Jeremías 26 - Qheshwa Biblia DC

Jeremiasta wañuchinayanku

^1-2 Josiaspa wawan Joacim Judapi rey kayta qallarishajtin Señorqa Jeremiasman parlaykorqa, nerqataj: Diosta yupaychana wasej patiompi sayaykukuy, chaypitaj niy kamacherqayki ninaykita chay tukuyta, Diosta yupaychana wasiman Judá llajtasmanta Diosta yupaychaj jamushanku chay tukuy runasman. Amataj ni uj palabrata qonqaychu.

³ Ichapis kasusunkuman, chay sajra ruwaykunasninkutataj saqenkuman, jinamanta noqapis manaña chay sajra ruwasqasninkumanta jasut'iymanñachu, imaynatachus yuyasharqani jinataqa.

^4-5 Niy noqa Señor kayta nisqayta, manachus nisqasniyta ruwawajchej, yachachiykunasniytapis chayqa, nillataj kasuwajchejchu kamachisniy profetasniypa k'amisqasninkuta, pistachus qhepan qhepanta kachamuykichej, qankunataj mana kasorqankichejchu.

⁶ Chaypajwanqa noqa ruwasaj kay Diosta yupaychana wasiwan imaynatachus Silopi ruwarqani ajinata. Kay llajtataj tukuypa rikunanta ñak'arichisaj, kay pachamanta tukuy naciones wananankupaj jina.

⁷ Sacerdotes, profetas, tukuy llajtapi kaj runaspis, Diosta yupaychana wasipi Jeremiaspa nisqanta uyarerqanku.

⁸ Señorpa kamachisqanmanta parlayta tukojtinkamataj, sacerdotes, profetas, tukuy llajtapi kaj runaspis, kay jinata nispa: Wañunaykipuni tiyan nispa, jap'iykorqanku.

⁹ Imaraykutaj Señorpa sutimpi parlaj churakunki, kay yupaychana wasita Silopi jina qhatirinanta munaspari, kay llajtapis chinkachisqa kananta mana runasniyojtaj qhepakunantari? Chayta nispa tukuynin runas Diosta yupaychana wasipi Jeremiaspa contrampi tantaykukorqanku.

¹⁰ Judá ayllumanta kurajkuna, imachus kasqanta uyarispa, reypa palacionmanta Diosta yupaychana wasiman rerqanku, chaypitaj chay mosoj punku nisqapi tiyaykukorqanku.

¹¹ Chaypitaj chay sacerdotes, profetaspis chay kurajkunaman tukuy llajtantin runasman nerqanku: Kay runaqa wañunan tiyan, imaraykuchus kay llajtaj contrampi riman, imaynatachus qankuna kikiykichej uyarinkichej jina.

¹² Jeremiasqa tukuy runasman, kurajkunamampis kuticherqa: Señormin parlajta kachamuwan, kay yupaychana wasej contrampi, kay llajtaj contrampitaj willanayta, imaynatachus uyarisqaykichejman jina.

¹³ Astawan allinta puriychej, ruwaychejtaj, Señor Diosniykichejtapis kasuychej. Paytaj manaña, apachimusaj nerqa chay ñak'ariykunastaqa apachimusunkichejchu.

¹⁴ Noqawanqa munasqaykichejta ruwaychej, imaraykuchus makisniykichejpiña kani.

¹⁵ Jinapis kaytaqa allinta yachaychej: Sichus wañuchiwankichejman chayqa, qankuna, chantá kay llajtapi tiyakojkuna ima juchachasqas kankichej, uj mana juchayojta wañuchisqaykichejrayku; imaraykuchus cheqamanta Señorpuni kachamuwarqa kay tukuy imasmanta sut'ita willanasuykichejpaj.

¹⁶ Chanta chay kurajkuna, tukuy llajtamanta kuraj runaspis sacerdotesman, jinataj profetasmampis nerqanku: Mana imapis kanchu kay runata wañuyman apanapaj jinaqa; payqa Señor Diosninchejpa sutimpi parlawarqanchej, nispa.

^17-18 Wakin kuraj runasmanta sayarikuspa nerqanku, chaypi tantasqas kasharqanku chay tukuy runasman: Judamanta rey Ezequiaspa p'unchaykunasnimpi, Moresetmanta Miqueas parlarqa Señorpa sutimpi tukuy Judamanta kaj aylluman: Tukuy Atiyniyoj Señorqa nin: Sionqa uj llank'ana jallp'aman tukonqa, Jerusalentaj uj raqay qollusman tukonqa, Diosta yupaychana wasej orqonmanta sach'as junt'aykonqa.

¹⁹ Rey Ezequías, Judamanta tukuy ayllupis Miqueasta wañucherqankuchuri? Uj jinataj karqa: Señorta reyqa manchachikorqa, mañakorqataj paykunamanta khuyarikunanta. Jinataj chaypacha Señorqa manaña ñak'ariykunasta apachimorqachu, mayqenkunatachus apachinanta nerqa chaykunata. Kunanrí, noqanchejqa jatun juchatawanchu yapaykukusunman?

²⁰ Semiaspa wawan Quiriat-jearim llajtamanta profeta Uriaspis Señorpa sutimpi kay llajtaj contrampi parlarqa, chantá kay jallp'aj contrampi ima Jeremías jinallataj.

²¹ Rey Joacim, tukuy kamachisnin ima, kurajkunasnimpis paypa nisqanta uyarerqanku, reytaj wañuchiyta munarqa. Uriastaj chayta yachaspa mancharikuytawan Egiptoman ayqerqa.

²² Rey Joacimtaj Acborpa wawan Elnatanta, waj runakunatawan ima Egiptoman kacharqa.

²³ Chaykunataj Uriasta Egiptomanta orqhomorqanku, rey Joacimmantaj aparqanku, paytaj wañuchinankuta kamacherqa, ayantataj ima jusk'ullamampis wijch'uykunankuta kamacherqa.

²⁴ Safampa wawan Ahicam, Jeremiasman sayaykorqa, chayrayku runasman mana jaywarqankuchu ama wañuchinankupaj.