Jeremías 24 - Qheshwa Biblia DC

Higosniyoj canastasta rikusqanmanta

¹ Babiloniaj reynin Nabucodonosor, chay Joacimpa wawan Judamanta rey Jeconiasta waj jallp'aman, chay Judamanta kurajkunastawan khuska, chantá artesanostawan, herrerostawan ima apachisqantawan, iskay canastasta higoskunasniyojta, Diosta yupaychana wasej ñaupaqempi churasqasta Señorqa rikuchiwarqa.

² Ujnin canastaqa sumaj poqosqa higosniyoj karqa, ñaupajta poqojkunamanta. Chay ujninrí mana allin poqosqa higoskunasniyoj karqa, may millay mana mikhunapaj jinachu karqa.

³ Señortaj tapuwarqa: Jeremías, imatataj rikunkiri?, nispa. Noqataj nerqani: Higosta rikuni. Chay sumaj poqosqa kajkunaqa may sumachajpuni kanku, chay mana walej kajkunarí, mana mikhunapaj jinachu kanku, nispa.

^4-5 Chaypacha niwarqa Señorqa: Noqa Señor Israelpa Diosnin nini: Chay sumachaj poqosqa higoskunata jina Judá ayllutaqa qhawasaj, mayqenkunatachus kaymanta caldeospa jallp'anman wijch'usqasniyta. Chaykunamanqa tukuy imapi sayakusaj.

⁶ Paykunata waqaychasaj, kay jallp'amantaj kutichimusaj, kaypitaj allimpi jatarichisaj. Paykunataqa manaña tukuchisajchu; plantaykusaj manañataj jayk'ajpis sik'irasajchu.

⁷ Allin sonqota qosaj, noqa Señorninku kasqayta rejsinawankupaj. Paykunaqa aylluy kanqanku, noqataj paykunaj Diosninku kasaj, imaraykuchus tukuy sonqowan kutirimpuwanqanku.

⁸ Judamanta rey Sedequiasta, kurajkunasninta, Jerusalempi qhepakojkunata, chay waj tiyakojkunata, Egiptopi tiyakojkunatawan, chay mikhunapaj mana allinchu kaj higosta jina qhawasaj, chaykunaqa mikhunapaj mana allinchu kanku.

⁹ Paykunata mancharikunapaj jina ruwasaj, tukuy jallp'api kaj nacionespaj; p'enqakunankupaj jina, cuentakunankupaj jina, asikunankupaj jina, maldición kanankupaj jina, maymanchus chayanqanku chay naciompi.

¹⁰ Paykunaman maqanakuta, yarqhayta, onqoytapis apachimusaj, mana ujniyoj kay jallp'api tukukunankukama, may jallp'atachus paykunaman, chantá ñaupa tatasninkumampis qorqani chaypi.