Jeremías 29 - Qheshwa Biblia DC

Jeremías wijch'usqasman cartata apachin

¹ Rey Jeconías wijch'usqa karqa, maman reinawan, palaciopi kamachiswan, Judamanta, Jerusalenmantapis kurajkunawan, oficinapi llank'ajkunawan, herreroswan khuskataj.

² Jerusalenmantapacha Jeremiasqa uj cartata apacherqa, chay wijch'usqas kajkunaman, puchoj kurajkunaman, sacerdotesman, profetasman, jinataj runasmampis, pistachus Nabucodonosor Jerusalenmanta Babiloniaman wijch'orqa chaykunaman.

³ Judamanta rey Sedequías Babiloniaj reynin Nabucodonosorman chay cartata apacherqa, Safampa wawan Elasawan, Hilciaspa wawan Gemariaswan ima. Chay cartapi kay jinata nerqa:

^4-5 Noqa Tukuy Atiyniyoj Israelpa Señor Diosnin kayta nini: Jerusalenmanta Babiloniaman apacherqani chaykunaman niykichej: Wasista jatarichikuychej, chaypitaj tiyakuychej; poqoj sach'asta plantakuychej, chay poqoynintataj mikhuychej.

⁶ Casarakuychej, qhari wawasniyoj warmi wawasniyojtaj kaychej. Paykunapis casarakuchunku, wawasniyojtaj kachunku, astawan miraychej ama pisiyanaykichejpaj.

⁷ Llank'aychej, maypichus wijch'usqas karqankichej chay llajtaj allinnimpaj, chay llajtaraykutaj Señormanta mañapuychej, imaraykuchus llajta allimpi kajtenqa qankunapis allillampitaj kankichej.

⁸ Noqa Tukuy Atiyniyoj, Israelpa Señor Diosnin kayta niykichej: Ama ch'aukiyachikuychejchu, qankunawan khuska tiyakunku chay profetaswan, nitaj chay adivinoswampis; nillataj chay mosqoykunasninkutapis kasuychejchu.

⁹ Imastachus paykuna sutiypi willasunaykichej chaykunaqa llullasmin kanku. Mana noqachu kachamuni. Noqa Señormin chayta nini.

¹⁰ Noqa Señor nini: Qanchis chunka watas Babiloniapi junt'akojtinkama, qankunaman kutisqatañataj ruwasaj. Qankunata kay cheqaman kutichimunay karqa chayta junt'asaj.

¹¹ Noqa yachani imastachus qankunapaj wakichishasqayta, chaykunaqa qankuna allinta kausakunaykichejpaj, manataj ima sajrapis qankunaman jamunampaj, jinamanta jamojpi allin kajta suyasqaykichejman jina jap'inaykichejpaj. Noqa Señor chayta nini.

¹² Chantaqa qankuna noqaman qhaparikuwankichej, mañakojtaj jamuwankichej, noqataj uyarisqaykichej.

¹³ Mask'awankichej, tariwankichejtaj, tukuy sonqowan mask'awasqaykichejrayku.

¹⁴ Arí, noqa saqesaj tarinawaykichejta, saqesajtaj uj jinaman kausayniykichej tukunanta: Chay naciones ukhumanta orqhomusqaykichej, may cheqaspichus wijch'usqas karqankichej chay tukuynejmanta, tantaykusqaykichej, kaymantaj kutichimusqaykichej, maymantachus wijch'orqaykichej chayllamantaj. Noqa Señor chayta nini.

¹⁵ Qankuna ninkichej: Babiloniapi Señorqa profetasta qowanchej.

¹⁶ Señorqa nin, Davidpa tiyanan tronopi tiyashan chay reymanta, kay llajtapi tukuy tiyakojkunamanta, chay ayllusniykichejmanta, pichus mana waj jallp'aman apasqaschu karqanku chaykunamantapis.

¹⁷ Tukuy Atiyniyoj Señor nin: Paykunaman apachimusaj maqanakusta, yarqhayta, onqoyta ima. Chay mana mikhunapaj jinachu kashanku chay millay q'etayasqa higosta jina kanaykichejta saqesaj.

