Jeremías 19 - Qheshwa Biblia DC

Wich'i p'akisqa imatachus niyta munan

¹ Señor niwarqa: Riy rantimuy uj wich'ita, wajyaytaj kay llajtamanta wakin kurajkunata, jinataj wakin kuraj sacerdotestawan.

² Chaymantaqa llojsiy Benhinon valleman, k'analla ruwana punkuman sayaykamuy, chaypitaj willanki imatachus willasqayki chayta.

³ Niy: Judamanta kaj reykunas, Jerusalempi tiyakojkunapis, Señorpa palabranta uyarichej: Ajinata nin: Israelpa Tukuy Atiyniyoj Señor Diosnenqa: Jatuchaj ñak'ariykunata kay cheqaman apachimusaj, pikunachus kay willayta uyarejkunaqa ningrisninku sonashaj qhepakonqanku.

⁴ Israelitas saqerpariwarqanku, kay cheqatataj uj mana rejsisqa jallp'aman tukucherqanku, chaypi inciensosta waj dioskunallaman q'osñicherqanku. Chaytaqa ñaupa tatasninku, ni paykuna, nitaj Judamanta reykunaspis rejserqankuchu, chaykunapitaj mana juchayoj runaspa yawarninta jich'arqanku.

⁵ Chaymantataj, altarkunasta sayaricherqanku, wawasninkuta chaypi Baalpaj ruphachipunankupaj. Chayta noqaqa paykunaman mana kamacherqanichu, nitaj nillarqanipischu, ni yuyaynillaypis karqachu.

⁶ Chayrayku qhepa p'unchaykunaman, maypachachus kay cheqaqa manaña Tofetchu sutichakonqa, nitaj Ben-hinom vallechu, manachayqa wañuchina valle nisqa kanqa. Noqa Señor chayta nini.

⁷ Kay cheqapi noqaqa Judáj, jinataj Jerusalempa imatachus yuyasqasninta chinkachisaj. Saqesajtaj chay wañuchejkunaj enemigosnin atipaykunankuta, wañurachinankutataj. Chay ayasninkurí aycha mikhu phawajkunaj mikhunankupajtaj kanqanku.

⁸ Kay llajtata uj ch'inman tukuchisaj, uj imamanta t'ukunapaj jinataj tukuynin phirisqa kasqanmanta.

⁹ Saqellasaj runas kikin qhari wawasninkuta, jinataj warmi wawasninkutapis mikhuykunankuta. Purajmanta mikhunakunankutapis, chay wañuchej enemigosninku llajtata muyuykojtinku, mana aguantayta atisqankurayku.

^10-11 Kayta niytawan kamataj, chay wich'ita, qanwan kashanku chay runaspa ñaupaqempi p'akiy, niytaj: Tukuy Atiyniyoj Señorqa nin: Noqapis kay aylluta, kay llajtatapis p'akisaj, imaynatachus uj wich'ita p'akejta rikunkichej ajinata. Chayqa manaña allinyayta atikunñachu. Runasqa ayasta Tofetpiña p'ampanqanku chay cheqapi manaña campo kajtin.

¹² Ajinatamin kay llajtata, chaypi tiyakojkunatapis ruwasaj. Chantapis Tofeti jinallataj saqesaj. Noqa Señor chayta nini.

¹³ Jerusalempi, chantá Judapi reykunaspa wasisnin, chay wasi pataspi, maypichus inciensosta q'osñichej kanku tukuy qoyllurkunaman, chantá maypichus vinota waj dioskunaman jich'aj kanku chaykunapis, Tofetpi jina ch'ichipaj qhawasqas kanqanku.

^14-15 Kay qhepantataj Jeremiasqa Tofetmanta kutimorqa, maymanchus Señor kachasqa, sutimpi parlamunanta. Chaymantataj Diosta yupaychana wasej patiompi sayaykukuytawan tukuy runasman nerqa: Israelpa tukuy atiyniyoj Señor Diosnin nin: Kay llajtaman tukuy qayllapi kaj llajtasmanwan, ima jasut'ichus jamunanku karqa, chaykunata kachaykamusaj, imaraykuchus sonqonkuta rumiyacherqanku, palabrasniyta mana kasunawankupaj.