Jeremías 20 - Qheshwa Biblia DC

Pasurpa contrampi willay

¹ Maypachachus Imerpa wawan sacerdote Pasur Diosta yupaychana wasimanta kuraj kamachej kashajtin, Jeremiasta Diospa willayninta parlashajta uyarerqa.

² Chaypacha Pasur kamacherqa Jeremiasta maqaykunankuta, chantá uj kurkumantaj jap'iykuchimunankuta pata kaj Benjamín Punkupi, Diosta yupaychana wasej qayllannejpi.

³ Q'ayantintaj chay kurkumanta Jeremiasta phaskaramunankuta kamacherqa, chaypitaj Jeremiasqa nerqa: Señorqa chay Pasur nisqa sutiykita Magor-misabi nisqa sutiwan churasunki.

⁴ Señorqa nisunki: Qan kikiyki mayta mancharikunaykipaj jina ruwasqayki, jinataj tukuy kausayniykipajpis; rikunaykita kausaqesniyki enemigosninkoj espadanwan wañuchisqas kanqanku. Tukuy Judapi kaj tiyakojkunatataj Babilonia reypa makisninman jaywaykusaj, payta jallp'aykichejmanta Babiloniaman apasonqachej, chayri cuchillowan wañurachisonqachej.

⁵ Jinallatataj kay llajtapipis tukuy ima kajkunasniykichejta, Judapi reykunaspa tukuy imasninkuta Babiloniaman apanankupaj jaywaykullasajtaj.

⁶ Qanrí, Pasur, tukuy aylluykiwan khuska Babiloniaman wijch'usqallataj kanki. Chaypi wañumunki, chayllapitaj p'ampasonqanku, qanta, tukuy kausaqesniykitawan, pikunamanchus qan llullakuspa profeta jina sut'incharqanki.

Jeremiaspa waqaynin

⁷ Señor, qan ch'aukiyawarqanki, noqataj ch'aukiyachikullarqayki; qan may kallpayoj karqanki atipawarqankitaj. Sapa kutipi asipayakuwanku, tukuytaj noqamanta alqochakuwanku.

⁸ Parlani chayqa, ñak'ariymanta, jinataj wañuymantapuni parlani, chayraykutaj sapa kuti toreawanku, asiykakamuwankutaj, palabrasniykita willarasqayrayku.

⁹ Sichus nini: Manaña Señorpi yuyasajchu, manañataj sutimpipis parlasajchu, chaypachaqa ukhuypi palabrasniykeqa nina jina ruphaykuyta munawan, tullusniykamataj chayawan. Chaywampis sonqoyta ñit'iykukuyta munani manataj atinichu.

¹⁰ Uyarini contraypi runas chhichinakushajta, tukuynejpi manchachikuykunas tiyan, nispa. Jamuychej ch'ataykusunchej, chay jawa kausaqesniypis suyanku imapi pantanayta. Chantaqa nillankutaj: Ichapis ch'aukiyachikunman, chaywanqa atipaykusunchej, vengakusunchejtaj, nispa.

¹¹ Señor, qan noqawan kashanki, uj mana atipay atina ch'ajwapi maqanakoj jina. Pichus qhatiykachawajkunaqa urmanqanku, manataj atipayta atiwanqankuchu; atipachikuspa p'enqaypi rikhurenqanku, mana qonqay atinapaj jina, wiñaypaj mana allimpaj qhawasqas kanqanku.

¹² Tukuy Atiyniyoj Señor, qanlla cheqan ñawiwan qhawawanki, qanmin rikunki runaj tukuy sonqonta, noqamampis rikuchiway imaynatachus chay runasta jasut'isqaykita; chayrayku makillaykiman kausayniyta churani.

¹³ Señorman takiychej, Señorta yupaychaychej. Payllamin salvan llakiypi kajta, chay sajrata ruwajkunaspa makinmantaqa.

¹⁴ Maldicisqa kachun chay paqarisqay p'unchayqa. Mamay nacechikuwarqa chay p'unchayqa, ama bendicisqachu kachun.

¹⁵ Maldicisqa kachun pichus tatayta kusicherqa, uj qhari wawa nacepusunki nispa, willajqa.

¹⁶ Chay runaqa, imaynatachus Señorqa wiñaypaj llajtasta phirin, ajina phirisqa kachun. Sut'iyaymanta nanaywan qhapariykunasta uyarichun, chaupi p'unchaypitaj maqanaku ch'ajwaykunasta.

¹⁷ Diosqa mamaypa wijsampi mana wañuchiwarqachu. Ajinamanta mamayqa sepulturay kanman karqa, noqarí mana jayk'ajpis nacekuymanchu karqa.

¹⁸ Imapajtaj mamaypa wijsanmanta llojserqaniri, kay jina nanayta, llakiykunasllatataj rikunaypajri, kausayniytataj p'enqaypi tukuchinaypajri?