¹⁸ Paykunata qhatiykusaj maqanakuwan, yarqhaywan, onqoywan ima. Kay pachapi tukuy naciones kajkuna rikuspa mayta t'ukunankuta saqesaj. Tukuyninku rikuspa wananankupaj saqesaj maldicisqa kaymanta, p'enqasqa kaymantapis, maykunasmanchus ch'eqeracherqani chay tukuy nacionespi t'ukunankupaj, mancharikunankupajtaj kankichej.

¹⁹ Kamachisniy profetasnejta tukuy willachisqasniyta mana kasorqankichejchu kutin kutinta kachamorqaykichej mana kasunallawaykichejpaj. Noqa Señor chayta nini.

²⁰ Nisqasniyta kasuwaychej ari, Jerusalenmanta Babiloniaman tukuy wich'usqas kajkuna.

²¹ Tukuy Atiyniyoj Señor Israelpa Diosnin kay jinata nin: Colaiaspa wawan Acabmanta, jinataj Maasiaspa wawan Sedequiasmanta, piskunachus Señorpa sutimpi llullerasta qankunaman nisunkichej: Babiloniamanta rey Nabucodonosorpa makinmin urmachisaj, paytaj ñaupaqeykichejpi paykunata wañurachenqa.

^22-23 Judamanta wijch'usqas Babiloniapi kashanku chaykunamanta mayqellampis maldiciyta munankuman chayqa nichunku: Imaynatachus Sedequiaswan, jinataj Acabwampis Señor ruwarqa, ajinata qanwampis ruwachun, piskunatachus Babiloniamanta reyqa ninawan kankaykorqa, imaraykuchus Israelpi millay imasta ruwarqankichej: Runa masiykichejpa warmisninwan qhenchachakorqankichej, tukuy llullerastataj sutiypi nerqankichej mana noqaj kamachisqallay. Noqa yachani, rikuykichejtaj. Noqa Señor chayta niykichej.

Semaiaspaj uj willay

^24-26 Jeremiasman Señorqa kamacherqa, Nehelammanta Semaiasman ninanta: Israelpa Tukuy Atiyniyoj Señor Diosnin nin: Qan sutiykipi uj cartata Jerusalempi kashanku chay tukuy runasman apacherqanki, Maasiaspa wawan sacerdote Sofoniasmampis, tukuy chay puchoj sacerdotesmampis. Chay cartapitaj Sofoniasman nerqanki: Sacerdote Joiadaj cuentanmanta Señorqa qanta churasunki, Diosta yupaychana wasipi kuraj kaj qhawaj kanaykipaj. Pipis rikhurinman uj loco jina, profeta jinataj parlaj churakunaman chayqa, carcelman wisq'aykuspa, cadenaswantaj wataykunaykipaj kanqa.

²⁷ Imaraykutaj Anatotmanta Jeremiasta mana k'amerqankichuri? Payqa qankunaman parlaj churakorqa uj profeta jina.

²⁸ Payqa Babiloniamampis uj cartata apachimuwarqayku, nispa: Chay jallp'aman wijch'usqas kasqaykichejqa unaypaj kanqa; chayrayku wasista ruwakuychej, chaypi tiyakuychej, poqoj sach'asta churakuychej, chay poqoynintataj mikhuychej, nispa.

²⁹ Sacerdote Sofoniastaj chay cartata Jeremiasman leerqa.

^30-31 Chaypacha Señorqa profetaman parlarqa, nerqataj: Kachay willamunankupaj tukuy chay waj jallp'aman wijch'usqas kajkunaman noqa Señor nishasqayta: Nehelammanta Semaías sutiypi parlasorqachej, mana noqaj kachamusqallay, mana imatapis payman yuyaychajtillay, chay llullapis suyachisunkichej.

³² Noqa Señor nini Semaiasta tukuy miraynintawan jap'inayta. Mana kay jallp'api paypa miraynin kanqachu. Mana kusikonqachu aylluyman qosaj chay kusikuywan, imaraykuchus chaykunawan aylluyta noqaj contraypi churakunankuta nerqa. Noqa Señor chayta niykichej.