Jeremías 15 - Qheshwa Biblia DC

Diospa jasut'in jamunanmanta willakun

¹ Señorqa niwarqa: Moiseswan, Samuelwampis kay ñaupaqeyman rikhurimunkuman, chaywampis manapuni kay ayllumantaqa khuyakuymanchu. Niy paykunaman, kay ñaupaqeymanta llojsinankuta, maymampis ripuchunku.

² Sichus tapusunkuman: Maymantaj risqaykuri?, nispa chayqa, kay nisqaymanta paykunaman willay: Onqoywan wañunanku kajqa onqoywan wañuchunku. Maqanakupi wañunankupaj kajkunaqa, maqanakupi wañuchunku. Yarqhaywan wañunankupaj kajkunaqa, yarqhaywan wañuchunku. Jallp'ankumanta wijch'usqas kanku, kashan chaykunaqa, wijch'usqas kachunku.

³ Noqa Señor nini: Noqa apachimusqaykichej tawa laya jasut'ista: Wañuchisonqachej, maqanakupi alqos qhatatasonqachej, suweq'aras mikhusonqachej, chhikachaj millay animalesataj oqoykusonqachej.

⁴ Kay pachapi tukuy naciones kajkunata mayta mancaharichisaj imastachus paykunata ruwasaj chaywan, Judamanta Ezequiaspa wawan Manasés Jerusalempi imatachus ruwasqanrayku.

⁵ Jerusalén, pitaj qanmanta khuyakusonqari? Pitaj qanmanta sonqonta nanachikonqari? Pitaj kausayniykimanta dakonqari?

⁶ Qan saqerpariwarqanki, wasanchakuwarqankitaj, nispa Señorqa nin. Chayrayku noqaqa pacienciay tukukojtin, makiyta oqharerqani jasut'inasuypaj, tukuchisunaypajtaj.

⁷ Runasniykitaqa ichhuta jina ch'eqeracherqani, jallp'aykej llajtasninmanta orqhospa. Mana wawasniyojta aylluyta saqerqani, paykunata tukucherqani, imaraykuchus mana chay sajra kausayninkuta saqeyta munarqankuchu.

⁸ Paykuna ukhupi saqerqani viudasta, mar qochaj t'iyusninta jina ashkhata. Kikin chaupi p'unchaypi chinkachejta apachimorqani, wayna wawasniyoj mamaspa patanman, kaymanta jinalla paykunaj patankuman ñak'ariyta, mancharikuytawan.

⁹ Ashkha wawasniyoj mamas mana kallpayoj llauchhusman tukunku, p'enqasqas k'umuykusqastaj. P'unchaypa k'anchaynimpis paykunapaj laqhayaykun. Pipis kausashaj qhepakojqa enemigosninwan wañuchisqallataj kanqa. Noqa Señor chaytaqa nini.

Profetaj qhapariynin

¹⁰ Ay, noqamanta, mamáy, qanqa maqanakunallaypaj nacechikuwasqanki, tukuy kay pacha runaswan qhayqarakunaypaj, churanakunaypajtaj. Mana pimampis qolqetaqa manunichu, nitaj pipis noqaman manuwankuchu, jinapis tukuy runas sajra kajta munapuwanku.

¹¹ Chay mañapuwasqasninku junt'akuchun Señor, sichus qanta mana allinta kasorqayki, jinataj chay enemigosniypaj mana mañakorqaykichu, khuyayta ñak'ariykunaspi, llakiykunaspitaj kashajtinku chayqa.

Israelman jasut'i kananta willashan

¹² Pitaj pata ladomanta fierrota, broncetapis p'akiyta atinmanri?

¹³ Israel, qanta tukuy juchasniykiraykumin enemigosniykej juchasninraykumin jaywaykusaj, qolqesniykita, kapuyniykita, tukuy imaschus jallp'aykipi kajtawan, paykuna chay tukuyta qhasilla apakapunankupaj.

¹⁴ Enemigosniykej kamachin kanaykita ruwasqayki, chay mana rejsisqayki jallp'aspi. Phiñakuyneyqa astawan nina jina k'ajarin, chaytaj ruphaykusonqa.

Profetaqa Señorman qhaparikun

¹⁵ Señor, qan tukuy imata yachanki, noqamanta yuyarikuy ari, jamuytaj yanaparinawaykipaj. Tukuy qhatiykachawajkunaman aynita kutichiy ari. Ama paykunata ch'inllamanta qhawakuychu noqata wañuchinawankukamaqa, qhaway qanrayku tukuy rimapayawasqasninkuta ñak'arishani.

¹⁶ Parlamuwajtiykeqa chay palabrasniykita mikhukorqani, chaytaj sonqo qhallallay, kusiytaj sonqoy ukhupi kawarqa, imaraykuchus Señor, Tukuy Atiyniyoj Diosníy, qampataman kani.

¹⁷ Mana khuskachakuyta aterqanichu, pikunachus kusikuyllawan yuyanku chaykunawanqa, qan noqata jap'ikapuwasqaykimantapacha, sapallaypuni kausakuni, imaraykuchus phiñakuyniykiwan junt'achiwarqanki.

¹⁸ Imaraykutaj kay nanayniy mana jayk'aj tukukunchuri? Imaraykutaj kay nanasqasniy mana thañinchuri? Tukuy jampispis mana imanajri? Noqaj rijch'ayniymantaqa chay rato uj yaku ch'akirparipoj jinalla kawanki.

Señorqa kutichin

¹⁹ Chaypacha Señor kutichiwarqa: Noqamanchus kutirimuwanki chayqa, noqa qanta jap'ikapusqayki, ñaupaqeypitaj kanki. Sichus qhasi manakaj imasta manaña thautinkichu, manachayqa allin imasllataña ninki chayqa, qan noqamanta willamoj kanki. Paykunamin qanman kutirikamunasunku, manataj qanchu paykunaman kutirikunayki tiyan.

^20-21 Noqa kay ayllupaj bronce perqata jina churasqayki. Maqanakusonqanku chaypis, mana atipasonqankuchu, imaraykuchus noqa qanwan salvasunaypaj kashani, kacharichisunaypajtaj. Noqa Señor chayta niyki, noqa kacharichisqayki sajra runaspa atiyninmanta, nispa.