Jeremías 23 - Qheshwa Biblia DC

Puchojkuna kutimojkuna

¹ Señorqa nin: Ay, michejkunamanta pischus ovejasniyta chinkachinku chaykunamanta.

² Israelpa Señor Diosnin nillantaj, paypa ayllunta kamachinku chaykunaman: Qankunamin ovejasniyta ch'eqerachinkichej, ayqerachinkichejtaj, manataj allintachu qhawarqankichej. Noqapis jasut'isqaykichej sajra ruwasqasniykichejmanta. Noqa Señor chayta nini.

³ Noqa kikiytaj chay puchoj ovejasniyta apakapusaj, maymanchus ayqecherqani chay jallp'asmantapacha tantaykusaj, watejmanta pastosninkuman kutiykuchisaj ashkha uñasniyoj kanankupaj.

⁴ Michejkunatataj qhawapunawankupaj churasaj, mana imatapis manchachikunankupaj, nitaj imamanta pisichikunankupaj. Noqa Señor chayta nini.

⁵ Señorqa nillantaj: Uj p'unchay chayamonqa, maypachachus Davidpa mirayninmanta uj cheqan kajta rikhurichisaj. Kay pachapitaj chay reyqa tukuy yachaywan, justiciawan, cheqan kaywantaj kamachenqa.

⁶ Chay p'unchaykunasnimpeqa Judá salvasqa kanqa, Israelpis sumaj waqaychasqa tiyarikonqa. Kay sutiwanmin chaypacha sutichanqanku: Señormin cheqan kajta ruwaysiwajninchejqa, nispa.

⁷ Señorqa nin: P'unchaykuna chayamonqanku, maypachachus manaña juranqankuchu, chay israelitasta Egiptomanta orqhomorqa Señorpa kausayninrayku, nispa.

⁸ Manachayqa juranqanku: Señorpa kausayninrayku pichus orqhomorqa wichaynej jallp'asmanta, chay tukuynin waj jallp'asmantapis ch'eqerasqas kasharqanku chaymanta, nispa. Kikin jallp'ankupitaj kausanqanku.

Lulla profetasmanta uj willay

⁹ Profetasmanta uj willay: May sinch'i yuyayniy chinkasqa kani, tukuy ukhuy khatatitiwan. Uj machasqa runa jina kani. Aqha ujyaj q'eta machasqa jina kani, Señorpa llimphu palabrasninrayku.

¹⁰ Kay nacionqa qhenchaswan junt'a kashan, juchata ruwaypi purejkunallawan, atiyninkuta mana cheqan kajta ruwanallankupaj churajkunawan ima. Chayraykumin Señorqa kay jallp'ata maldicerqa. Jallp'aqa ch'akiporqa, ch'in pampapi kaj pastospis ch'akiporqanku.

¹¹ Señorqa nin: Tukuy profetasnintin, sacerdotesnintin puraj uyas juchasapas kanku. Paykunata kikin yupaychana wasiypi juchasta ruwashajta taripani.

¹² Chayraykumin ñanninkoqa laqha may llusk'ataj kanqa. Noqataj tanqarparinankuta, chantá urmarparinankutataj nisaj. Maypachachus paykunamanta cuentasta mañasaj, chaypachaqa paykunaj patankuman mayta ñak'ariy jamonqa. Noqa Señor chayta nini.

¹³ Noqa rikuni Samariamanta profetasta, mana allimpaj rijch'awaj imasta ruwashajta: Paykuna Baalpa sutillampi willaranku, Israel aylluytarí pantacherqanku.

¹⁴ Jerusalenmanta profetasta rikullanitaj manchay millay imasta ruwashajta. Qhenchachakunku, ch'aukiyankutaj, astawantaj umachakunku chay juchasapasta. Chayrayku paykunaqa mana juchamanta t'aqakunkuchu. Paykuna, chantá llajtapi tiyakojkuna noqapaj Sodoma llajta jina, Gomorra llajta jinataj kanku.

¹⁵ Chayraykumin noqa Tukuy Atiyniyoj Señor nini profetaspa contrampi: Manchay p'osqosqa k'allku mikhunata paykunaman mikhuchisaj, wañunapaj kaj yakutataj ujyaykuchisaj, imaraykuchus Jerusalempi kaj profetasmantapacha, jucha ruwaykunasqa tukuy jallp'antimpiña junt'aykun.

¹⁶ Tukuy Atiyniyoj Señorqa nin: Israelitas ama akasuychejchu profetaspa nisqasninkuta; imaraykuchus paykunaj nisqasninkoqa llullaslla kanku. Paykunaj kikinkoj umachakusqasnillankuta willarashanku, manataj noqa willasqasniytachu.

¹⁷ Pichus palabrayta qhesachajkunata ninku: Tukuy ima allillan risonqachej, nispa. Pischus ruwallankupuni rumi sonqonkoj munasqanman jina, chaykunatapis ninku: mana ni ima sajra kajqa jamusonqachejchu, nispa.

