Jeremías 17 - Qheshwa Biblia DC

Judáj juchachakusqan jasut'ichikusqantaj

¹ Judá, uj puntachasqa fierrowan juchaykeqa qhelqasqa kashan, chanta uj puntachasqa diamantewan ima, rumi sonqoyki ukhupi kashan chay altaresniykej wajrasnimpiwan.

² Wawasniyki yuyarikunku altaresmanta, chay yupaychana k'ullusninkumantataj, chay ch'ampa sach'aswan khuska kasharqa chaykunamanta, jinataj chay orqo pataspi kasharqanku chaykunamantapis.

³ Chay campo orqospi kasharqa chaykunamantapis. Juchasniykirayku saqesaj tukuy qhapaj kajkunasniykita, k'acha imasniykipis suwaqas kanankuta. Jallp'aykipi tukuy yupaychana orqosniykitapis qhechusonqanku.

⁴ Chayaqeykipaj qorqayki chay jallp'ata saqenayki tiyan, jinamantataj enemigosniykej kamachin kanankipaj; mana rejsisqa jallp'api kanaykipaj. Phiñakuyneyqa nina jina ruphaykunampaj jap'ikunña.

Ashkha willaykunas

⁵ Señorqa nin: Ñak'achun pichus runasllapi atienekojqa; runaj yanapayninta mask'ajqa, sonqompitaj Diosmanta karunchakojqa.

⁶ Chay runaqa uj ch'in pampapi wiñakoj retama jina kanqa: Rumis ukhupi, intej choqasqan jallp'aspi wiñakoj sach'as jina, nitaj pejpa tiyakunan jina kanqa.

⁷ Pichus noqapi atienekojtaj may kusiyniyoj kachun, noqapitaj suyayninta churajqa.

⁸ Chayqa mayu patapi sach'a jina kanqa, mayunnejman saphej, chayqa mana manchachikonqachu q'oñi tiempo jamojtin. Chay sach'aqa may q'omerllapuni kanqa. Ch'aki watas jamojtimpis mana qawenqachu, poqollanqapunitaj.

⁹ Mana imapis runaj sonqon jina ch'aukaqa kanchu, nitaj millayta ruwajpis. Pitaj chayta rejsiyta atinmanri?

¹⁰ Noqa Señor allinta yachani, imatachus yuyasqasninkutapis rejsini, sapa ujmantaj imatachus ruwasqankuman jina qopuni.

¹¹ Pichus mana llank'aspalla qhapajyakojqa, rijch'akun chay mana paypa runtusnillanta ojllakapoj pampa yuthusman. Chay qhapaj kaynintaqa wayna kaynillampitaj saqenan kanqa, qhepamantaj uj wampu kasqallan yachakonqa.

¹² Diosninchejta yupaychana waseqa Diospa tiyakunanmin, qallarikuymantapacha mayu pataman oqharisqataj.

¹³ Señor, qanmin Israelpa suyaynenqa kanki. Pichus saqekojqa p'enqachisqa rikhurenqa. Qanmanta tukuy karunchakojqa chinkarenqanku, ñut'u jallp'api uj suti qelqasqa jina, chayqa kashan saqerparisusqankurayku, uj ch'uwa yaku juturi jina qan kashajtiyki.

Jeremiasqa Señorman qhaparikun

¹⁴ Qan jampiway, Señor, jampisqataj kasaj. Qan salvaway, Señor, salvasqataj kasaj. Qanmin, Señor, yupaychanayqa kanki.

¹⁵ Runaqa niwan: Maytaj Señorpa palabranri? Kunanqa junt'akuchun ari!, nispa.

¹⁶ Chaywampis, mana noqa mañarqaykichu qan apachinaykita ñak'ariykunata, nitaj munaporqanichu paykunapajqa chay chhika nanaykunata. Simiymanta llojsejtaqa ñaupaqeykipi nerqani.

¹⁷ Ama ari qanqa mancharichiwaychu, imaraykuchus qanqa ñak'ariykunasniypi pakaykuwajniymin kanki.

¹⁸ Qhatiykachawajkunata p'enqaypi rikhurichiy. Paykunalla mancharikuchunku, amataj noqaqa. Paykunaj patankuman ñak'ariykunasta apachimuy, tukuyninkuta kutin kutinta phirirpariy.

Samakuna p'unchayta waqaychanamanta

¹⁹ Señorqa niwarqa: Llajtaj punkunman rispa sayaykamuy, Judamanta reykuna maynintachus yaykushanku, llojsishankutaj chayman. Chantá kikillantataj Jerusalempa kikin p'unchaynimpi ruwamuy.

²⁰ Niytaj runasninman: Judamanta tukuy runas, reykunapis kay punkusta yaykojkuna, llojsejkunapis Señorpa parlasqasninta uyariychej.

²¹ Señorqa nin: Kausayniykichejta khuyaspa, ama apaychejchu cargasta, nitaj Jerusalempa punkusninnejta samakuna p'unchaypeqa apaykuychejchu.

²² Amallataj samakuna p'unchaypeqa wasisniykichejmanta cargasta orqhoychejchu, amataj imatapis chay p'unchaypeqa ruwaychejchu. Chay samakuna p'unchaypeqa noqata yupaychawaychej, imaynatachus ñaupa tatasniykichejman kamacherqani ajinata.

²³ Paykunataj mana uyariwarqankuchu, manachayqa k'ullukorqanku, manataj kasuwayta munarqankuchu, nitaj wanaytapis.

²⁴ Señor nillantaj: Cheqamanta kasuwaychej, amapuni samakuna p'unchaypeqa kay llajta punkusnejta cargasta apaychejchu. Chay p'unchaypeqa yupaychawaychej, t'aqasta kachun, amataj ima ruwana kajtapis ruwaychejchu.

²⁵ Jinamanta Davidpa tronompi tiyakojkuna reykuna carretaspi, caballospi kay llajtaman punkusninta yaykullanqankupuni, kurajkunawan, Judamanta runaswan, chantá Jerusalenmanta runaswan ima. Jinamanta Jerusalempi tiyakojkunaqa kallanqapuni.

²⁶ Judá llajtasmanta, chay Jerusalén qayllapi kajkunamanta jamonqanku, Benjamimpa jallp'asninmantapis jamullanqankutaj, mar cantopi pampasninmanta, orqosninmanta, chantá Neguevmantapis. Diosta yupaychana wasiman apamonqanku uywasta, ruphachinapaj rikuchikusta jaywanankupajtaj, poqoykunasinkuta, inciensosninkutapis, Diospa wasimpaj nisqa jaywanastapis.

²⁷ Sichus qankuna kay kamachisniyta mana kasukunkichejchu, chay samakuna p'unchaypi yupaychanawaykichejta, jinataj cargasta Jerusalenman samakuna p'unchaypi mana apaykunatawan mana junt'awankichejchu chayqa, llajtaj punkusninman ninata churasaj, chay ninataj Jerusalempa palaciosninta ruphaykonqa tukuchinankama, manataj pipis thasnuyta atenqachu.