Jeremías 2 - Qheshwa Biblia DC

Israelpa Diosmanta t'aqakusqan

¹ Señor noqaman parlaykamuwarqa, kay jinata nispa:

² Riy parlamuy Jerusalén llajtaman; Qhapariy allinta uyarinankupaj jina: Ajinata nin Señorqa: Yuyarikuni maypachachus qan sipasllaraj kashajtiyki noqaman allin kawarqanki, maypachachus warmiypaj aysarikorqayki chaypacha munakuwaj karqanki, ch'in pampasnejta, mana jayk'aj tarpusqa jallp'asnejta qhatiwarqanki.

³ Israelqa noqapaj t'aqasqa karqa, cosechasniymanta aswan allin kaj oqharisqay karqa. Pillapis paykunata ñak'arichejtenqa noqa jasut'ej kani, aswan ñak'ariykunasta chaykunaman apachispa. Noqa Señor chayta nini.

^4-5 Jacobpa ayllusninmanta kajkuna, Israelmanta tukuy ayllus kajkunapis uyariychej Señorpa parlasqanta. Ajinata nin Señorqa: Chay ñaupa tatasniykichej, ima mana allin kajtataj noqapi tarerqanku karunchakunankupajri? Qhasi manakaj dioskunata yupaychaspa, paykunapis qhasi manakajllamantaj tukorqanku.

⁶ Manaña noqamanta tapukuwankuchu: Maypitaj kashan, Egipto jallp'amanta orqhomuwarqanchej ch'inkunasnejta, may wayq'orara ch'in jallp'asnejta, mana yakuyoj jallp'asnejta, mana pejpa purisqan, nitaj tiyakusqan, may manchachikuna jallp'asnejta pusamuwarqanchej chay Diosri?, nispa.

⁷ Noqamin pusamorqaykichej kay sumaj poqoj jallp'amin, chay sumaj poqoykunasninta mikhunaykichejpaj, imaschá allinta poqon chaykunatawan. Chantá qankunataj jamuytawan jallp'asniyta ch'ichicharqankichej. Ruwasqasniykichejqa kay kikin jallp'aypi millachikunaypaj jina kashan.

⁸ Sacerdotesqa nerqanku: Maypitaj Señor kashanri?, nispa. Leyniymanta yachachejkunapis mana rejsikapuwarqankuchu. Kurajkunarí contraypi oqharikorqanku. Profetasqa Baalpa sutillampi parlarqanku, chay qhasi manakaj lantispa qhepantataj riporqanku.

Israelta juchachanamanta

⁹ Chayrayku noqa Señor kayta nini: Qankunaj contraykichejpi juchachayta qallarisaj, jinallataj allchhisniykichejpa contranta ima.

¹⁰ Riychej inti yaykuynej churusman, qhawaychejtaj, pillatapis Cedarman kachaychej allinta qhawamunampaj, kaypi jina imapis kanchus manachus chayta.

¹¹ Ima naciontaj dioskunasninta cambian, manapis cheqa dioskunachu kashajtin. Chaywampis aylluytaqa atiyniyoj Diosninta saqerpariwan, qhasi manakaj lantisman ripunankupaj.

¹² Janaj pachakuna kay jina kasqanmanta t'ukuychej, manchachikuywantaj kharkatitiychej. Noqa Señorman kayta nini.

¹³ Aylloyqa iskay layata juchallin: Noqata saqerpariwarqanku uj ch'uwa kausaj juturi yaku kashajtiy. Allarqankutaj pujyusninkuta, yakusta mana sayachej lajra pujyusta.

Israelpa juchanrayku mana allinkuna

¹⁴ Israelqa mana kamachichu karqa. Payqa kamachi kanampajchu nacekorqa? Imaraykutaj tukuy kapuyninta qhechunkuri?

¹⁵ Imaraykutaj leones jina sinch'ita qhaparispa Israelman phinkiykunkuri? Jallp'ankuta ch'impachata saqerparinku, llajtasninkutapis q'olasqasta mana runayojta saqerparinku.

¹⁶ Menfismanta, jinataj Tafnesmanta runaspis umaykita t'ojlurpasorqanku.

¹⁷ Chay tukuy imas qanta qhatirisorqa, noqa Señor Diosniykita saqerpariwasqaykirayku.

¹⁸ Kunanrí, Egiptoman rispa Nilo mayumanta yakuta ujyamusqaykiwan imatataj tarinkiri? Asiriaman rispa, Eufratesmanta yakuta ujyaspapis imatataj tarikamunkiri?

¹⁹ Kikin juchallaykitaj jasut'isonqa; chay mana kasukoj kasqallaykitaj ch'ataykusonqa. Allinta umacharikuy, imayna sajrachus, k'allkutajchus kasqanta noqata saqerpariwasqayki, noqa Señor Diosniykita mana kasuwasqayki ima. Noqa, Tukuy Atiyniyoj Señor chayta nini.