Jeremiaspa qhapariynin

¹⁸ Chaymantataj noqa nerqani: Pitaj rejserqa Señorpa pakasqa yachaykunasnintari? Pitaj rikorqa, chayri uyarerqa palabrasnintari? Pitaj chay nisqasninta uyarerqari?

¹⁹ Señorpa k'ajaj phiñakuynenqa uj llojlla para jina, uj muyoj wayra jinataj juchasapaspa patanman choqakushan.

²⁰ Señorpa k'ajaj phiñakuynenqa mana tukukonqachu, chay imachus ruwanan kajta ruwanankama. Uj tiempo jamonqa, chaypacha qankuna allinta umacharikuspa kay imasta unanchankichej.

Señorpa willaynin llulla profetaspa contrampi

²¹ Mana noqachu chay profetasta kachamorqani, nitaj paykunamanqa parlallarqanipischu, jinapis paykunaqa usqhay usqhayta sutiypi parlamorqanku.

²² Sichus pakasqa imasniyta rejsinkuman karqa chayqa, aylluyman parlasqasniyta willarankuman karqa, chay millay ñanmanta t'aqakunkuman karqa, chay sajra ruwaykunasninkutataj saqechinkuman karqa.

²³ Señorqa nillantaj: Karupi chayri qayllapipis noqa Dios kani.

²⁴ Pitaj ñawisniymanta pakakuyta atinmanri? Cielo chantá jallp'apis noqaj kayniywan junt'a kashan. Noqa Señor chayta nini.

²⁵ Uyarini chay profetaspa llullakusqankuta, pischus sutiypi parlayta munanku, nishankutaj noqa paykunawan parlasqayta.

²⁶ Mayk'ajkamataj chay llulla profetasqa llulla imasta willaraspa kallanqankupuniri, chay yuyayninkuman jinalla orqhokusqankupiri?

²⁷ Chay ujkuna ujkunataj mosqokusqasninkumanta willanakusqasninkuwan, aylluyta noqamanta qonqachiyta munanku, imaynatachus ñaupa tatasninkupis qonqarpariwarqanku, Baalpa qhepantataj riporqanku, ajinata.

²⁸ Sichus uj profetajta uj mosqokuynin tiyan chayqa, willachun uj mosqoypuni kasqanta. Sichus pi palabraytapuni jap'in, chayri cheqamantapuni willarachun. Trigotawan pajatawanqa mana kikinchachiyta atisunmanchu.

²⁹ Palabrayqa nina jinamin, rumista t'unaj martillo jinataj. Noqa Señor chayta nini.

³⁰ Chayrayku chay profetasqa palabrasniyta ujkuna ujkuna suwanakunku. Chaykunaj contrampi oqharikuni. Noqa Señor chayta nini.

³¹ Chay profetaspa contrampi oqharikuni. Paykunaqa umachakusqasnillankuta palabrasniy kasqanta ninku.

³² Llullakusqasninkuwan, chay thautisqasninkuwantaj aylluytaqa noqamanta t'aqachinku. Mana noqaqa paykunata kachakorqanichu, nitaj imatapis kamacherqanichu. Ajinaqa aylluyta yanapaytaqa mana aterqankuchu. Noqa Señor chayta nini.

Señorpa parlasqasnin

³³ Jeremías, sichus aylluymanta uj runa, chayri uj profeta, chayri uj sacerdotespis tapusunkiman: Mayqentaj Señorpa willayninri?, nispa chayqa, qan ninki: Señorqa nin: Qankunata uj q'epita jina saqerparisqaykichej, nispa.

³⁴ Sichus uj profeta, chayri uj sacerdote, chayri aylluymanta uj runapis kay jinata ninman, kayqa Señorpa willaynin, nispa chayqa, noqa payta aylluntinta jasut'isaj.

³⁵ Pipis kausaqenta, chayri paypa ayllunmanta kajtapis tapukojtenqa, kay jinata ninakunkichej: Ima nispataj Señorqa kuticherqari, imatataj nerqari?, nispa.

³⁶ Jinapis qankunaqa ama kay jinata parlaychejchu, Señorpa willaynin kayqa, nispa. Pillatajpis Señorpa palabran kasqanta ninman chayqa, chay kikin palabrasnillantataj uj q'epiman tukuchisaj. Qankunamin kausaj Diospa palabrasninta uj jinaman tukuchinkichej. Payqa Diosniykichej, Tukuy Atiyniyoj Señortaj.

³⁷ Jeremiasqa profetasta tapurin: Imatataj Señorqa kutichin, ima nintajri?, nispa.

³⁸ Kayqa Señorpa willaynin, nispa ninkuman chayqa, kay jinata kutichiy: Señorqa nin: Qankuna imatachus mana munarqanichu ninaykichejta chayta nisqaykichejrayku.

³⁹ Qankunata uj q'epita jina oqharisqaykichej. Qankunaman, jinataj ñaupa tatasniykichejmampis qorqaykichej chay llajtaykichejmantapis noqamanta aswan karuman wijch'usqaykichej.

⁴⁰ Qankunaj pataykichejmantaj k'umuykachayta, wiñaypaj p'enqakuytawan apachimusaj, mana jayk'aj qonqanaykichejpaj jina.