Jeremías 21 - Qheshwa Biblia DC

Jerusalenqa jasut'isqa kanqa

^1-4 Rey Sedequías Maasiaspa wawan Pasurta kacharqa, chantá Maasiaspa wawan sacerdote Sofoniastapis Jeremiasman kachallarqataj, kayta nejta: Señorta tapuripuwayku, imaraykuchus Babiloniamanta rey Nabucodonosor yaykuykamushawayku. Ichapis Señorqa munanman uj t'ukuna imata ruwayta, Nabucodonosortataj ithirichiyta. Chaypacha Señorqa Jeremiasman parlarqa, Jeremiastaj Sedequiaspa kachasqasninman kuticherqa: Niychej Sedequiasman, Israelpa Diosnin Señorqa kayta nin: Noqa soldadosniykichejta qhepaman kutirichisaj, babilonioswan, jinataj caldeoswan maqanakushajtiykichej. Paykunaqa perqaykichej wasanta muyuykamunkuña, jinamanta llajta chaupiman tantaykusqaykichej.

⁵ Noqa kikiy qankunaj contraykichejpi maqanakusaj tukuy atiyniyta kachaykuspa k'ajaj phiñakuyniywan.

⁶ Wañuchisaj kay llajtapi tukuy tiyakojkunata, runasta, chantá uywastapis, uj millay onqoywan wañurachisaj.

⁷ Chay qhepantataj Judamanta rey Sedequiasta, Nabucodonosorpa makisninman, waj wañuchejkunaj makisninanwan jaywaykusaj. Chanta jaywaykullasajtaj tukuy puchojkunata, onqoykunamanta, maqanakumanta, yarqhaymanta, llajtapi puchojkuna soldadosta ima. Noqa saqesaj espadawan wañuchisqas, mana uj chhikan khuyarisqas kanankuta. Noqa Señor chaytaqa nini.

⁸ Willaytaj llajtaman noqa Señor kayta nisqayta: Ajllakunankupaj noqa churani kausay ñanta, wañuy ñantawan.

⁹ Pichus kay llajtapi qhepakojqa maqanakupi yarqhaywan, chayri onqoywan wañonqa. Pitajchus llajtamanta llojsispa caldeoswan jap'ichikonqa chayqa, mana wañonqachu, kausaynillantapis payqa salvanqapuni.

¹⁰ Noqa kay llajtaman apachimunayta niniña sajra kajkunata, manataj allin kajkunatachu. Babiloniamanta reyman llajtata jaywasaj, paytaj ninata jap'iykuchenqa. Noqa Señor chayta kamachini.

Judamanta reypaj uj willay

¹¹ Judá reypa ayllunman, rey Davidpa mirayninman, kay noqaj nisqayta nimuy:

¹² Señormanta kay willayta uyariy: Tukuy p'unchaykunapi cheqan kajllata ruway, chay ñak'arejkunata kacharichiy qhasimanta oqojkunamanta. Pajtataj chay millay ruwasqasniykirayku phiñakuyniy nina jina jap'iykukunman, manataj pipis thasnuyta atishanmanchu.

¹³ Qan, llajta, valleta kamachinki, pampapi uj chhanka jinataj kashanki, noqa Señor contraykipi oqharikuni. Qankunarí ninkichej: Pitaj maqanakoj yaykuykamuwasunmanri?, nispa. Pitaj pakakunanchejkama chayamuwasunmanri?, nispataj.

¹⁴ Noqa jasut'isqaykichej ruwasqasniykichejman jina, ninatataj jap'iykuchisaj sach'asniykichejman. Chay ninataj tukuy muyuynimpi kajkunata ruphaykonqa. Noqa Señormin chayta nini.