Israelpa mana kasukuynin

²⁰ Unaymantaña qanqa contraypi oqharikorqanki, mana kasuwarqankichu, nerqankitaj: Mana uyariyta munanichu, nispa. Tukuy orqo puntasnimpi, thansa sach'asnimpa llanthusnimpi ima qhenchachakorqanki.

²¹ Noqa qanta sumaj ajllasqa uvas sach'ata jina plantarqayki, chantapis sumaj ajllasqa mujuta jina. Kunantaj mana kaj sach'aman tukunki.

²² Ushpha yakuwampis, chayri may chhika jabonwampis mayllakuwaj chaypis, ch'ichi juchasniykeqa ñaupaqeypi kikillampuni kanqa.

²³ Imaynatataj niyta atiwaj mana ch'ichichasqa kani, nitaj chay mana kaj dioskunata yupaychanichu, nispari? Qhawarikuy imaynataj vallepi puriyniyki karqari. Chayta allinta reparakuy tukuy qampa ruwasqasniykita. China camello jina usqhayta purej maymampis thaskirillan, ajinata.

²⁴ Imaynatachus k'ita china burroqa q'oñirikuspa wayramojtin muskhispa mask'an tarinankama. Q'oñirisqa kashajtenqa ni pi jark'ayta atinchu. Orqo burroqa mask'asqampi mana sayk'unchu. Q'oñirisqa kashajtenqa tarenqapuni.

²⁵ Israel, ama q'ara chaki purispa nanachikuychu, ama kunkaykita yakumanta ch'akichikojta saqeychu. Chaywampis qan nerqanki: Mana ni ima kashajtimpis, noqaqa wajkunata munakuni, paykunawantaj ripusaj, nispa.

Israelqa jasut'inata munashan

²⁶ Imaynatachus uj suwaqa jap'ichikuspa p'enqakun, ajinata Israelpis p'enqakonqa, llajtantin, reyesnintin, kurajkunasnintin, sacerdotesnintin, chantá profetasnin ima p'enqakonqanku.

²⁷ Uj k'aspita ninkichej: Qan tatay kanki!, nispa. Uj rumitataj ninkichej: Qan mamay kanki!, nispa. Noqamantaj wasanchakuwankichej, manataj uyaykichejta rikuchikuwankichejchu. Maypachachus ñak'ariypi rikhuriytawankamari, nishawankichej: Jamuy salvanawaykupaj!, nispa.

²⁸ Judá, maypitaj chay ruwakusqasniyki dioskuna kashankuri? Mashkhachus llajtasniyki chay chhikallataj dioskunasniyki tiyapusunku. Ñak'ariyman chayajtiyki paykuna jamuspa salvasuchunku.

²⁹ Imatataj contraypi parlayta munankichejri, tukuyniykichej mana kasukoj kashaspari? Noqa Señor chayta nini.

³⁰ Qhasillata wawasniykichejta jasut'erqani, yachachiykunasta paykunaqa mana kasuyta munarqankuchu. Kikin qankuna millay phiña leones jina, profetasniykichejta wañucherqankichej.

³¹ Qankunapis kunan p'unchaypi kausajkuna, Señorpa parlasqanta allinta uyariychej. Israel, qampaj noqaqa uj ch'in pampa jinachu karqaniri? Chayri, laqhayaywan junt'asqa jallp'achu karqaniri? Ayllúy, imaraykutaj ninki: Qanmanta kacharisqas kayku; ni jayk'aj qanman kutimusqaykuñachu, nispari?

³² Qonqakapunmanchu uj warmi chay k'achanchakunasninmanta, jinallataj casarakapoj warmi k'achanchakunasninta? Chaywampis aylloyqa astawanraj noqamantaqa qonqakaporqa.

³³ Munanakunata mask'anapajqa sumajta ñantaqa rejsinki. Sajra kajta yachachinapajqa, churasqa kanki.

³⁴ P'achaykeqa wajchaspa, jinataj mana juchayojkunaspa yawarninwan ch'ajchusqa rikhurin. Paykunataqa mana ima sajrata ruwashajtapis jap'ejchu kanki.

³⁵ Chaywampis, qan ninki: Noqaqa mana juchayojchu kani. Chayrayku Diosqa manaña phiñasqachu noqawan kashan, nispa. Qan ninki mana juchayoj kasqaykita, chayrayku qanwan demandata oqharisaj.

³⁶ Imaraykutaj chhikata apurakunki kausaqesniykita cambianaykipajri? Egiptopis ch'aukiyasonqa imaynatachus Asiriapis ch'aukiyasorqa ajinata.

³⁷ Chantataj Egiptomanta may p'enqayta kutimushanki, imaraykuchus, atienekorqanki chaykunata qhesacharqani, paykunawanqa mana imatapis tarinkichu.