloniamanta reypa soldadosnin Jerusalenman junt'aykushajtinku profeta Jeremías wijch'usqa kasharqa reypa palaciompa patiompi.

³ Rey Sedequías paytaqa wisq'aykuchisqa, Jeremías kay jinata parlasqanrayku: Señorqa nin: Babilonia reyqa llajtata jap'ikaponqa.

⁴ Rey Sedequiaspis caldeosmanta mana ayqenqanchu, manachayqa Babiloniamanta reypa makisninman urmanqa, paypa ñaupaqenmantaj renqa.

⁵ Nabucodonosortaj Sedequiasta Babiloniaman apakaponqa, chaypitaj qhepakonqa paymanta noqa yuyarikunaykama. Qankuna, caldeoswan maqanakuspapis mana atipankichejchu. Noqa Señor chayta nini.

⁶ Jeremías nerqa: Señor noqataqa parlapayawarqa.

⁷ Qhaway wauqeykej Salum tioykej wawan parlapayasoj jamonqa, Anatotpi chay jallp'anta rantinaykita. Yachay qan chay jallp'ata rantiyta atisqaykita, aswan qaylla ayllun kasqaykirayku.

⁸ Imaynatachus Señor niwasqanman jina chay wauqey Hanameel carcelpa pationman jamuwarqa. Niwarqataj Anatotpi chay jallp'anta rantinayta. Chayqa karqa Benjamimpa ayllumpa jallp'ampi. Chayrayku noqa chay jallp'ata rantinay atikorqa, chaywantaj qhepakapunaypaj aswan qaylla ayllun kasqanrayku. Chay tukuy imaswan yacharqani Señormantapuni uj kamachiy kasqanta.

⁹ Ranterqanitaj tioypa wawan Hanameelmanta Anatotpi kashan chay jallp'ata, chunka qanchisniyoj phisus qolqeta jaywarqani, chay parlasqaykuman jina.

¹⁰ Chay tratotataj ruwarqayku papelpi qelqaspa, sellasqatataj, testigospa sutisnintawan qelqaykuspa.

¹¹ Chaymanta jap'erqani chay iskaynin trato ruwasqa papelesta, ujnenqa sellasqa tratoyoj, imaynapichus rantisqa kasqantawan, chay ujnintataj jinallata.

¹² Chaykunatataj Neriaspa wawan Maasiaspa allchhin Barucman jaywaporqani, tioypa wawan Hanameelpa ñaupaqempi, jinataj sut'inchajkunaj tratoman sutinku qelqaykusqawan, chanta chay carcelpi tiyasqa kasharqanku, chay judiospa ñaupaqempi ima.

^13-14 Paykunaj ñaupaqenkupi Barucman nerqani: Tukuy Atiyniyoj Señor Israelpa Diosnin kay jinata nin: Oqhariy iskaynin qelqasqa trato papelesta chay sellasqa kajta, jinataj kicharisqa kajtapis; t'urumanta ruwasqa vasomantaj jallch'aykuy, chaypi unaykama jallch'asqa kanampaj.

¹⁵ Tukuy Atiyniyoj Israelpa Señor Diosnin nin: Kay jallp'api rantillanqankupuni wasista, jallp'asta uvas huertastapis, nispa.

Jeremiaspa mañakuynin

^16-17 Neriaspa wawan Barucman chay rantisqa papelesta jaywajtiykamataj, kay jinata Señormanta mañakorqani: Qan, Señor, chay jatun atiyniykiwan janaj pachata kay pachatapis ruwarqanki, qampajqa mana imapis mana atikojqa kanchu.

¹⁸ Qanmin khuyakuyniykita rikuchinki waranqa waranqa miraykunaman, jinapis runasta jasut'inki tatasninkoj juchasninkurayku. Oh jatun Dios, atiyniyojtaj, sutiykeqa Tukuy Atiyniyoj Señormin.

¹⁹ Qan may jatun kanki ruwasqasniykipi. Qan rikunki runaspa tukuy ruwasqasninkuta, chay ruwasqasninkuman jinataj qan qopunki.

²⁰ Qan rikunki milagrosta, Egiptopi may uyarisqamin, kunampis ruwashallankirajpuni, Israel chaupipis, waj runaspa chaupimpipis, jinamanta sutiykeqa may uyarisqa kashan.

²¹ Qanqa may jatun atiyniykiwan Egiptomanta Israel aylluykita orqhomorqanki, señalesta ruwaspa, t'ukuna ruwasqasniykiwan tukuyninta manchariykuchispa ima.

²² Israel aylluykiman qorqanki kay jallp'ata, lechewan misk'iwan yaku jina puririshan chayta, imaraykuchus ñaupa tatasninkuman qonaykita nisqaykiman jina.

²³ Chay qonayki jallp'aman yaykuspa jap'ikapuytawan mana kasusorqankuchu, nitaj chay yachachiykunasta qosqasniykita qhaterqankuchu, nitaj ruwarqankuchu ni imata chay kamachisqasniykimantaqa. Chayraykumin kay tukuy ñak'ariykunastaqa apachimorqanki.

