Jeremías 18 - Qheshwa Biblia DC

T'uru manka ruwajwan, t'uruwan

^1-2 Noqa Jeremiasman Señorqa kay jinata niwarqa: Uraykuymanka ruwajpa wasinman, chaypitaj uj willayta qanman qosqayki.

³ Noqa Jeremías uraykorqani, tariparqanitaj tornopi t'urumanta ruwashajta.

⁴ Imatachus ruwasharqa chay mana allinchu llojsejtenqa, chay kikin t'urullamantataj wajtañataj ruwaj churakorqa, munasqanman jina imapis llojsinankama.

^5-6 Chantá Señorqa nillawarqataj: Manachu noqapis qankuna israelitaswan ruwayta atiyman, imaynatachus mankata t'urumanta ruwan ajinata? Qankunaqa makiypi kankichej, chay manka ruwajpa makimpi t'uru jina. Chayta nini noqa Señor.

⁷ Ima ratollapis munayman sik'iyta, urmachiyta, nacionta, chayri reinotapis atillayman phiriyta.

⁸ Chay nación sajramanta t'aqakunman chaypachaqa, chay apachimunay karqa chay jasut'ita manaña apachimusajchu.

⁹ Waj ratopi noqa nerqani chay nacionta wiñachinayta, chayri sayarichinayta.

¹⁰ Sichus chay nación sajrata ruwan, kamachisqasniytataj mana kasunchu chaypachaqa, imastachus paypaj wakichiporqani chaytaqa manaña apachimusajchu.

¹¹ Niy ari Judá aylloj runasninman, jinataj Jerusalempi tiyakojkunaman, noqa Señor paykunaman nishasqayta: Noqa wakichikushasqayta qankunaj contraykichejpi ruwaykunata. Jasut'iyta munashaykichej. Saqellaychejña ari chay sajra ñanta; puriyniykichejta, ruwasqasniykichejtapis astawan allinyachiychej.

¹² Paykunaqa nisonqanku: Ama tiempoykita usuchiychu. Noqaykoqa munasqaykuman jina kausakullasqayku, qhatillasqaykupunitaj rumi sonqoykupi sajra yuyasqasniykumanjina, nispa.

¹³ Chayrayku Señorqa niwarqa: Naciones ukhupi tapuriychej, ichapis pi kay jinata nejta uyarin. Israel aylloqa manchay millayllatapuni ruwan!

¹⁴ Libanopi chay alto chhankasninmanta jayk'ajpis rit'eqa chinkapunchu? Chayri karu jallp'asmanta jamoj yakupis tukukapunmanchu?

¹⁵ Aylloyqa qonqarparipuwan, chay qhasi dioskunasninmantaj inciensosta jaywakapun. Chay ñaupa cheqan ñanmanta chinkarparin, waj mana rejsisqa ñankunasta qhatiykuspa.

¹⁶ Jinamanta jallp'ataqa uj ch'in pampaman tukurparichin, jinataj qhepampi qhepampi asipayasqallapuni kanampaj. Tukuy chayninta pasajkunaqa mancharisqas umankuta khiwirenqanku.

¹⁷ Inti llojsimuynejmanta wayra jina noqaqa Israelta ch'eqerachisaj; enemigosnimpa ñaupaqenta ayqechispa. Noqa paykunaman wasayta kutirisaj, manataj uyaytachu, maypachachus jasut'inay p'unchay chayamonqa chaypacha.

Profetaj contrampi ruwaykunasta wakichikunku

¹⁸ Runasqa nerqanku: Jeremiaspa contrampi wakichikuna, mana jayk'ajpis sacerdotes yachachinawanchejpaj pisiwasunchu, nitaj yachayniyojkunapis umachanawanchejpaj, nitaj profetaspis Diospa palabranta willanawanchejpaj. Wañuchinankupaj ch'ataykunachej. Ama kasunachejchu ni ima niwasqanchejta, nispa.

Jeremiasqa Diosmanta mañakun

¹⁹ Señor, allinta uyariway. Enemigosniypa nisqasninkuta uyariy.

²⁰ Allin kajtaqa sajrawanchu pagapuna? Paykunaqa ayayta p'ampanankupaj jallp'ata allankuña. Yuyarikuy qanwan tiyakusqaymanta, paykunataj khuyayniykita mañakuspa parlasusqayta mañasuspataj paykunamanta phiñakuyniykita qhechunaykita.

²¹ Kunanqa wawasninkuta yarqhaywan wañuchiy, chayri espadawan; warmisninku viudas qhepakuchunku, manaña wawasniyojtaj. Qosasninkupis onqoywan wañurachunku. Wayna wawasninkupis maqanakupi wañurachunku.

²² Contrankupi ujllapi ashkha suwasta kachaykamuy. Manchariywan qhaparqachasqanku uyarikuchun, imaraykuchus jap'inawankupaj uj jusk'uta allanku, purinasniymantaj tojllata churamunku.

²³ Qantaj, Señor, yachankiña, imastachus contraypi ruwayta munashasqankuta, noqata wañuchinawankupaj. Chay sajra ruwasqasninkumantaqa ama perdonaychu, nitaj juchasninkuta pampachaychu. Ñaupaqeykipi urmarachiy, phi'nakuyniykiwantaj jasut'iy.