Jeremías 28 - Qheshwa Biblia DC

Jeremiaswan Hananiaswan

^1-2 Sedequías Judapi tawa watastaña kamachishajtin, phishqa kaj killapi, Gabaón llajtapi Asurpa wawan profeta Hananías Diosta yupaychana wasipi Jeremiasman, sacerdotespa, chantá tukuynin runaspa ñaupaqempi parlarqa, nerqataj: Israelpa Diosnin Tukuy Atiyniyoj Señorqa nin: Babiloniaj reynimpa yugonta p'akinña.

³ Rey Nabucodonosor Diosta yupaychana kay imasta Babiloniaman aparqa, chaykunata iskay watamantawan kayman kutichimullasajtaj.

⁴ Jinallataj Judamanta Joacimpa wawan rey Jeconiastapis kayman kutichimullasajtaj. Chantá Judamanta Babiloniaman apachisqas karqanku chay tukuy puchoj runastawan. Arí, noqa Babiloniaj reynimpa yugonta p'akisaj. Noqa Señor chayta nini.

^5-6 Chantaqa profeta Jeremías, profeta Hananiasman kuticherqa, Diosta yupaychana wasipi kasharqanku chay sacerdotespa ñaupaqempi, jinataj llajtamanta tukuy runaspa ñaupaqempi ima, nerqataj: Arí, ajinata Señorqa ruwachun. Señor munachun kay nisqasniyki junt'akunanta, Diosta yupaychana wasipi kaj imasta kutichimpunankuta, Babiloniaman wijch'usqas kajkunapis kutimpuchunku.

⁷ Uyariy ari allinta, jinataj tukuy runaspis kay nisqasniyta uyarichunku.

⁸ Ñaupa tiempospi kaj profetasqa manaraj qan, nitaj noqapis kashajtinchej willarasqanku ashkha nacionespa contrampi atiyniyoj reykunaj contrankupi ima kananta, maqanakus, ñak'ariykunas, onqoykunas ima.

⁹ Maypachachus uj profeta sonqo tiyasqa kay jamunanmanta willan, chay willasqantaj junt'akun chayqa, chaypi yachakun cheqamanta Señorpuni kachamusqanta.

¹⁰ Chaypacha Hananiasqa, Jeremiaspa kunkanmanta yugota phaskaraspa t'unarparerqa.

¹¹ Chayta phaskaraytawantaj, tukuy runaspa ñaupaqempi kayta nerqa: Señor nin: Kay jinallatataj iskay watamantawan tukuy nacionespa kunkanmanta, Babiloniamanta rey Nabucodonosorpa yugonta phaskarasaj, chantá p'akirparisajtaj, nispa. Jeremiastaj riporqa.

^12-13 Maypachachus Hananías, Jeremiasmanta yugota qhechuspa p'akisqanmanta qhepatañari, Jeremiasman Señorqa parlallarqataj: Riy, nimuytaj Hananiasman noqa Señor nisqayta: K'aspimanta chay yugota qan tunarqanki, kunantaj fierromanta uj yugoñataj tiyan.

¹⁴ Noqa Tukuy Atiyniyoj Israelpa Señor Diosnin nini: Fierromanta uj yugota tukuy nacionespa kunkanman noqa churani, Babiloniamanta rey Nabucodonosorpa kamachisnin kanankupaj. Chay k'ita animalestapis paypa atiyninman churani, nispa.

¹⁵ Chaypacha Jeremiasqa Hananiasman nerqa: Uyariy, Hananías. Señorqa mana kachamusunkichu. Qanrí uj llulleriosllata kay aylluman creechishanki.

¹⁶ Chayrayku Señorqa nin: Kay jallp'amanta chinkachisqayki. Kay watapi qanqa wañunki, imaraykuchus parlasqasniykiwan noqaj contraypi tukuy runasta oqharichinki.

¹⁷ Chay profeta Hananiastaj, chay kikin watapi qanchis kaj killampi wañorqa.