²⁴ Kunanqa caldeo jallp'a moqosta oqharinkuña llajtaman yaykuykamunankupaj, jinataj maqanakuykunas yarqhay, onqoy ima llajtaykichejta makinkuman urmaykuchenqa. Señor, rikunki chay nisqasniykeqa imaynatachus junt'akushasqanta.

²⁵ Chaywampis, Señor, qan rantinayta kamachiwarqanki, paganaytataj jaqay jallp'amanta rikojkunaspa ñaupaqempi, chay llajta caldeospa makinman urmanampuni kashajtimpis.

^26-27 Chaypacha Señorqa Jeremiasman kuticherqa: Noqa Señor, tukuy kausajkunaspa Diosninku kani. Noqapajqa mana imapis mana atikojqa kanchu.

²⁸ Ajinaqa noqa niyki: Babiloniaj reynin Nabucodonosorman, caldeosmampis jap'ikapunankupaj jaywaykapusaj.

²⁹ Llajtata jap'ikapoj caldeosqa yaykuykuspa ninawan jap'iykuchenqanku; maypichus Baalman inciensosta q'osñichej kanku, jinataj vinosta jaywaj kanku mana rejsisqa dioskunaman, noqata phiñachinawankupaj, chay wasistawan khuska ruphaykuchenqanku.

³⁰ Qallariymantapacha Israel aylloqa, chantá Judá ayllupis noqaman mana allimpajchu rijch'awarqa chay imasta ruwarqanku. Israelitasqa phiñachillawajpuni kanku paykunaj kikinkoj ruwasqanku lantista yupaychaspa. Noqa Señor chayta nini.

^31-32 Kay llajtaqa ruwakusqanmantapacha kunan p'unchaykama k'arajta phiñachillawampuni. Chayraykumin paykunata ñaupaqeymanta chinkarichisaj, tukuy sajra ruwasqasninkuwan phiñachiwasqankumanta, Israel aylluta, Judá ayllutapis, jinallataj reykunasninkuta, sacerdotesninkuta, profetasninkuta, Judapi, Jerusalempiwan chay tukuy tiyakojkunatapis.

³³ Paykunaqa wasanchawanku, waj ladollata qhawanku. Mana uj ratopis paykunaman yachachiytaqa saqerqanichu, mana kasuwarqankuchu, k'amichikuytapis mana munarqankuchu.

³⁴ Llimphuchasqa yupaychanay wasiyta uj p'enqaypi rikhuricherqanku, chayman chay millay lantisninkuta churaykuspa.

³⁵ Jinallataj Baalman Ben-hinom vallepi altarkunasta ruwarqanku, chaypi qhari wawasninkuta Molocman ruphachinankupaj, jinamanta Judata juchallichispa. Millay imasta ruwanankutaqa mana kamacherqanichu, ni yuyallarqanipischu chaytaqa.

Qhepaman imastachus Dios qonanmanta

^36-37 Noqa Señor Israelpa Diosnin, kay llajtamanta nini, mayqentachus nerqanki Babiloniamanta reypa makinman urmananta maqanakusrayku, yarqhayrayku, onqoyraykupis chaymanta: Tantaykusaj chay llajtayojkunata tukuynej jallp'asmanta maykunasmantachus may sinch'i phiñakuyniypi ch'eqeracherqani chay tukuymanta, noqataj kay cheqaman kutirichimusaj kaypi tiyarikunankupaj mana ni ima ch'ajwaswan.

³⁸ Paykuna aylluy kawanqanku, noqataj Diosninku kasaj.

³⁹ Munayniyoj kanankuta ruwasaj yupaychanawankupaj tukuy kausayninkupi, yupaychaj churakunawankupaj paykunaj allinnillankupajtaj, jinataj wawasninkupajpis.

⁴⁰ Paykunawan uj tratota wiñaypaj ruwasaj: Paykunaman nisaj, manaña jayk'ajpis saqenayta, allinwan rikuyta, yupaychawayta munaywantaj sonqonkuman junt'achisaj ama noqamanta t'aqakunankupaj.

⁴¹ Noqa kusikusaj paykunata allinman churaspa, tukuy sonqowan, tukuy cheqan kayninwantaj paykunata kay jallp'api tiyachisaj.

⁴² Señor nillarqataj: Kay llajtaman kay jatun ñak'ariyta apachimorqani, ajinallataj tukuy allin kajkunasniyta apachimusaj nisqayman jina.

⁴³ Kay jallp'ata nerqanki mana runasniyoj, mana uywasniyojtaj ch'in qhepakunanta, caldeospa makinmantaj urmananta. Chaypeqa watejmanta jallp'asta rantirakonqanku.

⁴⁴ Chaypi rantirakonqanku chay trato papelestataj selloyojta qelqaspa ruwakonqanku, testigosniyojta ima. Kay tukoyqa Benjamimpa jallp'asnimpi kanqa, Jerusalempi qayllasnimpitaj, jinataj Judajpa llajtasnimpipis, chay sach'arara orqospi, jinataj mar canto pampaspipis, jinataj Néguev llajtaspipis, imaraykuchus noqa kutichimpusaj chay kausayinkuta. Noqa Señor chayta nini.